បញ្ហាថវិកា និងការគាំទ្រជំរុញឲ្យក្លិបចូលរួមការប្រកួតថ្នាក់ជាតិសីប៉ាក់តាក្រថយចុះ

កីឡាជាតិ

ជាតិ

បញ្ហាថវិកា និងការគាំទ្រជំរុញឲ្យក្លិបចូលរួមការប្រកួតថ្នាក់ជាតិសីប៉ាក់តាក្រថយចុះ

29, Jun 2016 , 8:39 am

រូបភាព

ដោយ:

ប្រធានសហព័ន្ធកីឡាសីប៉ាក់តាក្របានអះអាងថា បញ្ហាថវិកា និងការខ្វះការគាំទ្របានជំរុញឲ្យការប្រកួតកីឡាសីប៉ាក់តាក្រជ្រើសរើសជើងឯកថ្នាក់ជាតិឆ្នាំនេះមានការថយចុះនូវក្លិបចូលរួម ប៉ុន្តែអត្តពលិកមានការកើនឡើងជាងឆ្នាំមុន។ ការប្រកួតកីឡាសីប៉ាក់តាក្រឆ្នាំនេះប្រព្រឹត្តទៅរយៈពេល៦ថ្ងៃ ចាប់ពីថ្ងៃទី២៥ ដល់ថ្ងៃទី៣០ ខែមិថុនា ដោយមានក្លិបចំនួន១៥ និងកីឡាករ៤០២នាក់ចូលរួម។

បញ្ហាថវិកា និងការខ្វះការគាំទ្របានបង្ខំឲ្យក្លិប-សមាគមដែលធ្វើធ្លាប់ចូលរួមឆ្នាំមុនអវត្តមាននៃការចូលរួម ការប្រកួតកីឡាសីប៉ាក់តាក្រជ្រើសរើសជើងឯកថ្នាក់ជាតិប្រចាំឆ្នាំ២០១៦ មានការថយចុះចំនួន៥ក្លិប។ ទោះបីជាយ៉ាងនេះក្តីចំនួនអត្តពលិកមានការកើនឡើងជាង១០នាក់។ ប៉ុន្តែបើគិតជាចំនួនក្លិបចូលរួមឆ្នាំនេះមានការថយចុះតែ៣ប៉ុណ្ណោះ ពោលគឺឆ្នាំនេះមានក្លិបចំនួន១៥ចូលរួម ខណៈឆ្នាំមុនមាន១៨ក្លិបចូលរួម។

លោក មាស សារិន ប្រធានសហព័ន្ធកីឡាសីប៉ាក់តាក្របានបញ្ជាក់ថា៖«ការប្រកួតជើងឯកថ្នាក់ជាតិឆ្នាំនេះមានការកើនឡើងចំនួនកីឡាករ ប៉ុន្តែក្លិបមានការថយចុះ មូលហេតុគ្មានថវិកាចូលរួម។ ឆ្នាំមុនយើងបាន១៨ក្រុម ប៉ុន្តែកីឡាករបានតែ ៣៩០នាក់ទេ ដោយឡែកឆ្នាំនេះមាន១៥ក្លិប តែមានកីឡាកររហូតដល់៤០២នាក់ មានន័យថាកើនឡើងចំនួន១២នាក់ទាំងវ័យក្មេង និងពេញវ័យ»។

ពាក់ពាន់ទៅនឹងការថយចុះនៃចំនួនក្លិបនេះត្រូវបាន លោកប្រធានសហព័ន្ធរូបនេះបានឲ្យដឹងថា ដោយសារតែក្លិបទាំងនោះបានបង្កើតឡើងហើយ ប៉ុន្តែគ្មានការជួយគាំទ្រពីមជ្ឈដ្ឋានខាងក្រៅ ម្យ៉ាងទៀតដោយសារក្លិបទាំងថវិការក្នុងការចូលរួម។ ហើយក្លិបដែលចូលរួមឆ្នាំមុនអវត្តមានចំនួន៥ក្លិប ប៉ុន្តែឆ្នាំនេះមានក្លិបចំណូលថ្មីចូលរួមចំនួន២ក្លិប ពោលគឺមានថយចុះចំនួនពីរក្លិប។

