កីឡាជាតិ
ជាតិ
លោក កែវ រ៉េមី បង្ហាញក្បាច់គុនតេក្វាន់ដូលើកដំបូងនៅកម្ពុជា
×
រដ្ឋលេខាធិការទីស្តីការគណៈរដ្ឋមន្ត្រី លោក កែវ រ៉េមី បានបង្ហាញក្បាច់គុនតេក្វាន់ដូ កម្រិត៤ដាន់របស់លោកនាល្ងាចថ្ងៃទី២៦កុម្ភៈ។ ព្រឹត្តិការណ៍រាត្រីយុទ្ធគុនលើកទី២ ត្រូវបានរៀបចំឡើងនៅគណៈកម្មាធិការជាតិអូឡាំពិកកម្ពុជា ក្រោមអធិបតីភាពលោកឧត្តមសេនីយឯក ណឹម សុវត្ថិ ប្រធានគណៈកម្មការកីឡាយុទ្ធសិល្ប៍។ ក្នុងចំណោមក្លិបក្បាច់គុនចំនួន១១ដែលមានវត្តមាននៅក្នុងរាត្រីយុទ្ធគុន ក៏មានវត្តមានលោក សុខ ស៊ីផាន់ណា ទីប្រឹក្សារដ្ឋាភិបាល ដែលបានបង្ហាញក្បាច់គុនការ៉ាតេដូកម្រិត៥ដាន់របស់លោកដែរ។
ការបង្ហាញក្បាច់គុនតេក្វាន់ដូលើកដំបូងរបស់លោក កែវ រ៉េមី ត្រូវបានធ្វើឡើងក្នុងឱកាសដែលលោកទើបតែក្លាយជាប្រធានកិត្តិយសនៃសហព័ន្ធតេក្វាន់ដូអន្តរជាតិ ITF នៅកម្ពុជា។ លោក កែវ រ៉េមី បានបញ្ជាក់ប្រាប់សារព័ត៌ថ្មីៗថា តាមពិតលោកគឺអ្នកហាត់ក្បាច់គុនតេក្វាន់ដូនៅសហរដ្ឋអាមេរិកតាំងពីជាង២០ឆ្នាំមុន។ ហើយថា លោកក៏ធ្លាប់ប្រកួតឈ្នះពានរង្វាន់ចំនួន៣លើក និងមេដាយ២លើកនៅក្នុងការប្រកួតប្រជែងនៅសហរដ្ឋអាមេរិកនោះដែរ។
ក្រោយពីលាក់ទុកចំណេះដឹងក្បាច់គុនតេក្វាន់ដូប្រមាណ២០ឆ្នាំនេះ លោក កែវ រ៉េមី បានសម្រេចចូលប្រឡូកចូលវិស័យក្បាច់គុននេះសារជាថ្មីឡើងវិញ។ មូលហេតុ ត្រូវបានលោករដ្ឋលេខាធិការនៃទីស្តីការគណៈរដ្ឋមន្ត្រីពន្យល់យ៉ាងដូច្នេះថា៖«ទីមួយដោយសារខ្ញុំរកឃើញថាមានតេក្វាន់ដូ ITF នៅកម្ពុជា។ ទីពីរ គឺដោយសារ គ្រូបង្ហាត់តេក្វាន់ដូ គឺលោក រី ឆឺណាំ គឺជាគ្រូល្បីថ្នាក់អន្តរជាតិដែលមានរហសនាមថា ស្តេចតេក្វាន់ដូ ហើយគាត់បានមកចូលរួមបង្ហាត់កូនខ្មែរ។ និងទី៣ ខ្ញុំចង់លើកស្ទួយតេក្វាន់ដូនេះ ចូលក្នុងស៊ីហ្គេម»។
មូលហេតុរបស់លោក កែវ រ៉េមី មិនអស់ត្រឹមនេះឡើយ។ សម្រាប់លោក កែវ រ៉េមី កីឡាក្បាច់គុន មិនត្រឹមតែជួយពង្រឹងសុខភាពអ្នកហាត់តែមួយនោះឡើយ ប៉ុន្តែវានឹងពង្រឹងស្មារតីរឹងមាំ និងកាយសម្បទាទៀតផង។ «ខ្ញុំចង់ឲ្យយុវជនខ្មែរងាកមកចាប់អារម្មណ៍លើវិស័យកីឡា ហើយចៀសវាងគ្រឿងញៀន។ ខ្ញុំចង់ប្រាប់ថា កីឡាមិនប្រកាន់វណ្ណជាតិសាសន៍ ឬភេទប្រុសភេទស្រីឡើយ។ អ្នកហាត់នឹងមានសុខភាពល្អ។ សូម្បីខ្ញុំចាស់ ក៏ខ្ញុំបន្តលេងកីឡាដែរ»។ នេះជាការបញ្ជាក់របស់អ្នកនយោបាយអាយុ៥៤ឆ្នាំ។
សព្វថ្ងៃនេះ ប្រធានសហព័ន្ធតេក្វាន់ដូអន្តរជាតិកំពុងត្រូវដឹកនាំដោយលោកមេធាវី អ៊ុក រី៕
Tag:
កែវ រ៉េមី
តេក្វាន់ដូ
ITF
© រក្សាសិទ្ធិដោយ thmeythmey.com