អន្តរជាតិ
ឧបនាយករដ្ឋមន្ត្រីរុស្ស៊ី លោក Andrei Belousov (កណ្តាល) រង់ចាំចូលរួមក្នុងពិធីចូលកាន់ដំណែងរបស់ លោក Vladimir Putinជាប្រធានាធិបតីរុស្ស៊ី នៅវិមានក្រឹមឡាំង ក្នុងទីក្រុងម៉ូស្គូ កាលពីថ្ងៃទី៧ ខែឧសភា ឆ្នាំ២០២៤។
×![]()
ដោយ: VOA
ប្រធានាធិបតីរុស្ស៊ី លោក Vladimir Putin (វ្ល៉ាឌីមៀ ពូទីន) បានរុះរើរដ្ឋាភិបាលរបស់លោកកាលពីពេលថ្មីៗនេះ ដោយតែងតាំងលោក Andrei Belousov ដែលជាសេដ្ឋវិទូដែលបានកាន់តំណែងជាឧបនាយករដ្ឋមន្ត្រី ទីមួយរបស់រុស្ស៊ីនោះ ឱ្យជំនួសលោក Sergei Shoigu ជារដ្ឋមន្ត្រីការពារជាតិ។ លោក Shoigu ដែលជាសមាជិកគណៈរដ្ឋមន្ត្រីតែមួយគត់ដែលត្រូវបានលោក Putin ដេកចេញនោះ ត្រូវបានតែងតាំងជាលេខាធិការនៃក្រុមប្រឹក្សាសន្តិសុខរបស់ប្រទេសរុស្ស៊ី ដែលជាស្ថាប័នប្រឹក្សាវិមានក្រឹមឡាំងដ៏មានឥទ្ធិពល ជំនួសលោក Nikolai Patrushev ដែលជាសហការីរបស់លោក Putin យូរមកហើយ។
ដូចប្រធានាធិបតី Putinដែរ លោក Patrushev ធ្លាប់ដឹកនាំសេវាសន្តិសុខសហព័ន្ធ ដែលជាទីភ្នាក់ងារស្នងការងាររបស់ KGB សូវៀត។
គណៈរដ្ឋមន្ត្រីទាំងមូលបានលាលែងពីតំណែងក្រោយការចូលកាន់តំណែងប្រធានាធិបតីអាណត្តិទី៥កាលពីថ្ងៃទី ៧ ខែឧសភារបស់លោក Putin។
ក្រុមប្រឹក្សាសហព័ន្ធ ដែលជាសភាជាន់ខ្ពស់នៃសភារុស្ស៊ី ត្រូវតែអនុម័តការជ្រើសរើសរបស់លោក Putin តែងតាំងលោក Belousov ជាប្រធានក្រុមប្រឹក្សានេះដែលជាគ្រាន់តែជាបែបបទបង្គ្រប់កិច្ចនូវអ្វីដែលមានលក្ខណៈប្រាកដប្រជារួចទៅហើយ។
VOA ភាសារុស្ស៊ីបាននិយាយជាមួយអ្នកជំនាញចំនួនបីនាក់ ដែលពួកគេទាំងអស់បានយល់ថា ការតែងតាំងលោក Belousov បង្ហាញថា លោក Putin កំពុងរៀបចំប្រទេសសម្រាប់សង្រ្គាមដ៏រ៉ាំរ៉ៃប្រឆាំងនឹងអ៊ុយក្រែន។
លោក Richard Weitz ដែលជាអ្នកស្រាវជ្រាវជាន់ខ្ពស់ និងជានាយកមជ្ឈមណ្ឌលវិភាគនយោបាយ-យោធានៅវិទ្យាស្ថាន Hudson បានកត់សម្គាល់ថា មានការរំពឹងទុកមួយរយៈហើយថា លោក Shoigu ដែលបានបម្រើការជារដ្ឋមន្ត្រីការពារជាតិអស់រយៈពេល ១២ ឆ្នាំមកហើយនេះ ត្រូវបានគ្រោងដកចេញពីមុខតំណែងនេះ។
លោក Weitz បានប្រាប់ VOA ថា៖ «មានការព្រួយបារម្ភខ្លះៗអំពីល្បឿននៃកំណែទម្រង់យោធានៅក្រោមការដឹកនាំរបស់គាត់ ហើយបន្ទាប់មានប្រតិបត្តិការយោធារុស្ស៊ីដ៏អន់ក្នុងពេលប៉ុន្មានខែដំបូងនៃសង្គ្រាមនៅអ៊ុយក្រែន ហើយនឹងការបះបោរកាលពីឆ្នាំមុនដោយលោក Yevgeny Prigozhin ហើយក្រុមទាហាន Wagner ត្រូវបានដឹកនាំជាចម្បងដោយលោក Shoigu និង Valery Gerasimov ដែលជាប្រមុខមន្ត្រីយោធា»។
