Spurs ធ្វើឱ្យ Arsenal ខកចិត្ត ក្រោយរបូត៣ពិន្ទុទៅលើគូប្រជែង Man City នៅជំនួបលីគសប្តាហ៍ទី៣៧ នៅយប់ថ្ងៃទី១៤ ខែឧសភា។ ក្រុមម្ចាស់ការពារជើងឯក កើន៨៨ពិន្ទុ ត្រឡប់ទៅឈរកំពូលតារាងលីគកំពូលអង់គ្លេសវិញ ដោយនាំមុខ កាំភ្លើងធំ២ពិន្ទុ។
 

ការប្រជែងពាន Premier League រដូវកាល ២០២៣-២៤ រវាងក្រុមមេឃខៀវ និងកាំភ្លើងធំ នឹងត្រូវកាត់ក្តីនៅជំនួបចុងក្រោយ។ ជំនួបបិទរដូវកាល Man City ទទួល West Ham ស្របពេល Arsenal ស្វាគមន៍ Everton ដែលនឹងធ្វើឡើងនៅ ថ្ងៃទី១៩ ខែឧសភា វេលាម៉ោង ១០ យប់ [ម៉ោងនៅកម្ពុជា]។
 

ជ័យជម្នះរបស់ Man City លើក្រុម Spurs នៅជំនួបសប្តាហ៍ទី៣៧នេះ មិនត្រឹមជួយក្រុមលោក Pep Guardiola មានប្រៀបជាងក្រុមលោក Mikel Arteta សម្រាប់ការប្រជែងជើងឯកលីគកំពូលអង់គ្លេសប៉ុណ្តោះទេ ប៉ុន្តែថែមទាំងជួយ Aston Villa ទទួលបានកៅអីក្របខណ្ឌកំពូលអឺរ៉ុបនៅរដូវកាលក្រោយ និងជាលើកដំបូងក្រោយបាត់មុខ៤២ឆ្នាំ។
 

Aston Viila បញ្ចប់ក្នុងចំណាត់ថ្នាក់ទី៤ មាន៦៨ពិន្ទុ នាំមុខក្រុមលេខ ៥ Spurs ចំនួន៥ពិន្ទុ ខណៈនៅសល់១ប្រកួតចុងក្រោយដូចគ្នា។ ក្រុមដែលដឹកនាំដោយលោក Unai Emery បង្ហាញខ្លួនចុងក្រោយនៅពានកំពូលអឺរ៉ុប នៅរដូវកាល ១៩៨១-៨២។ Aston ក៏ធ្លាប់ជាម្ចាស់ជើងឯកក្របខណ្ឌកំពូលអឺរ៉ុប ១សម័យកាលផងដែរ ក្នុងឆ្នាំ ១៩៨១-៨២ ដោយកាលនោះពានរង្វាន់មានឈ្មោះថា European Cup។
 

ចំណែក Spurs នៅមិនទាន់ប្រាកដថាទទួលបានកៅអី Europa League នៅឡើយទេ ដោយត្រូវប្រជែងជាមួយ Newcastle United និង Chelsea។ មាន់ខ្នាយមាសមាន៦៣ពិន្ទុ ស្របពេល Newcastle United និង Chelsea ដែលសល់១ប្រកួតក្នុងដៃ មាន៥៧ពិន្ទុដូចគ្នា ហើយមានសំណល់គ្រាប់បាល់ល្អជាង Spurs៕