ជាតិ
បទវិភាគ
នយោបាយជាតិ
×![]()
ដោយ: លីម តុលា
ភ្នំពេញ៖ គណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិបានឯកភាពជ្រើសរើសលោក ហង្ស ពុទ្ធា ជាបេក្ខជនទី៩សម្រាប់ គជប ថ្មី ក្រោយពេលដែលលោកស្រី ពុង ឈីវកេក បដិសេធតំណែងដ៏ចម្រូងចម្រាសមួយនេះ។ លោក ហង្ស ពុទ្ធា នាយកប្រតិបត្តិនៃអង្គការសង្កេតការណ៍បោះឆ្នោត និកហ្វិក ដែលមានលោកស្រី ពុង ឈីវ កេក ជាប្រធានអង្គការលីកាដូ ជាប្រធានគណៈកម្មាធិការនាយកនៃអង្គការនិកហ្វិក អាចនឹងទទួលយកតំណែងថ្មីនេះ។ ប៉ុន្តែ មតិមហាជនអាចគាំទ្រតិចជាងលោកស្រី ពុង ឈីវកេក។
កាលពីប៉ុន្មានថ្ងៃមុន លោកស្រី ពុង ឈីវកេក ពិបាកចិត្តខ្លាំងមែនទែន។ ពីព្រោះប្រទេសជាតិបានប្រគល់កិច្ចការដ៏ធំសម្បើមមួយសម្រាប់លោកស្រី គឺបេក្ខភាពទី៩នៃសមាសភាព គជប ដែលមានចំនួន៩នាក់។
៤នាក់ចេញពីគណបក្សនយោបាយនីមួយៗ គឺគណបក្សប្រជាជកម្ពុជា និងគណបក្សសង្គ្រោះជាតិដែលមានអាសនៈនៅរដ្ឋសភាជាតិ។ គណបក្សនយោបាយតូចៗផ្សេងទៀតគ្មានសិទ្ធិមានសមាសភាពរបស់ខ្លួននៅក្នុង គបជ ថ្មីឡើយ។
ក្រោយពីមានភាពចម្រូងចម្រាសផ្នែកសតិអារម្មណ៍ដោយអ្នកខ្លះគាំទ្របេក្ខភាព អ្នកខ្លះប្រឆាំង បេក្ខភាពលោកស្រី និងដោយក្តីបារម្ភផ្សេងៗផងនោះ លោកស្រី ពុង ឈីវ កេក ដែលធ្លាប់ជាអ្នកចូលរួមចំណែកបង្កើតអោយមានកិច្ចព្រមព្រៀងទីក្រុងប៉ារីសផងនោះ បានសម្រេចចិត្តបោះបង់ចោលតំណែងទី៩នេះចោលតែម្តង។ បច្ចុប្បន្ន អារម្មណ៍របស់លោកស្រី ពុង ឈីវកេក ធូស្រាលបន្តិចក្រោយការសម្រេចិត្តនេះ។
បន្ទាប់ពីលោកស្រី គឺដល់វេនរបស់លោក ហង្ស ពុទ្ធា វិញម្តង។ លោក ហង្ស ពុទ្ធា ដែលជានាយកប្រិតិបត្តិនៃអង្គការសង្កេតការណ៍បោះឆ្នោត និកហ្វិក ដែលមានលោកស្រី ឈីវកេក ជាប្រធានគណៈកម្មាធិការជានាយកនោះ ត្រូវបានគណបក្សប្រជាជនកម្ពុជា និងគណបក្សសង្គ្រោះជាតិ ជ្រើសរើសអោយក្លាយជាសមាជិកទី៩ នៃ គជប ថ្មី។ សម្រាប់លោក ហង្ស ពុទ្ធា លោកមិនទាន់សម្រេចចិត្តនៅឡើយទេ។
មូលហេតុអ្វីបានជាគណបក្សទាំងពីរជ្រើសរើសលោក ហង្ស ពុទ្ធា តែមិនជ្រើសរើសលោក គល់ បញ្ញា នាយកប្រតិបត្តិនៃអង្គការសង្កេតការណ៍បោះឆ្នោត? តើលោក ហង្ស ពុទ្ធា សម្រេចយកតំណែងទី៩នេះឬទេ?
គណបក្សទាំងពីរសម្រេចជ្រើសរើសលោក ហង្ស ពុទ្ធា គឺដោយសារហេតុផលមួយចំនួនក្នុងនោះមាន ទី១ អង្គការនិហ្វិក មានលោកស្រី ពុង ឈីវកេក ជាប្រធានគណៈកម្មាធិការនាយក។ ទី២ លោក ហង្ស ពុទ្ធា មានចំណេះជំនាញទាក់ទងនឹងការបោះឆ្នោតច្រើន និងទី៣ លោកគឺជាបុគ្គលទន់ភ្លន់, រិះគន់គណបក្សនយោបាយនាពេលកន្លងមកជាលក្ខណៈការទូតច្រើនជាងការរិះគន់ចំ។
បក្សទាំងពីរមិនសម្លឹងមើលលោក គល់ បញ្ញា ក៏ព្រោះតែលោក គល់ បញ្ញា គឺជាបុគ្គលរិះគន់ដំណើរការនៃការបោះឆ្នោតនាពេលកន្លងមកចំៗ ឬគេហៅម្យ៉ាងទៀតថា ការរិះគន់មិនសំចៃមាត់។
ងាកមកឆ្លើយនឹងសំណួរដែលសួរថា តើលោក ហង្ស ពុទ្ធា នឹងចូលរួមក្នុងសមរភូមិនយោបាយនេះដែរឬទេនោះ?
គ្មាននរណាម្នាក់ហ៊ានផ្តល់ចម្លើយជំនួសលោកទេ។ ប៉ុន្តែ តាមរយៈទំនាក់ទំនងរវាងលោក ហង្ស ពុទ្ធា និងលោកស្រី ពុង ឈីវកេក គេអាចសន្និដ្ឋានបានថា លោកស្រី ពុង ឈីវកេក ប្រហែលជាបោះបាល់ជូនលោក ហង្ស ពុទ្ធា ជាអ្នកលេងវិញ ពីព្រោះម្យ៉ាង លោក ហង្ស ពុទ្ធា នៅមានវ័យក្មេង និងម្យ៉ាងទៀត លោកស្រីអាចគេចផុតពីការរិះគន់នានាដែលអាចកើតមានឡើងនាពេលអនាគត។ ហេតុផលម្យ៉ាងទៀតដែលលោក ហង្ស ពុទ្ធា អាចសម្រេចចូលរួមដែរនោះ ក៏ដោយសារលោកចង់អោយ គជប ថ្មីមួយដំណើរការក្នុងក្របខណ្ឌតម្លាភាព យុត្តិធម៌។ លោក ហង្ស ពុទ្ធា អាចទទួលយកតំណែងនេះ ប៉ុន្តែ មហាជនទូទៅអាចគាំទ្រលោកតិចជាងលោកស្រី ពុង ឈីវកេក។ ការពិតយ៉ាងណានោះ មានតែលោក ហង្ស ពុទ្ធា ខ្លួនឯងប៉ុណ្ណោះដែលជាអ្នកសម្រេចចិត្ត៕
© រក្សាសិទ្ធិដោយ thmeythmey.com
