ពីនេះ ពីនោះ
ចង់ឲ្យប្រទេសរីកចម្រើនលឿន ត្រូវចេះរក្សា និងប្រើប្រាស់បញ្ញវន្តស្មោះត្រង់
×![]()
ដោយ: លីម តុលា
នៅក្នុងប្រទេសរីកចម្រើនជឿនលឿន ដូចជា ប្រទេសកាណាដា បារាំង ជប៉ុន អាមេរិក បញ្ញវន្តមានចំណេះដឹងជំនាញខ្ពង់ខ្ពស់ និងស្មោះត្រង់ត្រូវបានប្រទេសទាំងនោះឲ្យតម្លៃ មិនថានៅក្នុងវិស័យឯកជន ឬវិស័យរដ្ឋឡើយ។ 
នៅក្នុងប្រទេសជឿនលឿនទាំងនោះ គេបានផ្តល់សិទ្ធិទូលំទូលាយពិសេសដល់បញ្ញវន្តនៃជនជាតិដទៃ ឲ្យរស់នៅក្នុងប្រទេសរបស់ពួកគេ ពីព្រោះក្រុមបញ្ញវន្តទាំងនោះ១០នាក់ មានតម្លៃស្មើនឹងមនុស្សធម្មតា១០០នាក់ និយាយបែបផ្សេង មានន័យថា មនុស្សចេះដឹងម្នាក់ មានតម្លៃស្មើមនុស្សធម្មតា១០នាក់សម្រាប់ការអភិវឌ្ឍប្រទេស។
ក្នុងន័យនេះហើយ បានជាប្រទេសជឿនលឿននីមួយៗផ្តល់តម្លៃជូនដល់បញ្ញវន្តស្មោះត្រង់ ហើយរក្សាពួកគេឲ្យធ្វើការនៅក្នុងប្រទេសដើម្បីបម្រើជាតិសាសន៍របស់ពួកគេ។ ងាកមកប្រទេសកម្ពុជាវិញ រដ្ឋាភិបាលក៏បានគិតគូររក្សា ថែទាំ និងប្រើប្រាស់បញ្ញវន្តដែរ។ តែកម្រិតនៃការរក្សាបញ្ញវន្តស្មោះត្រង់ឲ្យស្ថិតនៅក្នុងប្រទេសដើម្បីចូលរួមក្នុងការអភិវឌ្ឍនជាតិនៅមានកម្រិតតិចតួចនៅឡើយ។ មានមែនបញ្ញវន្តពូកែ ឈ្លាសវៃ កំពុងបម្រើការនៅក្នុងប្រទេស។ ប៉ុន្តែ បញ្ញវន្តដែលពូកែខ្ពស់បំផុត ក៏បានចេញទៅធ្វើការនៅក្រៅប្រទេសច្រើនដែរ។ មូលហេតុដោយសារ ពួកគេប្រឈមនឹងបញ្ហាបក្សពួកនិយម និងបញ្ហាមិនឲ្យតម្លៃជាដើមនៅក្នុងប្រទេសកម្ពុជា។
ដូច្នេះ ដើម្បីឲ្យប្រទេសមួយរីកចម្រើនលឿនទៅមុខ ថ្នាក់ដឹកនាំប្រទេសមិនគួរមើលរំលងធនធានមនុស្សបញ្ញវន្តស្មោះត្រង់ឡើយ។ ម្យ៉ាងវិញទៀត អ្នកនយោបាយគួរស្តាប់អ្នកជំនាញស្មោះត្រង់ឲ្យបានច្រើនជាងស្តាប់អ្នកនយោបាយដូចគ្នា។ ធនធានមនុស្សបញ្ញវន្តស្មោះត្រង់ គឺជាសសរគ្រឹះនៃការអភិវឌ្ឍប្រទេស៕
© រក្សាសិទ្ធិដោយ thmeythmey.com
