បទវិភាគ
ទំនាក់ទំនងសង្គមកាត់ផ្តាច់ ព្រោះមនុស្សលែងមើលមុខគ្នា នាំគ្នាមើលតែទូរសព្ទ
× ភ្នំពេញ៖ បណ្តាញសង្គមធ្វើឲ្យទំនាក់ទំនងមនុស្សក្នុងពិភពលោកកាន់តែកៀកគ្នា និងធ្វើឲ្យទំនាក់ទំនងកាន់តែឃ្លាតឆ្ងាយពីគ្នាទៅវិញដែរ។ ជាក់ស្តែង មិត្តភក្តិរស់នៅឆ្ងាយពីគ្នាខំប្រឹងស្វែងរកទំនាក់ទំនងឲ្យកាន់តែកៀកគ្នាតាមរយៈបណ្តាញហ្វេសប៊ុក។ ប៉ុន្តែមិត្តភក្តិដែលអង្គុយតុជាមួយគ្នា បែរជាមិនមើលមុខគ្នា មិនសូវនិយាយរកគ្នា ហើយនាំគ្នាគិតតែពីចុចទូរសព្ទរៀងខ្លួន។ នៅក្នុងគ្រួសារនីមួយៗ អាណាព្យាបាល និងកូនមិនសូវមើលមុខគ្នា ឬនិយាយសាសងគ្នាច្រើនទៀតឡើយ ពីព្រោះ ពួកគេរវល់តែចុចទូរសព្ទរៀងខ្លួនៗ។ តើនេះបង្ហាញពីទំនាក់ទំនងទល់មុខគ្នាកំពុងធ្លាក់ចូលក្នុងវិបត្តិមែនឬ?
ចូលមកដល់ដើមសតវត្សរ៍ទី២១មក(ក្រោយឆ្នាំ២០០០), វិស័យបច្ចេកវិទ្យាព័ត៌មានទទួលបានការរីកចម្រើនមិនគួរឲ្យជឿ។ ក្នុងចំណោមបច្ចេកព័ត៌មានដទៃទៀត វិស័យបណ្តាញសង្គមនៅលើប្រព័ន្ធអ៊ិនធឺណិតត្រូវបានមនុស្សច្រើនពាន់លាននាក់នៅលើពិភពលោកប្រើប្រាស់ប្រចាំថ្ងៃ។
បណ្តាញសង្គមហ្វេសប៊ុកត្រូវបានគេបង្កើតឡើងនៅឆ្នាំ២០០៤នៅសហរដ្ឋអាមេរិកដោយជនជាតិអាមេរិកកាំង។ បន្ទាប់មកបណ្តាញសង្គមមួយនេះចេះតែរីកសាយភាយនិងមានប្រជាប្រិយភាពបន្តិចម្តងៗនៅលើពិភពលោក ជាពិសេស នៅក្នុងប្រទេសជឿនលឿន។
ចំពោះប្រទេសកម្ពុជាវិញ ហ្វេសប៊ុកបានចូលមកប្រហែលក្នុងឆ្នាំ២០០៦ ។ ប៉ុន្តែវាមានភាពល្បីល្បាញនិងទាក់ទាញយុវជនខ្មែរខ្លាំងកាលពីឆ្នាំ២០១៣កន្លងមក និងបន្តមកទៀត មនុស្សវ័យចំណាស់ក៏ចាប់ផ្តើមប្រើប្រាស់វាដូចយុវវ័យដែរ។ ហ្វេសប៊ុក គឺជាបណ្តាញសង្គមដ៏មានប្រសិទ្ធិភាពដែលអនុញ្ញាតអោយមនុស្សទាំងអស់នៅលើពិភពលោកអាចទំនាក់ទំនងគ្នាបាន។ លក្ខណៈពិសេសរបស់ហ្វេសប៊ុកលើសពីអ៊ីមែល គឺនៅត្រង់ថា ហ្វេសប៊ុកអនុញ្ញាតអោយមនុស្សច្រើនពាន់ម៉ឺននាក់អាចចែករំលែកព័ត៌មានគ្នាបានក្នុងពេលដ៏ខ្លីបំផុត។ ម្យ៉ាងវិញទៀត អ្នកលេងហ្វេសប៊ុកអាចជជែកគ្នាបានភ្លាមៗជាមួយមនុស្សច្រើននាក់ផ្សេងទៀតក្នុងពេលតែមួយ។ អ្នកខ្លះ Chat ជាមួយមិត្តភក្តិបី បួន ប្រាំនាក់ព្រមពេលជាមួយគ្នា។ អ្នកខ្លះអត់បាយអត់ទឹកដោយសារតែការ Chat ជាមួយគ្នាទៅវិញទៅមក។ ដោយមិននិយាយពីគោលដៅពាណិជ្ជកម្ម អ្នកខ្លះចាត់ទុកហ្វេសប៊ុកថា ជាមិត្តភក្តិដ៏ល្អដែលមិនអាចអត់បានឡើយ។ ពួកគេចាត់ទុកហ្វេសប៊ុកជាមិត្តភក្តិពីព្រោះហ្វេសប៊ុកអាចជួយកែអផ្សុកគេបាន។ អ្នកខ្លះទៀតប្រើប្រាស់ហ្វេសប៊ុកដើម្បីភ្ជាប់ស្នេហ៍។
ក្រៅពីបញ្ហាសង្គម, អ្នកនយោបាយ និងសកម្មជននយោបាយខ្មែរជាច្រើនចាប់ផ្តើមប្រើប្រាស់បណ្តាញហ្វេសប៊ុកដើម្បីបង្ហាញមនោគមន៍វិជ្ជារបស់ខ្លួនដើម្បីទាក់ទាញអ្នកគាំទ្រ។ ជាក់ស្តែង សម្តេចនាយករដ្ឋមន្ត្រី ហ៊ុន សែន និងឯកឧត្តម សម រង្ស៊ី បាន និងកំពុងប្រើប្រាស់ទំព័រហ្វេសប៊ុករបស់ខ្លួនដើម្បីបង្ហាញជំហរនយោបាយរបស់ពួកគេ។ អ្នកប្រើប្រាស់ហ្វេសប៊ុកមួយចំនួននៅក្នុងប្រទេសកម្ពុជាដែលញៀននឹងហ្វេសប៊ុកនោះបានចំណាយពេលយ៉ាងច្រើនជាមួយបណ្តាញសង្គមមួយនេះ។ អ្នកខ្លះញៀនលេងរហូតដល់ទៅភ្លេចបាយភ្លេចទឹក ភ្លេចរៀនភ្លេចសូត្រឬភ្លេចការងារក៏មានដែរ។ យុវជនខ្លះអង្គុយនៅមុខកុំព្យូទ័រទំនងដូចជាធ្វើកិច្ចការគ្រូដាក់អោយឬទំនងជាធ្វើកិច្ចការរបស់ស្ថាប័នអ៊ីចឹង។ តាមពិត ពួកគេលេងហ្វេសប៊ុកច្រើនជាងធ្វើកិច្ចការសម្រាប់ក្រុមហ៊ុន និងស្ថាប័នរដ្ឋទៅទៀត។
គុណសម្បត្តិរបស់បណ្តាញសង្គមមានមែន។ តែបញ្ហាក៏កើតមានច្រើនដែរ។ ស្ថានភាពជាក់ស្តែងនៅក្នុងប្រទេសកម្ពុជានាពេលបច្ចុប្បន្ននេះបានបង្ហាញអោយឃើញថា មិនមែនតែយុវជនទេដែលប្រើប្រាស់ខុសទិសដៅនោះ។ តាមពិត មន្ត្រីរាជការ បុគ្គលិកក្រុមហ៊ុន និងបុគ្គលិកអង្គការមួយចំនួនបាននិងកំពុងវក់វីនឹងការប្រើប្រាស់ហ្វេសប៊ុកខុសទិសដៅ។ បុគ្គលិករដ្ឋ ក្រុមហ៊ុននិងអង្គការខ្លះធ្វើការផងលេងហ្វេសប៊ុកព្រមពេលជាមួយគ្នា។
បុគ្គលិកខ្លះទៀត លេងហ្វេសប៊ុកច្រើនជាងធ្វើការ មានន័យថា ពួកគេអង្គុយនៅមុខកំព្យូទ័រមែន ប៉ុន្តែពួកគេគិតតែពីជជែកគ្នាតាមហ្វេសប៊ុក។ ពេលខ្លះ ក្រៅពីជជែកគ្នាតាមហ្វេសប៊ុក ពួកគេមួយចំនួនគិតតែពីឆែកមើលព័ត៌មានស្ទើររាល់ម៉ោង។ និន្នាការអាក្រក់នេះបាននិងកំពុងកើតមានកាន់តែច្រើនឡើងៗពីពេលមួយទៅពេលមួយ។