លោកថ្លែងថា៖ «ខ្ញុំគិតថា លោក Putin បានសម្រេចចិត្តដូច្នេះ នៅដំណាក់កាលនេះនៃជម្លោះនេះ ហើយឥឡូវនេះជាពេលដែលយោធារុស្ស៊ីកំពុងប្រតិបត្តិការបានល្អ។ ប៉ុន្តែវាច្បាស់ណាស់ថា សង្រ្គាមនឹងមានរយៈពេលជាច្រើនឆ្នាំ។ ជាក់ស្តែងគាត់ចង់តែងតាំងអ្នកដែលដឹងច្រើនជាងអំពីសេដ្ឋកិច្ច។ វាសមហេតុផល- ប្រសិនបើវានឹងទៅជាសង្រ្គាមដ៏យូរ អ្នកនឹងត្រូវប្រមូលធនធានគ្រប់គ្រាន់ដើម្បីទ្រទ្រង់វា»។
លោក Mykola Sunhurovskyi នាយកកម្មវិធីយោធានៅមជ្ឈមណ្ឌល Razumkov ដែលជាក្រុមអ្នកស្រាវជ្រាវដែលមានមូលដ្ឋាននៅទីក្រុង Kyiv ប្រទេសអ៊ុយក្រែន បាននិយាយថា រឿងអាស្រូវថ្មីៗនេះពាក់ព័ន្ធនឹងអនុប្រធានរបស់ លោក Shogiu គឺលោក Timur Ivanov ដែលត្រូវបានចោទប្រកាន់ថា បានទទួលសំណូកចំនួន១២ លានដុល្លារនោះ ប្រហែលជាកត្តាសំខាន់ក្នុងការដកតំណែងលោក Shoigu។ ប៉ុន្តែលោកបានយល់ស្របថា ការផ្លាស់ប្តូរនេះទាក់ទងជាចម្បងទៅនឹងការព្យាកររបស់លោក Putin ដែលថា សង្រ្គាមជាមួយអ៊ុយក្រែននឹងមានរយៈពេលយូរ ហើយនឹងការអំពាវនាវស្របគ្នារបស់លោកថា សង្គ្រាមរុស្ស៊ីពឹងលើសេដ្ឋកិច្ច។
លោក Sungursky បានប្រាប់ VOA ថា៖ «ជាទូទៅលោក Shoigu មិនអាចមានសមត្ថភាពបែបនេះទេ។ គាត់មិនមែនជាទាហានទេ។ គាត់មិនមែនជាសេដ្ឋវិទូទេ។ គាត់មិនមែនជាអ្នកឧស្សាហកម្មទេ។ ប៉ុន្តែលោក Belousov គឺជាបុរសម្នាក់ដែលបានធ្វើការជាយូរមកហើយនៅក្នុងប្លុកសេដ្ឋកិច្ចនៃប្រទេសរុស្ស៊ី។ គាត់មានឫសគល់នៅក្នុងវិទ្យាស្ថានសេដ្ឋកិច្ច និងគណិតវិទ្យាមជ្ឈិម ដែលធ្លាប់ជាស្ថាប័នឈានមុខគេដែលបង្កើតស្តង់ដារថ្មីសម្រាប់សេដ្ឋកិច្ចរុស្ស៊ី ចាប់តាំងពីពាក់កណ្ដាលទសវត្សរ៍១៩៧០។ គាត់បានធ្វើការនៅទីនោះនៅអំឡុងពាក់កណ្តាលទសវត្សរ៍១៩៨០មានមុខតំណែងជាន់ខ្ពស់ ... [ហើយ] ម្តងនោះលោកជាជំនួយការរបស់លោក Putin »។
ដូចគ្នានេះដែរ អ្នកវិភាគយោធាអ៊ុយក្រែន លោក Alexei Getman បានប្រាប់ VOA ថា ការផ្លាស់ប្តូរលោក Shoigu គឺដោយសារតែប្រទេសរុស្ស៊ី«កំពុងរៀបចំសម្រាប់សង្រ្គាមដ៏យូរមួយ» ហើយដូច្នេះត្រូវការរដ្ឋមន្ត្រីការពារជាតិថ្មីដែលអាចរៀបចំសេដ្ឋកិច្ចរបស់ប្រទេសស្របតាមសភាពការណ៍។
ទោះយ៉ាងណា លោក Getman បាននិយាយថា ការដកលោក Shoigu មិនគួរត្រូវបានគេមើលឃើញថា ជាការទម្លាក់តំណែង ឬការដាក់ទណ្ឌកម្មទេ។
លោកបាននិយាយថា៖ «និយាយរួមគាត់មិនត្រូវបានបញ្ជូនទៅកន្លែងសម្រាកសមរម្យ ឬជាប់គុក ដូចករណីជាញឹកញាប់នៅក្នុងប្រទេសរុស្ស៊ីនោះទេ។ គាត់បានក្លាយជាលេខាធិការនៃក្រុមប្រឹក្សាសន្តិសុខនៃសហព័ន្ធរុស្ស៊ីជំនួសលោក Patrushev»។
© រក្សាសិទ្ធិដោយ thmeythmey.com
