ភ្នំពេញ៖ ក្នុងឆ្នាំ២០១៥កន្លងមក កម្ចីពីវិស័យមីក្រូហិរញ្ញវត្ថុបានកើនដល់២,៩ ពាន់លានដុល្លារអាមេរិក ពោលគឺកើនឡើងប្រមាណជា៤៥%បើប្រៀបធៀបទៅនឹងឆ្នាំ២០១៤កន្លងមក។ ចំពោះកំណើននេះ សេដ្ឋវិទូខ្មែរបង្ហាញក្តីព្រួយបារម្ភយ៉ាងខ្លាំង។ តែអ្នកជំនាញធនាគារគិតថា នេះគឺជាសញ្ញាល្អសម្រាប់កំណើនសេដ្ឋកិច្ចជាតិ និងកាត់បន្ថយភាពក្រីក្រទៅវិញ។
ក្នុងរយៈពេលជាង១០ឆ្នាំចុងក្រោយនេះ ប្រទេសកម្ពុជាទទួលបានកំណើនសេដ្ឋកិច្ចជាមធ្យម៧% និងអាចកាត់បន្ថយភាពក្រីក្រឲ្យធ្លាក់ចុះមកនៅប្រមាណជា២០%នៅឆ្នាំ២០១៦នេះ។ ផលិតផលសរុបក្នុងស្រុករបស់កម្ពុជាត្រូវបានគេគិតគូរឃើញថា មានចំនួនជាង១ម៉ឺន ៨ ពាន់លានដុល្លារអាមេរិក ស្របពេលដែលប្រាក់ចំណូលរបស់ប្រជាជនម្នាក់ក្នុងមួយឆ្នាំកើនឡើងដល់ជាង១២០០ដុល្លារអាមេរិក។
កំណើនសេដ្ឋកិច្ចកើនឡើងប្រកដោយស្ថិរភាព ប្រាក់ចំណូលប្រចាំឆ្នាំរបស់ពលរដ្ឋម្នាក់កើនឡើងជាលំដាប់ អត្រាភាពក្រីក្ររបស់ពលរដ្ឋត្រូវបានកាត់បន្ថយមែន តែអ្វីដែលគួរឲ្យកត់សម្គាល់ គឺថា ពលរដ្ឋខ្មែរទទួលកម្ចីកាន់តែច្រើនពីស្ថាប័នមីក្រូហិរញ្ញវត្ថុដែលនាំឲ្យមានក្តីកង្វល់ថា សេដ្ឋកិច្ចកាន់តែកើន តែពលរដ្ឋខ្មែរជំពាក់បំណុលគេកាន់តែខ្ពស់។
របាយការណ៍របស់សមាគមគ្រឹះស្ថានមីក្រូហិរញ្ញវត្ថុកម្ពុជាបានឲ្យដឹងថា គិតត្រឹមឆ្នាំ២០១៥កន្លមក ពលរដ្ឋខ្មែរចំនួន២លាននាក់បានខ្ចីកម្ចីពីស្ថាប័នមីក្រូហិរញ្ញវត្ថុក្នុងចំនួនទឹកប្រាក់២,៩ពាន់លានដុល្លារអាមេរិក ពោលគឺកើនឡើងប្រមាណជា៤៥%បើប្រៀបធៀបទៅនឹងឆ្នាំ២០១៤កន្លងមក។ ប្រជាពលរដ្ឋម្នាក់ខ្ចីក្នុងទំហំទឹកប្រាក់ជាធម្យម១៤៦០ដុល្លារអាមេរិក។
តើចំនួនប្រាក់កម្ចីកើនឡើង និងចំនួនអ្នកខ្ចីកើនឡើង គឺជាកត្តាល្អឬទេសម្រាប
សេដ្ឋកិច្ច? ឬក៏ផ្ទុយទៅវិញ កំណើននេះ គឺជាបញ្ហាសេដ្ឋកិច្ចដែលត្រូវការការចាត់វិធានការណាមួយជាបន្ទាន់?
