កន្លងមក ថៃ បានអនុវត្តគោលនយោបាយលើកលែងពន្ធនាំចូល និងអាករលើតម្លៃបន្ថែមសម្រាប់ទំនិញនាំចូលនីមួយៗដែលមានតម្លៃតិចជាង ៤០,៥ដុល្លារ។

 

យ៉ាងណាមិញ ការហូរចូលនៃទំនិញចិនថោកៗចូលទីផ្សារថៃនាពេលថ្មីៗនេះ បានបង្កើតផលចំណេញមិនស្មើភាពគ្នា ដោយសារក្រុមហ៊ុនផលិតក្នុងស្រុកនៅតែត្រូវបង់ពន្ធ។ ដើម្បីធានាបាននូវការអនុវត្តពាណិជ្ជកម្មដោយស្មើភាព ថៃនឹងដាក់ពន្ធតម្លៃបន្ថែមលើទំនិញនាំចូលគ្រប់ប្រភេទចំនួន ៧ភាគរយ ដោយមិនគិតពីតម្លៃចាប់ពីថ្ងៃទី១ ខែឧសភា។

 

ពាក់ព័ន្ធនឹងបញ្ហានេះ លោក Lavaron Sangsnit លេខាធិការអចិន្ត្រៃយ៍នៃក្រសួងហិរញ្ញវត្ថុថៃរូបនេះ បានបញ្ជាក់ថា នាយកដ្ឋានគយនឹងគ្រប់គ្រងការប្រមូលពន្ធលើតម្លៃបន្ថែមក្នុងដំណាក់កាលដំបូង។ ក្នុង​រយៈពេល​វែង ក្រសួង​ហិរញ្ញវត្ថុ​ថៃ​នឹង​ធ្វើ​វិសោធនកម្ម​ច្បាប់​ពាក់ព័ន្ធពន្ធលើតម្លៃបន្ថែម ដើម្បី​ឲ្យ​នាយកដ្ឋាន​ពន្ធដារ​អាច​អនុវត្ត​បាន​ដោយ​ផ្ទាល់។

 

ទំនិញដែលនាំចូលថៃក្នុងមួយឆ្នាំៗមានចំនួនជាង ៣០លានកញ្ចប់ ក្នុងនោះជាងពាក់កណ្តាលជាទំនិញថោកដែលមានតម្លៃមិនលើសពី៤០,៥ដុល្លារ។ នេះ​កំពុងបង្កផល​ប៉ះពាល់​ដល់​អ្នក​ផលិត​ក្នុង​ស្រុក​ដែល​មិន​អាច​ប្រកួត​ប្រជែង​តម្លៃ​បាន។ នេះបើតាមកាសែត Bangkok Post ។ 

 

អ្នកជំនាញសេដ្ឋកិច្ចថៃនិយាយថា វិធានការថ្មីរបស់រដ្ឋាភិបាលថៃនឹងធ្វើឲ្យប្រសើរឡើងនូវការប្រកួតប្រជែងនៃអាជីវកម្មក្នុងស្រុក និងគ្រប់គ្រងលំហូរនៃផលិតផលចិនដែលមានតំលៃថោកដែលលក់តាមរយៈវេទិកាពាណិជ្ជកម្មអេឡិចត្រូនិកដូចជា Lazada ឬ Shopee...។

 

កាលពីខែកុម្ភៈ នាយករដ្ឋមន្ត្រីថៃ សេដ្ឋា ថាវីស៊ីន បានស្នើឱ្យនាយកដ្ឋានពន្ធដារ និងនាយកដ្ឋានគយបង្កើនកិច្ចខិតខំប្រឹងប្រែងដើម្បីការពារការហូរចូលនៃទំនិញថោកៗពីចិនទៅទីផ្សារក្នុងស្រុក ដែលបង្កឱ្យមានផលប៉ះពាល់អវិជ្ជមានដល់ក្រុមហ៊ុនផលិតទំនិញប្រើប្រាស់ក្នុងស្រុកថៃ៕