សម្ដេច ឃួន សុដារី បានជួបពិភាក្សាជាមួយ លោកស្រី ភីង អ៊ែម កីតនីកូន (Ping M. Kitnikone)កាលពីថ្ងៃទី១៣ឧសភា​ នៅវិមានរដ្ឋសភា ដោយបានវាយតម្លៃខ្ពស់ចំពោះទំនាក់ទំនង​ និងមិត្តភាពដ៏ល្អរវាងកម្ពុជា​ និងកាណាដា ទោះបីប្រទេសទាំងពីរនៅឆ្ងាយពីគ្នាក្តី ។ ប្រទេសទាំងពីរបានភ្ជាប់ការទូតជាមួយគ្នាតាំងពីឆ្នាំ១៩៥២មក។ សម្ដេច សុដារី បានលើកពីទំនាក់ទំនង កម្ពុជា-កាណាដា ចាប់តាំងពីក្រោយរបបកម្ពុជាប្រជាធិបតេយ្យបានដួលរលំ ដល់មានទំនាក់ទំនងការទូតផ្លូវការរវាងប្រទេសទាំងពីរ ឡើងវិញនៅឆ្នាំ១៩៩៣។ 

 

ប្រធានរដ្ឋសភាបានចាត់ទុកប្រទេសកាណាដា ជាតួអង្គសំខាន់ ក្នុងការរួមចំណែកដល់ដំណើរការកសាងសន្តិភាព និងអភិវឌ្ឍន៍សេដ្ឋកិច្ច សង្គម របស់កម្ពុជា ដែលក្នុងនោះជំនួយគាំទ្រទាំងផ្នែកបច្ចេកទេស​ និងហិរញ្ញវត្ថុ។ លើសពីនេះ សម្ដេច មើលឃើញថា កាណាដា ក៏បានចូលរួមស្តារ និងអភិវឌ្ឍន៍កម្ពុជា រួមមានវិស័យពាណិជ្ជកម្ម វិនិយោគ បោសសំអាតមីន កងកម្លាំងរក្សាសន្តិភាព បណ្តុះបណ្តាលវិជ្ជាជីវៈ និងជំនួយមនុស្សធម៌ផ្សេងៗជាច្រើនទៀត។ ហេតុនេះ ទើបសម្តេចបានស្នើដល់ ប្រទេសកាណាដាបន្តគាំទ្រដល់កម្ពុជា ដើម្បីសម្រេចបានគោលដៅ «កម្ពុជាគ្មានមីន» ត្រឹមឆ្នាំ២០២៥។

 

ទន្ទឹមនឹងនេះ ភាគីកាណាដា បានស្នើដល់កម្ពុជាបន្តគាំទ្រដល់កិច្ចសហប្រតិបត្តិការជាយុទ្ធសាស្រ្ត រវាងកាណាដា​ និងអាស៊ានដែរ។ ចំណែកប្រធានរដ្ឋសភា បានស្នើដល់លោកស្រី ឯកអគ្គរាជទូតវិញ ឱ្យជួយបន្តយកចិត្តទុកដាក់លើកកម្ពស់ទំនាក់ទំនង​ និងកិច្ចសហប្រតិបត្តិការរវាងរដ្ឋសភាប្រទេសទាំងពីរ ឱ្យបានគ្រប់ជ្រុងជ្រោយឡើង។ 

 

កិច្ចសហប្រតិបត្តិការទាំងទ្វេភាគី​ និងពហុភាគី ជាកត្តាសំខាន់ ដើម្បីលើកកម្ពស់ប្រព័ន្ធពហុភាគីនិយម ការពារសុខសន្តិភាព ស្ថិរភាពជូនប្រជាពលរដ្ឋ ក្នុងបរិបទសកលលោក ដែលកំពុងប្រឈមជាមួយបញ្ហាស្មុគស្មាញលើភូមិសាស្រ្ត​នយោបាយ សង្រ្គាម រួមនឹងការប្រែប្រួលអាកាសធាតុ ជាដើម។ បើតាមប្រធានសភា នាពេលបច្ចុប្បន្ន មានប្រជាពលរដ្ឋខ្មែរ សញ្ជាតិកាណាដាជាង ៤សែននាក់ កំពុងរស់នៅកាណាដា​ និងបានចូលរួមចំណែកជាធនធានសំខាន់នៅក្នុងការអភិវឌ្ឍប្រទេសកម្ពុជា៕