ឯកអគ្គរាជទូតកម្ពុជាប្រចាំអាស៊ានលោក នង សាកល បានប្រតិកម្មតបចំពោះការលើកឡើងរបស់ឯកអគ្គរដ្ឋទូតអាមេរិកប្រចាំអាស៊ានលោកស្រី Nina Hachigian ជុំវិញការរិះគន់ស្ថានភាពសិទ្ធិមនុស្សនៅកម្ពុជា។ មន្ត្រីទូតកម្ពុជាខាងលើចេញលិខិតមួយច្បាប់ផ្ញើរទៅកាន់លោកស្រី ឯកអគ្គរដ្ឋទូតនិងដាស់តឿនឲ្យលោកស្រីបំពេញភារកិច្ចរបស់ខ្លួនឲ្យត្រឹមត្រូវ ជាជាងរិះគន់កម្ពុជាយ៉ាងមិនសមរម្យបែបនេះ។
មន្ត្រីទូតកម្ពុជាប្រចាំអាស៊ាន លោក នង សាកល បានប្រតិកម្មតបខ្លាំងនិងបានចាត់ទុកសម្តីរបស់មន្ត្រីទូតអាមេរិកជាការរិះគន់មិនដែលមិនសមរម្យឡើយ។ ហើយលោកបានចេញលិខិតមួយច្បាប់ផ្ញើជូនមន្ត្រីទូតអាមេរិកខាងលើផងដែរ។
ថ្ងៃ ២៤កុម្ភៈកន្លងទៅ ក្នុងសន្និសីទសារព័ត៌មានស្តីពីកិច្ចប្រជុំកំពូលអាមេរិកអាស៊ានកន្លងមក លោកស្រីឯកអគ្គរដ្ឋទូតអាមេរិកប្រចាំអាស៊ានលោកស្រី Nina Hachigian បានលើកឡើងថាបញ្ហាប្រឈមនៅមានច្រើនពេលនិយាយពីបញ្ហាសិទ្ធិមនុស្សនៅកម្ពុជា។ លោកស្រីក៏បានទទូចសុំឲ្យរដ្ឋាភិបាលកម្ពុជាបង្កើតសង្គមដែលមានយុត្តិធម៌និងបង្កើនការប្តេជ្ញាចិត្តលើកកម្ពស់ប្រជាធិបតេយ្យនិងសិទ្ធិមនុស្សនៅកម្ពុជាផង។
យោងតាមទីភ្នាក់ងារព័ត៌មានកម្ពុជា AKP ក្នុងលិខិតឆ្លើយតបសម្តីលោកស្រីឯកអគ្គរដ្ឋទូតអាមេរិកប្រចាំអាស៊ាន លោក នង សាកល បានទទួលស្គាល់ថាមានការលើកឡើងពីបញ្ហាសិទ្ធិមនុស្សនិងប្រជាធិបតេយ្យក្នុងជំនួបកំពូលរវាងលោក បារ៉ាក់ អូបាម៉ាជាមួយមេដឹកនាំអាស៊ានទាំង១០។
តែលោកសង្កត់ធ្ងន់ថា គ្មានការបញ្ជាក់ឈ្មោះប្រទេសណាមួយជាក់លាក់ដោយចំហរឡើយ។ ក្រៅពីនេះលោក ក៏ឆ្លៀតវាយបកវិញធ្ងន់ផងដែរដោយរំលឹកពីតួនាទីរបស់លោកស្រីជាឯកអគ្គរដ្ឋទូតប្រចាំអាស៊ាន។ លោកថា៖ «ក្នុងនាមជាឯកអគ្គរដ្ឋទូតសហរដ្ឋអាមេរិក ប្រចាំសហគមន៍អាស៊ាន តួនាទីសំខាន់បំផុតរបស់លោកស្រី គឺគ្រាន់តែផ្តោតលើការតាមដាន និងការលើកំពស់ភាពជាដៃគូយុទ្ធសាស្ត្រអាស៊ាន-សហរដ្ឋអាមេរិក និងមិនជ្រៀតជ្រែកកិច្ចការផ្ទៃក្នុងរបស់កម្ពុជា ដោយរបៀបមិនសមរម្យនោះឡើយ»។
ឯកអគ្គរាជទូតកម្ពុជាក៏លើកឡើងពីបញ្ហាច្បាប់ស្តីពីអង្គការសង្គមស៊ីវិល និងអង្គការក្រៅរដ្ឋាភិបាលដែលជាច្បាប់ចម្រូងចម្រាសកន្លងមក។ លោកបកស្រាយថា ច្បាប់ថ្មីគ្មានគោលដៅរឹតត្បិតសិទ្ធិសេរីភាពអង្គការសង្គមស៊ីវិលអ្វីឡើយ តែច្បាប់នេះជួយសម្រួលដំណើរការនៃស្ថាប័នទាំងអស់នេះឲ្យប្រសើរជាងមុនក្នុងក្របខ័ណ្ឌច្បាប់ទៅវិញទេ។
ចុងក្រោយលោក នង សាកល ក៏ដាស់តឿនឲ្យលោកស្រី Nina Hachigian បំពេញភារកិច្ចផ្ទាល់ខ្លួនឲ្យត្រឹមត្រូវកុំបាច់រិះគន់កម្ពុជាដោយមិនសមហេតុផលបែបនេះ។
សូមទាញការចាប់អារម្មណ៍បន្តិចដែរ បញ្ហាសិទ្ធិមនុស្សនិងការអញ្ជើញមេដឹកនាំអាស៊ីអាគ្នេយ៍ទៅចូលរួមកិច្ចប្រជុំកំពូលនៅអាមេរិកកន្លងមកនេះក្លាយជារឿងចម្រូងចម្រាសខ្លាំង។ ស្ថាប័នសិទ្ធិមនុស្សនិងក្រុមសកម្មជនសិទ្ធិមនុស្សរិះគន់លោក បារ៉ាក់ អូបាម៉ា ដែលចាត់ទុកសិទ្ធិមនុស្សនិងប្រជាធិបតេយ្យក្រោមប្រយោជន៍សេដ្ឋកិច្ចដោយផ្ញើលិខិតអញ្ជើញទៅប្រមុខរបបសឹកលោក ប្រាយុទ្ធ ច័ន្ទអូចា នាយករដ្ឋមន្ត្រីកម្ពុជាសម្តេច ហ៊ុន សែន មេដឹកនាំឡាវ មីយ៉ាន់ម៉ា និង វៀតណាម ជាដើមផង។
ប៉ុន្តែក្នុងសន្និសីទសារព័ត៌មានថ្ងៃ ១៥ កុម្ភៈមុនកិច្ចប្រជុំចាប់ផ្តើម ទីប្រឹក្សាសន្តិសុខជាតិលោកស្រី Susan Rice បានបកស្រាយថា ការអញ្ជើញមេដឹកនាំប្រទេសអាស៊ានដែលមានការរំលោភសិទ្ធិមនុស្សធ្ងន់ធ្ងរ មិនមែនមានន័យថាអាមេរិកផ្តល់ភាពស្របច្បាប់ដល់ពួកគេនិងទង្វើដែលពួកគេបានធ្វើឡើងឡើយ៕