ដំណើរការជើងហោះហើរលេខ EK348 ដោយយន្តហោះ Boeing 777-300ER របស់ក្រុមហ៊ុនអាកាសចរណ៍ បានមកដល់អាកាសយានដ្ឋានអន្តរជាតិភ្នំពេញ នៅថ្ងៃទី ០១ ខែឧសភា ហើយត្រូវបានស្វាគមន៍ដោយ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាមួយនឹងការសម្តែងរបាំប្រពៃណីខ្មែរ។
 

គណៈប្រតិភូជាន់ខ្ពស់របស់ក្រុមហ៊ុនអាកាសចរណ៍ Emirates អមដោយប្រព័ន្ធផ្សព្វផ្សាយអន្តរជាតិ ត្រូវបានទទួលស្វាគមន៍ដោយ លោក Cyril Girot នាយកប្រតិបត្តិក្រុមហ៊ុន អាកាសយានដ្ឋានកម្ពុជា។
 

គណៈប្រតិភូជាន់ខ្ពស់ត្រូវបានដឹកនាំដោយ លោក Nabil Sultan អនុប្រធានប្រតិបត្តិផ្នែកលក់ និងអ្នកគ្រប់គ្រងប្រចាំប្រទេស​របស់ក្រុមហ៊ុន Emirates និង លោក Orhan Abbas អនុប្រធានជាន់ខ្ពស់ផ្នែកប្រតិបត្តិការពាណិជ្ជកម្មតំបន់ចុងបូព៌ា សម្រាប់ក្រុមហ៊ុនអាកាសចរណ៍ Emirates និង លោក Mohammed Al Qassim អ្នកគ្រប់គ្រងប្រចាំប្រទេសកម្ពុជា។
  

លោក Nabil Sultan បានអត្ថាធិប្បាយលើប្រតិបត្តិការឡើងវិញរបស់ Emirates មកកាន់ទីក្រុងភ្នំពេញថា៖ «បេតិកភណ្ឌវប្បធម៌ដ៏សម្បូរបែប និងសេដ្ឋកិច្ចដែលកំពុងរីកចម្រើនរបស់កម្ពុជា ធ្វើឱ្យប្រទេសនេះ ក្លាយជាគោលដៅទាក់ទាញសម្រាប់ការធ្វើដំណើរកម្សាន្ត និងអាជីវកម្ម។ យើងពិតជារំភើបរីករាយណាស់ សម្រាប់ផ្លូវហោះហើរដ៏ល្អនេះ ដើម្បីផ្សារភ្ជាប់ម្តងទៀត នូវបណ្តាញហោះហើរនៅតំបន់ចុងបូព៌ាដ៏ធំទូលាយរបស់យើងដែលមានស្រាប់។ តាមរយៈសេវាកម្មភ្ជាប់រវាងប្រទេសសិង្ហបុរី និងភ្នំពេញ យើងក៏អាចគាំទ្រសកម្មភាពទេសចរណ៍ និងពាណិជ្ជកម្ម រវាងមជ្ឈមណ្ឌលក្នុងតំបន់ទាំងពីរ និងជួយសម្រួលដល់ការដឹកជញ្ជូនទំនិញនាំចូល និងនាំចេញ ដ៏ងាយស្រួលរវាងសិង្ហបុរី កម្ពុជា និងសហព័ន្ធ​អារ៉ាប់រួម ក៏ដូចជាទីផ្សារផ្សេងទៀត នៅក្នុងបណ្តាញសកលរបស់យើង»។
 

លោកបានបន្តមានប្រសាសន៍ថា៖ «យើងសូមថ្លែងអំណរគុណដល់ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងអាជ្ញាធរមូលដ្ឋានក្នុងប្រទេស​កម្ពុជា សម្រាប់ការគាំទ្ររបស់ពួកគេ ក្នុងការសម្រួលដល់ការវិលត្រលប់នៃប្រតិបត្តិការរបស់យើងមកកាន់ទីក្រុងភ្នំពេញ ហើយទន្ទឹងរង់ចាំ​ផ្តល់ជូននូវបទពិសោធទេសចរណ៍លំដាប់ពិភពលោកសម្រាប់អតិថិជន និងការជំរុញភ្ញៀវទេសចរកាន់តែច្រើន ទៅកាន់ប្រទេសសិង្ហបុរី និងប្រទេសកម្ពុជា»។

 

