ជាតិ
សេដ្ឋកិច្ច
×![]()
យុវជនជិត៣០០នាក់ មកពីតាមបណ្តាលអង្គការសង្គមស៊ីវិល និងតាមសាកលវិទ្យាល័យនានានៅក្នុង រាជធានីភ្នំពេញ បានពិភាក្សានិងលើកឡើងនូវក្តីកង្វល់នានារបស់ពួកគេ នៅពេលដែលសហគមន៍សេដ្ឋកិច្ចអាស៊ាននឹងចូលមកដល់នៅចុងឆ្នាំ២០១៥នេះ។បញ្ហាធំៗចំនួន៥ ដែលយុវជនទាំងនោះបានជជែកពិភាក្សាគ្នា ក្នុងវេទិកាយុវជនកម្ពុជាស្តីពី «អនាគតរបស់យុវជនកម្ពុជា នៅក្នុងសមាហរណកម្មសេដ្ឋកិច្ចអាស៊ាន ឆ្នាំ២០១៥» នៅភោជនីយដ្ឋានទន្លេបាសាក់២ នៅព្រឹកថ្ងៃអាទិត្យនេះ។
បញ្ហាធំៗទាំង៥នោះរួមមាន ទី១ បញ្ហាការអប់រំ៖ ខ្វះធនធានគ្រូបង្រៀនដែលមានវិជ្ជាជីវៈ និងការទទួលខុសត្រូវ ខ្វះចំណេះដឹងផ្នែកបច្ចេកវិទ្យា ខ្វះឯកសារស្រាវជ្រាវ និងសម្ភារសិក្សា សញ្ញាបត្រនៅតាមសាកលវិទ្យាល័យភាគច្រើនក្នុងប្រទេសកម្ពុជា មិនត្រូវបានប្រទេសជាសមាជិកអាស៊ានភាគច្រើនទទួលស្គាល់និងបញ្ហាប្រាក់ខែគ្រូបង្រៀនផងដែរ។
ទី២ បញ្ហាការងារ និងការចំណាក់ស្រុក៖ និស្សិតរៀនចប់ភាគច្រើនខ្វះការងារធ្វើ និងនិស្សិតដែលមានការងារធ្វើមួយចំនួនទៀត គឺធ្វើការងារដោយខុសជំនាញរបស់ពួកគេ។ យុវជនដែលធ្វើការចំណាក់ស្រុកទៅក្រៅប្រទេសភាគច្រើនត្រូវចាញ់បោកមេខ្យល់ ត្រូវថៅកែមើលងាយធ្វើបាប កន្លែងស្នាក់នៅ និងការទទួលទានមិនមានផាសុខភាពល្អ ហើយយុវជនទាំងនោះភាគច្រើនទៅធ្វើការដោយខុសច្បាប់។
ទី៣ បញ្ហាដីធ្លី និងធនធានធម្មជាតិ៖ មានករកាប់បំផ្លាញព្រៃឈើ ការបរបាញ់សត្វព្រៃ ការនេសាទខុសច្បាប់ និងការទាញយកធនធានរ៉ែ ប្រេងកាតដោយខុសច្បាប់ជាលក្ខណៈបុគ្គល និងក្រុមហ៊ុន។
ទី៤ បញ្ហាអំពើពុករលួយ៖ មានអំពើពុករលួយចំនួនដូចជាក្នុងវិស័យអប់រំ ការយកប្រាក់ពីសិស្សក្នុងម៉ោងសិក្សា បង្ខំឲ្យសិស្សរៀនគួរ នាំឲ្យគុណភាពអប់រំធ្លាក់ចុះ។ មានការសូកប៉ាន់ក្នុងស្ថាប័នពន្ធដារ ឬការនាំចូលគេចពន្ធ ការបំប៉ោងទិន្នន័យក្នុងចំណូល ចំណាយ និងចំនួនបុគ្គលិករដ្ឋទៀតផង។
និងទី៥ បញ្ហាយុវជន និងសេរីភាពនៃការបញ្ចេញមតិរបស់យុវជន៖ មានការគំរាមកំហែងពីអាជ្ញាធ និងអ្នកបញ្ហានយោបាយ ប្រព័ន្ធផ្សព្វផ្សាយមួយចំនួនមានលក្ខណៈលំអៀងមិនឯករាជ្យ និងការយល់ដឹងពីសិទ្ធិក្នុងការទទួលបានព័ត៌មាននៅមានកម្រិតជាដើម។
កំពុងអង្គុយពិភាក្សាក្រុមជាមួយនឹងនិស្សិតដទៃទៀត និស្សិត ឆាំង ម៉ារុង និស្សិតឆ្នាំទី៣ ជំនាញ សង្គមវិទ្យា នៃសាកលវិទ្យាល័យភូមិន្ទភ្នំពេញ បាននិយាយថា បញ្ហាដែលនាងកំពុងបារម្ភ គឺការប្រើ ប្រាស់ភាសាអង់គ្លេសជាមួយនឹងយុវជនក្នុងប្រទេសជាសមាជិកអាស៊ានដទៃទៀត។
នារីរូបនេះនិយាយថា៖«យើងដើរមិនទាន់គុណភាពអប់រំរបស់ប្រទេសក្នុងតំបន់ទេ ប្រសិនជាយើងរៀន ចប់ថ្នាក់បរិញ្ញាបត្រនៅកម្ពុជា បើចង់ទៅរៀននៅប្រទេសជាសមាជិកអាស៊ានមួយចំនួនទៀត គឺត្រូវតែ រៀនឆ្នាំទីមួយឡើងវិញ»។
ជាមួយគ្នានេះដែរ លោក ឌី សុភា និស្សិតឆ្នាំទី៤ ជំនាញគ្រប់គ្រង នៃសាកលវិទ្យាល័យជាតិគ្រប់គ្រង បាននិយាយថា លោកមានបញ្ហាប្រឈមនឹងឱកាសការងារ នាសមាហរណកម្មឆ្នាំ២០១៥ខាងមុខ។
លោកថា៖«ប្រឈមសម្រាប់ខ្ញុំ គឺប្រជាពលរដ្ឋរបស់ប្រទេសជាសមាជិកអាស៊ានដទៃមកដណ្តើម ការងារដែលមានតួនាទីធំៗរបស់ខ្ញុំ ក៏ដូចជានិស្សតដទៃទៀត ហើយនិស្សិតកម្ពុជាយើងភាគច្រើន បានត្រឹមតែធ្វើការងារតូចតាចជាកូនចៅគេដដែល»៕
© រក្សាសិទ្ធិដោយ thmeythmey.com