ដោយសារតែមើលឃើញទម្លាប់អាក្រក់កើតមានកាន់តែច្រើនទើបស្ថាប័ន ឯកជនមួយចំនួនចាប់ផ្តើម មានវិធានការណ៍ហាមឃាត់មិនអោយបុគ្គលិករបស់ខ្លួនលេងហ្វេសប៊ុកនៅក្នុងម៉ោងធ្វើការ។ ក្រៅម៉ោងធ្វើការទើបបុគ្គលិកមានសិទ្ធិលេងហ្វេសប៊ុកបាន។
អ្នកវិភាគសង្គមនយោបាយបានទាញសញ្ញាអាសន្នថា ប្រសិនបើបុគ្គលិក មិនថា បុគ្គលិករដ្ឋ ឯកជន ឬអង្គការនោះទេគិតតែពីលេងហ្វេសប៊ុកឬលេងផងនិងធ្វើការផងនោះ ពេលនោះផលិតភាព និងប្រសិទ្ធិភាពការងាសម្រាប់ស្ថាប័ននឹងត្រូវកាត់បន្ថយ។ ប្រសិនបើស្ថាប័នបាត់បង់ផលិតភាពកាន់តែខ្ពស់ ពេលនោះ ស្ថាប័ននោះអាចក្ស័យធន។ នៅពេលដែលស្ថាប័នក្ស័យធន បុគ្គលិកប្រឈមនឹងភាពគ្មានការងារធ្វើ។
គុណវិបត្តិមួយទៀតដែលត្រូវបានគេសង្កេតឃើញដែរនោះ គឺថា ហ្វេសប៊ុកកំពុងកាត់ផ្តាច់ទំនាក់ទំនងសង្គម។ មិត្តភក្តិជួបមុខគ្នាមិនបាននិយាយរកគ្នាច្រើនឡើយ។ កិច្ចប្រជុំមិនសូវទទួលបានលទ្ធផលល្អ ពីព្រោះ អ្នកចូលរួមមិនខ្វល់នឹងប្រធានបទ។ នៅតាមគេហដ្ឋាននីមួយៗនៅទីក្រុងភ្នំពេញជាពិសេស ប្តីប្រពន្ធកូនចៅ មិនសូវនិយាយសាសងគ្នា ពីព្រោះ ពួកគេខ្វល់តែចុចទូរសព្ទរៀងៗខ្លួន។ អ្នកវិភាគសង្គមខ្លះមិនត្រឹមតែព្រួយបារម្ភធម្មតាប៉ុណ្ណោះទេ តែពួកគេអត្ថាធិប្បាយថា ប្រសិនបើចរន្តអាក្រក់នេះនៅតែបន្តទៅមុខទៀតនោះ គេពិតជាអាចទាញសេចក្តីសន្និដ្ឋានបានថា ទំនាក់ទំនងមិត្តភក្តិ ទំនាក់ទំនងសង្គមគ្រួសារខ្មែរ ទំនាក់ទំនងអ្នកជិតខាង កំពុងឈានទៅរកវិបត្តិដែលកើតឡើងដោយសារតែមនុស្សមិនសូវនិយាយរកគ្នា។
ជួបមុខគ្នា មិននិយាយរកគ្នា គឺជាអ្វីដែលមិនគួរឲ្យកើតមានឡើងនៅក្នុងសង្គមខ្មែរឡើយ។ សង្គមខ្មែរ គឺជាសង្គមមួយដែលបុគ្គលម្នាក់ៗសម្តែងគារវកិច្ចដាក់គ្នាទៅវិញទៅមក និងញញឹមញញែមដាក់គ្នាគ្មានពេលល្ហែឡើយ។ តែវត្តមានហ្វេសប៊ុកដ៏គំហុកកំពុងបំផ្លាញប្រពៃណីដ៏ផូរផង់ខាងលើនេះទៅវិញ៕
© រក្សាសិទ្ធិដោយ thmeythmey.com