លោក Cyril Girot នាយកប្រតិបត្តិក្រុមហ៊ុន អាកាសយានដ្ឋានកម្ពុជា បានមានប្រសាសន៍ថា៖ «អាកាសយានដ្ឋានអន្តរជាតិភ្នំពេញ បន្តកសាងបណ្តាញផ្លូវហោះហើរអន្តរជាតិរបស់ខ្លួនឡើងវិញ ខណៈដែលក្រុមហ៊ុនអាកាសចរណ៍ Emirates តភ្ជាប់ផ្លូវហោះហើររបស់ខ្លួនឡើងវិញ ជាមួយរាជធានី របស់ព្រះរាជាណាចក្រកម្ពុជា។ នេះជាដំណឹងដ៏ល្អសម្រាប់អ្នកដំណើរដែលនឹងមានជម្រើសក្នុងការធ្វើដំណើរក្នុង និងក្រៅប្រទេសកាន់តែច្រើន ដែលធ្វើឲ្យប្រសើរឡើងនូវបទពិសោធធ្វើដំណើររបស់ពួកគេបន្ថែមទៀត»។
 

នៅប្រទេសសិង្ហបុរី សេវាកម្មបន្ថែមថ្មីនេះ ត្រូវបានប្រារព្ធឡើងនៅក្នុងកន្លែងសម្រាកក្នុងអាកាសយានដ្ឋាន ដោយមានពិធីកាត់នំខេក នៅចំពោះមុខ លោក Jamal Abdulla Mohammed Bin Abdulwahab AlSuwaidi, ឯកអគ្គរដ្ឋទូតសហព័ន្ធ​អារ៉ាប់រួមប្រចាំប្រទេសសិង្ហបុរី, លោក វី សាមឌី លេខាទីមួយស្ថានទូតកម្ពុជា ប្រចាំប្រទេសសិង្ហបុរី, លោក Steven Ler ប្រធានសមាគមជាតិនៃភ្នាក់ងារទេសចរណ៍សិង្ហបុរី (NATAS) ។ 

ជើងហោះហើរប្រចាំថ្ងៃរបស់ Emirates EK348 ចាកចេញពីទីក្រុងឌូបៃ នៅម៉ោង ០២:៣០ ហើយមកដល់សិង្ហបុរី នៅម៉ោង ១៤:០៥។ បន្ទាប់​មក​ជើង​ហោះ​ហើរ​ចេញ​ដំណើរ​ពី​សិង្ហបុរី​នៅ​ម៉ោង ១៥:៣៥ និង​មក​ដល់​ភ្នំពេញ ​នៅ​ម៉ោង ១៦:៣៥។ ជើងហោះហើរ EK349 ត្រលប់មកវិញរបស់ Emirates ចាកចេញ ពីភ្នំពេញនៅម៉ោង ២០:៥០ ហើយមកដល់សិង្ហបុរី នៅម៉ោង ២៣:៥០។ បន្ទាប់​មក​ជើង​ហោះ​ហើរ​ចេញ​ដំណើរ​ពី​សិង្ហបុរី​ នៅ​ម៉ោង ០១:៤០ ថ្ងៃ​បន្ទាប់​ មក​ដល់​ទីក្រុង​ឌូបៃ​នៅ​ម៉ោង ០៤:៥៥ ដែលពេលវេលាទាំងអស់ គឺក្នុងស្រុក។

 

ក្នុងរយៈពេល ២ ឆ្នាំចុងក្រោយនេះ ក្រុមហ៊ុន Emirates SkyCargo បានដឹកជញ្ជូនទំនិញ ២.៤២០ តោនទៅកាន់ និងពីទីក្រុងភ្នំពេញ តាមរយៈផ្លូវគោក និងភាពជាដៃគូអន្តរបណ្តាញដោយ​ផ្តល់នូវការតភ្ជាប់តាមរយៈប្រទេសថៃ និងម៉ាឡេស៊ីទៅកាន់បណ្តាញសកលដ៏ធំរបស់ក្រុមហ៊ុនអាកាសចរណ៍។ ជាមួយនឹងការបើកដំណើរការជើងហោះហើរប្រចាំថ្ងៃ ក្រុមហ៊ុន Emirates SkyCargo នឹងសម្រួលប្រតិបត្តិការ និងពង្រឹងទំនាក់ទំនងពាណិជ្ជកម្មរវាងក​ម្ពុជា និងពិភពលោកកាន់តែទូលំទូលាយ ជាមួយនឹងសមត្ថភាពដែលអាចផ្ទុកបាន ៣០០ តោនក្នុងមួយសប្តាហ៍ទៅកាន់ទីផ្សារសំខាន់ៗ ដូចជា អារ៉ាប់រួម សហរដ្ឋអាមេរិក កាណាដា ហូឡង់ និងចក្រភពអង់គ្លេស។