ចំពោះបញ្ហានេះ អ្នកជំនាញវិស័យធនគារ និងសេដ្ឋវិទូបកស្រាយខុសគ្នា។ លោក អ៊ិន ចាន់នី នាយកប្រតិបត្តិនៃធនាគារអេស៊ីលីដា បានបកស្រាយពន្យល់ថា តាមទ្រឹស្តីសេដ្ឋកិច្ចនិងទិសដៅរបស់ស្ថាប័នមីក្រូហិរញ្ញវត្ថុ ការបង្កើតស្ថាប័នមីក្រូហិរញ្ញវត្ថុ គឺដើម្បីអនុញ្ញាតឲ្យពលរដ្ឋអាចទទួលបានឥណទានក្នុងទិសដៅបង្កើនប្រាក់ចំណូល និងបង្កើតការងារ។
បន្ទាប់មក សកម្មភាពសេដ្ឋកិច្ចតាមរយៈកម្ចីនេះ នឹងជំរុញការអភិវឌ្ឍសេដ្ឋកិច្ច ហើយនៅទីបំផុត វានឹងរួមចំណែកកាត់បន្ថយភាពក្រីក្រ។ ងាកមកឆ្លើយទៅនឹងសំណួរដែលសួរថា តើចំនួនប្រាក់កម្ចីជិត៣ពាន់លានដុល្លារផ្តល់ជូនអ្នកកម្ចីតូចតាចនោះ អាចផ្តល់ជាគុណវិបត្តិសម្រាប់អ្នកខ្ចីតូចតាចដែរឬទេនោះ?
លោក អ៊ិន ចាន់នី បានពន្យល់ថា ប្រសិនបើអ្នកខ្ចី ខ្ចីប្រាក់យកទៅទិញរបស់របរដែលអត់ប្រយោជន៍ ឬទៅទិញស្រាផឹកដែលគ្មានបានប្រាក់ចំណូលមកវិញនោះ នោះ គឺជារឿងដែលគួរឲ្យព្រួយបារម្ភ។ ប៉ុន្តែប្រសិនបើប្រាក់កម្ចីត្រូវបានគេយកទៅធ្វើជំនួញពិតប្រាកដ ពេលនោះ កម្ចីដែលជាបំណុលនោះ មិនមានបញ្ហាអ្វីឡើយ។ លោក អ៊ិន ចាន់នី បានបញ្ជាក់ដោយដកស្រង់តួលេខមកបង្ហាញថា៖«អត្រានៃអ្នកមិនអាចសងបានស្ថិតនៅក្រោម១% ដូច្នេះ វាគ្មានបញ្ហាអ្វីទេ។ អ្នកផ្តល់កម្ចីមិនចេះតែឲ្យខ្ចីទេ។ ឲ្យខ្ចី លុះត្រាតែអ្នកខ្ចី មានផែនការអាជីវកម្មត្រឹមត្រូវ»។
លោក កង ចាន់តារារ័ត្ន សេដ្ឋវិទូឯករាជ្យនៅក្នុងប្រទេសកម្ពុជាមើលមិនឃើញប្រយោជន៍ដូចលោក អ៊ិន ចាន់នី ទាំងស្រុងនោះទេ។ សម្រាប់លោក កង ចាន់តារារ័ត្ន កម្ចីពីស្ថាប័នមីក្រូហិរញ្ញវត្ថុក្នុងកម្រិតពេលបច្ចុប្បន្ននេះ គឺជារឿងដែលគួរឲ្យព្រួយបារម្ភ ពីព្រោះអ្នករកស៊ីតូចតាចដែលខ្ចីប្រាក់ពីស្ថាប័នមីក្រូហិរញ្ញវត្ថុ កាន់តែលែងសូវមានឱកាសរកស៊ីហើយ។ មិនមានឱកាស ព្រោះថា