ជាមួយគ្នានេះលោក ទូច សុភៈ អគ្គលេខាធិការសហព័ន្ធកីឡាសីប៉ាក់តាក្របានគាំទ្រការយល់ឃើញរបស់ លោកមាស សារិន ប្រធានសហព័ន្ធកីឡាសីប៉ាក់តាក្រដែលលោកលើកឡើងថា ការអត្តវត្តមាននៃការចូលរួមប្រកួតកីឡាសីប៉ាក់តាក្រជ្រើសរើសជើងឯកថ្នាក់ជាតិដោយសារការខ្វះថវិកា និងការគាំទ្រ។ ប៉ុន្តែអគ្គលេខាធិការសហព័ន្ធរូបនេះបានបន្ថែមលើនេះថា ការអវត្តមាននេះអាចបណ្តាលមកពីភាពយឺតយ៉ាវនៃការដំណឹងរបស់សហព័ន្ធទៅកាន់បណ្តាក្លិបទាំងនោះ ម្យ៉ាងទៀតដោយសារកត្តាកីឡាករក្នុងការចូលរួម។

លោកបានបញ្ជាក់ថា៖«ការអវត្តមានរបស់ក្លិបទាំងនោះអាចបណ្តាលមកពីការជូនដំណឹងរបស់យើងមានការយឺតយ៉ាវឬមួយយ៉ាងណានោះទេ ប៉ុន្តែខ្ញុំគិតថាមួយទៀតប្រហែលជាគេប្រមូលកីឡាមកលេងមិនបាន។ ហើយក្លិបដែលអវត្តមានឆ្នាំនេះមានដូចជា ក្លិបផ្សារធំថ្មី ក្លិប DN ក្លិបទឹកល្អក់ ក្លិបគ្រូបង្រៀន TSH និង សមាគមសីប៉ាក់តាក្រ ខេត្តកណ្តាល»។

អគ្គលេខាធិការសហព័ន្ធសីប៉ាក់តាក្ររូបនេះ ហាក់ដូចជាមានការព្រួយបារម្ភចំពោះការអវត្តមាននេះ ដោយសារវាអាចធ្វើឲ្យមានការប៉ះពាល់ដល់ការកំណែទម្រង់វិស័យកីឡាសីប៉ាកតាក្រឲ្យមានការរីកចម្រើន តាមអ្វីដែលក្រសួងបានកំណត់។ ពាក់ព័ន្ធទៅនឹងបញ្ហានេះដែរ ក្នុងឆ្នាំនេះសហព័ន្ធកីឡាសីប៉ាក់តាក្រនឹងធ្វើការចុះទៅបំផុសវិស័យកីឡានេះតាមបណ្តាសាលានានា ជាពិសេសសាលាដែលនៅក្នុងរាជធានីភ្នំពេញ ដើម្បីឲ្យសិស្សទាំងនោះនាំគ្នាមកលេងកីឡានេះ។

ពាក់ព័ន្ធទៅនឹងបញ្ហានេះដែរ លោក មាស សារិន ប្រធានសហព័ន្ធកីឡាសីប៉ាក់តាក្រ កំពុងរៀបចំឯកសារគ្រោងដាក់វិស័យកីឡានេះទៅក្នុងកម្មវិធីសិក្សារបស់ក្រសួងអប់រំយុវជន និងកីឡា ព្រោះលោកគិតថា សាលារៀនជាប្រភពថ្នាលដ៏សំខាន់ក្នុងការអភិវឌ្ឍវិស័យកីឡានេះឲ្យមានការរីកចម្រើន ជាពិសេសដើម្បីត្រៀមប្រកួតស៊ីហ្គេមឆ្នាំ២០២៣ ដែលកម្ពុជា នឹងធ្វើជាម្ចាស់ផ្ទះ៕