ជាតិ
សេដ្ឋកិច្ច
ADB៖ សេដ្ឋកិច្ចកម្ពុជានឹងកើនពី៧.៣ភាគរយនៅឆ្នាំនេះដល់៧.៥ភាគរយនៅឆ្នាំក្រោយ
×
ធនាគារអភិវឌ្ឍន៍អាស៊ី ADB បានព្យាការណ៍ថា ផលិតផលក្នុងស្រុកសរុបរបស់កម្ពុជា នឹងកើនឡើងពី៧ភាគរយនៅឆ្នាំ២០១៤ រហូតដល់៧.៣ភាគរយនៅឆ្នាំ២០១៥ ហើយនឹងបន្តកើនឡើងរហូតដល់៧.៥ភាគរយនៅឆ្នាំ២០១៦ ។ នេះបើយោងតាម របាយការណ៍ពិសេសប្រចាំឆ្នាំរបស់ខ្លួន ស្តីពីទស្សនវិស័យអភិវឌ្ឍន៍អាស៊ី២០១៥ (ADO) ។
របាយការណ៍ថ្មីដែលបានចេញ ផ្សាយនៅថ្ងៃទី ២៤មីនានេះ បានបង្ហាញថា ការបន្តកើនឡើងដ៏ខ្ពស់នៃ សេដ្ឋកិច្ចរបស់កម្ពុជា នេះគឺដោយសារតែភាពកាន់តែរឹងមាំ នៃដំណើការសេដ្ឋកិច្ចរបស់ដៃគូពាណិជ្ជកម្ម ភាពធូរស្រាលនៃស្ថានភាពនយោបាយ ទីផ្សារពលកកម្មក្នុងស្រុក និងការធ្លាក់ចុះនៃតម្លៃប្រេងឥន្ធនៈ។
លោក Eric Sidgwick នាយកADBប្រចាំនៅកម្ពុជា បានមានប្រសាសន៍នៅក្នុងសន្និសីទសារព័ត៌មាននៅថ្ងៃនេះថា៖«ដោយសារភាពកាន់តែរឹងមាំនៃសេដ្ឋកិច្ចពិភពលោក និងការគ្រប់គ្រងម៉ាក្រូសេដ្ឋកិច្ចប្រកបដោយការប្រុងប្រយ័ត្ន ការព្យាករណ៍កំណើនសេដ្ឋកិច្ចរបស់ប្រទេសកម្ពុជា នៅតែមានភាពល្អប្រសើរសម្រា់បរយៈពេល២ឆ្នាំបន្ទាប់។
លោក បានបន្តថា៖« ការរីកចម្រើននៃវិស័យឧហស្សាហកម្ម កសិកម្ម សំណង់ និងពិសេសវិស័យទេសចរណ៍ក៏ជាផ្នែកមួយនៃកំណើនសេដ្ឋកិច្ចនៅកម្ពុជាដែរក្នុងនោះ។ ជាមួយគ្នានោះ វិស័យកាត់ដេរ ដែលជាតម្រូវការនៅលើទីផ្សារអន្តរជាតិ ក៏នឹងផ្តល់អត្ថប្រយោជន៍ច្រើនដែរសម្រាប់កំណើនសេដ្ឋកិច្ចរបស់កម្ពុជានៅឆ្នាំនេះ។
បើទោះបីជាការព្យាករណ៍ បានបង្ហាញថាសេដ្ឋកិច្ចកម្ពុជា នឹងបន្តកើនឡើងក៏ដោយ លោក Eric Sidgwick ក៏បានបញ្ជាក់ផងដែរថា កម្ពុជាត្រូវបន្តពង្រីកមូលដ្ឋានសេដ្ឋកិច្ចរបស់ខ្លួន និងធ្វើពិពិធកម្មប្រភពកំណើន ដើម្បីគាំទ្រដល់កំណើនសម្រាប់ទាំងអស់គ្នា និងកំណើនដែលមាននិរន្តរភាព» ។
បើយោងតាមរបាយការណ៍ដដែល ក្នុងឆ្នាំ២០១៤ អតិផរណាមានកម្រិត៣.៩ភាគរយ ហើយADB រំពឹងថា វានឹងធ្លាក់ចុះមកត្រឹម១.៦ភាគរយនៅឆ្នាំ២០១៥នេះ ដោយសារតែតម្លៃប្រេងឥន្ធនៈធ្លាក់ចុះ ។ អតិផរណា នឹងកើនឡើងដល់២.៧ភាគវិញក្នុងឆ្នាំ២០១៦ ។
តែទោះបីជាយ៉ាងណាក៏ដោយ កម្ពុជាក៏មានការប្រឈមមួយទៀតដែរ គឺកំណើនឥណទានរបស់ធនា គារ។ ឥណទានសម្រាប់វិស័យនឯកជន បានកើនឡើងជាមធ្យមចំនួន២៧.៣ភាគរយ ក្នុងចន្លោះឆ្នាំ២០១០-២០១៣ និងបានកើនឡើងដល់៣១.៣ភាគរយនៅឆ្នាំ២០១៤ (ដោយផ្អែកលើកំណើននៃផលធៀបឥណទាន ទៅនឹងGDPពី៤៥ភាគរយ ក្នុងឆ្នាំ២០១៣ រហូតដល់៥៤.៦ភាគរយក្នុងឆ្នាំ២០១៤) ដែលបង្ហាញពីលទ្ធភាពនៃការកើនឡើងនូវហានិភ័យហិរញ្ញវត្ថុ នៅក្នុងវិស័យធនាគារ។ ការពង្រឹងការការត្រួតពិនិត្យធនាគារ ក្របខ័ណ្ឌនិយ័តកម្ម និងការត្រួតពិនិត្យឲ្យបានដិតដល់ចំពោះការផ្តល់កម្ចីសម្រាប់ការវិនិយោគអចលនទ្រព្យ នឹងជួយឲ្យវិស័យហិរញ្ញវត្ថុមានស្ថេរភាព៕
© រក្សាសិទ្ធិដោយ thmeythmey.com