«សម្តេច» ត្រូវមានលក្ខណៈវិនិច្ឆ័យ៧ចំណុច

ជាតិ

បទវិភាគ

«សម្តេច» ត្រូវមានលក្ខណៈវិនិច្ឆ័យ៧ចំណុច

21, Feb 2016 , 9:20 pm

រូបភាព

ដោយ:

ភ្នំពេញ៖ «សម្តេច» ត្រូវតែជាបុគ្គលដែលខ្លាំងពូកែ អាចធានានូវការឯកភាពជាតិ និងមានអំណាច។ ទស្សនវិទូជនជាតិអ៊ីតាលី លោក ម៉ាគីយ៉ាវែល(Machiavel)បានអះអាងថា លក្ខណៈសម្បតិ្តជាសម្តេច គឺត្រូវមានលក្ខណៈវិនិច្ឆ័យ៧យ៉ាង។

លក្ខណៈវិនិច្ឆ័យទី១៖ ត្រូវប្រកាន់យកភាពប្រកដនិយមជាគោល។ នៅពេលមានអ្វីកើតឡើង មិនត្រូវស្លន់ស្លោ ហើយចាត់ទុកជារឿងធម្មតា។ តែមិនត្រូវធ្លាក់នៅក្នុងគំនិតសន្តិភាពនិយមពេក និងមិនត្រូវជឿលើខ្លួនឯងហួសហេតុពេកដែរ។

២៖ មិនមែនជាមនុស្សអត្តទត្ថ និងលើកកម្កើងខ្លួន ពីព្រោះជាធម្មតា មនុស្សតែងគិតគូរអំពីផលប្រយោជន៍ផ្ទាល់ខ្លួន និងលើកតម្កើងខ្លួនឯងតាមរយៈការបង្ហាញឲ្យគេស្គាល់នូវសកម្មភាព ឬតាមរយៈស្នាដៃរបស់ខ្លួន។ ជាមួយមជ្ឈដ្ឋានអាក្រក់ យើងមិនអាចយកអ្វីដែលល្អទៅប្រើប្រាស់បានទេ ពីព្រោះគេមិនអាចចាត់ទុកថា យើងជាអ្នកល្អ ក្នុងចំណោមមនុស្សអាក្រក់បានទេ។

៣៖ ជាមនុស្សចេះគន់គូរមើលថា បើយកមនុស្សណាមកប្រើ តើចំណេញអ្វីខ្លះដល់យើង? អ្នកតាមដង្ហែយើង ឬបម្រើយើងដោយឥតលោភលន់ គឺត្រូវផ្តល់រង្វាន់ដល់គេ និងស្រលាញ់គេ។ ត្រូវយកអ្នកដាច់តែឯង មកធ្វើជាទីប្រឹក្សារបស់យើង ព្រោះ ពួកនេះនឹងជួយការពារយើងពេលមានអាសន្ន។ មនុស្សដែលមិនទាក់ទិននឹងយើងក្នុងគោលការណ៍ណាមួយ គួរកុំយកមកប្រើ ព្រោះមនុស្សប្រភេទនេះ គេគិតអំពីផលប្រយោជន៍គេ ជាងផលប្រយោជន៍យើង។ នៅពេលមានអាសន្នពួកនេះនឹងបំផ្លាញយើង។ «សម្តេច» ត្រូវធ្វើឲ្យខ្លាច និងគោរព ជាជាងធ្វើឲ្យគេស្រលាញ់។

៤៖ មិនត្រូវចាប់អារម្មណ៍អំពើល្អ ឬអាក្រក់ទេ ប៉ុន្តែត្រូវចេះប្រើប្រាស់នូវសកម្មភាពទាំងពីរ នៅពេលណាដែលកាលៈទេសតម្រូវឲ្យ។ គោលដៅ គឺបញ្ជាក់ពីមធ្យោបាយដែលប្រើប្រាស់។

៥៖ ជាមនុស្សមានភាពប៉ិនប្រសប់ ពោលគឺចេះប្រើល្បិច ពីព្រោះ អ្វីៗទាំងអស់ គឺតែងតែមានសភាពតានតឹងជានិច្ច មុននឹងឈានទៅដល់គោលដៅ។ ល្បិចកលដែលប្រើប្រាស់គឺ«បំបែកបំបាក់ដើម្បីត្រួតត្រា»។

៦៖ ត្រូវចេះដើរតួ លាក់កំបាំង ឬលាក់ពុតយ៉ាងប៉ិនប្រសប់។ និងទី៧៖ ត្រូវមានអនុភាព ពោលគឺត្រូវមើលឃើញខ្លួនឯងឋិតនៅពីលើគេទាំងអស់៕

(ដកស្រង់ពីសៀវភៅ«ប្រវត្តិគំនិតនយោបាយបស្ចឹមប្រទេស» រៀបរៀងដោយ បណ្ឌិត អ៊ុំ ប៉ុម)