អ្នកមានលទ្ធភាពភាគច្រើនកាន់កាប់ជំនួញជំនួសអ្នកក្រីក្រ។ លោក តារារ័ត្នលើកឡើងថា៖«អ្នករកស៊ីតូចតាចប្រឈមនឹងគ្រោះថ្នាក់ចំពោះមុខរបរ របស់ពួកគេ ពីព្រោះ កសិករឥឡូវនេះក្លាយជាកម្មករអ្នកមាន ក្លាយជាអ្នកជួលដីអ្នកមាន ឬក្លាយជាអ្នកជំពាក់បំណុលមីក្រូហិរញ្ញវត្ថុ។ កាលពី៥ឆ្នាំមុន អ្នកជំនួញតូចតាចជាពិសេស នៅក្នុងវិស័យកសិកម្មអាចនៅមានឱកាសរកស៊ីបានខ្លះ ឥឡូវនេះអ្នកមានធនធានកាន់កាប់ដីកសិកម្មច្រើនរយហិកតា ហើយកសិករពិតប្រាកដបែរជាជួលដីគេធ្វើកសិកម្មវិញ។ នេះគឺជាបញ្ហា»។
លោក កង ចាន់តារារ័ត្ន បញ្ជាក់បន្ថែមទៀតថា ទឹកប្រាក់ប្រមាណជា៣ពាន់លានដុល្លារដែលផ្តល់ឲ្យដោយសារគ្រឹះស្ថានមីក្រូហិរញ្ញវត្ថុ គឺជាចំនួនទឹកប្រាក់ច្រើនដែលត្រូវចាក់បញ្ចូលទៅក្នុងសេដ្ឋកិច្ចខ្មែរ ជាពិសេស ទៅក្នុងមុខរបរតូចតាច។ អ្នកខ្ចីទាំងនោះភាគច្រើនបោះទុននៅក្នុងវិស័យកសិកម្ម និងតិចតួចណាស់ក្នុងវិស័យទេសចរណ៍ ឬវិស័យកាត់ដេរ។ ចុះបើវិស័យកសិកម្មត្រូវបានគ្រប់គ្រងដោយអ្នកមានធនធាន ហើយកសិករពិតប្រាកដក្លាយទៅជាកម្មករជួលដីគេទៅហើយនោះ ពេលនោះ កម្ចីអាជីវកម្មអាចប្រឈមនឹងគ្រោះថ្នាក់។ នេះគឺជាពន្យល់បន្ថែមរបស់សេដ្ឋវិទូ កង ចាន់តារារ័ត្នដោយលោកបានអំពាវនាវឲ្យរដ្ឋាភិបាលធ្វើយ៉ាងណាអនុញ្ញាតឲ្យអ្នករកស៊ីតូចតាចអាចមានឱកាសពង្រីកជំនួញរបស់ពួកគេតទៅមុខបានទៀត។
លើសពីនេះទៅទៀត លោក កែម ឡី អ្នកវិភាគសង្គមនយោបាយ និងសេដ្ឋកិច្ចបានសម្តែងក្តីព្រួយបារម្ភចំពោះលទ្ធភាពមិនអាចសងវិញបានពីសំណាក់អ្នកជំនួញកសិកម្មខ្នាតតូច ពីព្រោះ តម្លៃកសិកម្មបានធ្លាក់ចុះយ៉ាងគំហុកនាពេលបច្ចុប្បន្ននេះ។ ស្រូវ ដំឡូង និងកៅស៊ូ ធ្លាក់ថ្លៃទាំងអស់។ តើបំណុលរបស់ពលលរដ្ឋខ្មែរវាជាបំណុលជំរុញកំណើនសេដ្ឋកិច្ច ឬជាបំណុលរុញឲ្យកសិករកាន់តែវ័ណ្ឌកបន្ថែមទៀត?