លក្ខណៈជីវសាស្រ្តរបស់សត្វដំរី ច្រើនរស់នៅតាមព្រៃល្បោះ វាលស្មៅ ព្រៃឫស្សី ព្រៃជាំទឹក តាមដងអូរ ព្រៃពាក់កណ្តាលស្រោង និងព្រៃស្រោង។ ដំរីស៊ីសំបកឈើ ស្លឹកឈើ មើមឈើ ឫសឈើខ្ចីៗ ទំពាំង ឫស្សី ផ្តៅនិង វល្លិ៍ជាដើម។ ចំពោះការចិញ្ចឹមក្នុងសួនសត្វ ដំរីអាចស៊ីផ្លែឈើ អំពៅ ចេក។ ដំរីផឹកទឹករហូតដល់ ២០០លីត្រ ក្នុងមួយថ្ងៃ។ ដំរីច្រើនផ្តល់កំណើតកូន ក្នុងខែកក្កដា-សីហា ដោយកូនម្តងបាន១ក្បាល ឬ២ក្បាល បន្ទាប់ពីពពោះរយៈពេល២១ ឬយ៉ាងយូរ២៥ខែ។  ដំរីមេអាចបន្តពូជបាននៅអាយុ ១៥-១៦ ឆ្នាំ ហើយអាចមានកូនរហូតដល់អាយុ ៥០-៧០ឆ្នាំ និងអាចបង្កើតកូនបាន៤ ឬ ៥ដង។ គេអាចសម្គាល់ដំរីឈ្មោលចុះប្រេងនៅពេលដែលគេឃើញមានសារធាតុរាវម្យ៉ាងហូរចេញពីរន្ឋមួយនៅចន្លោះត្រចៀក និងភ្នែកដែលជាទូទៅនៅចន្លោះខែវិច្ឆិកា-ធ្នូ។
 

សូមជម្រាបថា បច្ចុប្បន្ន ឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ» មានសត្វដំរីចំនួន៤ក្បាល ក្នុងនោះញី២ក្បាល។ ដំរីញីមួយក្បាល ឈ្មោះឡាក់គី អាយុ២៥ឆ្នាំ និងមួយក្បាលទៀតឈ្មោះចំរើន មានអាយុ៣៥ឆ្នាំ និងឈ្មោល២ក្បាល ឈ្មោះឈូកអាយុ១៨ឆ្នាំ និងសាគរ អាយុ៣២ឆ្នាំ៕