តុលាការអន្តរជាតិក្រុងឡាអេ នឹងប្រកាសសំណុំរឿងហ្វីលីពីនប្រឆាំងចិននៅថ្ងៃទី១២ ខែកក្កដា

អន្តរជាតិ

នយោបាយអន្តរជាតិ

តុលាការអន្តរជាតិក្រុងឡាអេ នឹងប្រកាសសំណុំរឿងហ្វីលីពីនប្រឆាំងចិននៅថ្ងៃទី១២ ខែកក្កដា

29, Jun 2016 , 10:16 pm

រូបភាព

ដោយ:

ចុងក្រោយមជ្ឈត្តការនៃតុលាការអន្តរជាតិ (PCA) បានកំណត់យកថ្ងៃទី១២ ខែកក្កដា ខាងមុខដ៏ខ្លីនេះ ដើម្បីប្រកាសសេចក្តីសម្រេចលើសំណុំរឿងសមុទ្រចិនខាងត្បូងដែលប្តឹងដោយហ្វីលីពីនប្រឆាំងនឹងចិន។ រយៈពេលបីឆ្នាំមកហើយ ដែលគេកំពុងតែរង់ចាំការចេញសាលក្រមមួយនេះ។

បើយោងតាមសេចក្តីប្រកាសព័ត៌មានដែលមានទាំងភាសាអង់គ្លេសផង បារាំងផង និងចិនផងដែររបស់ PCA ដែលបានផ្ញើមកកាន់សារព័ត៌មានថ្មីៗ មជ្ឈត្តការនៃតុលាការអន្តរជាតិ នៅថ្ងៃទី២៩ ខែមិថុនា បានជូនដំណឹងទៅកាន់ភាគីនៃសំណុំរឿងសមុទ្រចិនខាងត្បូងហើយ ថា តុលាការ នឹងប្រកាសសាលក្រមនៃមជ្ឈត្តការដែលបង្កើតឡើងដោយហ្វីលីពីនប្រឆាំងចិន ដោយយោងតាមឧបសម្ព័ន្ធ៧ នៃអនុសញ្ញាស្តីពីច្បាប់សមុទ្រអង្គការសហប្រជាជាតិឆ្នាំ១៩៨២ (UNCLOS)។

តាមសេចក្តីប្រកាសព័ត៌មានដដែល តុលាការ នឹងប្រកាសសាលក្រម នៅថ្ងៃអង្គារ ទី១២ ខែកក្កដា ឆ្នាំ២០១៦ នៅម៉ោង១១ ព្រឹក នៃក្រុងឡាអេ ប្រទេសហូឡង់។ ក្នុងនោះ តុលាការ នឹងបញ្ជូនសាលក្រម ដែលមានបីភាសារួមមានអង់គ្លេស បារាំង និងចិន (Mandarin) តាមរយៈសារអេឡិចត្រូនិក ដែលអមជាមួយនឹងសេចក្តីប្រកាសព័ត៌មានដែលមានសង្ខេបពីសាលក្រមផងដែរនោះ។

សូមជម្រាបផងដែរ ជម្លោះសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋពាក់ព័ន្ធ ដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន៕

សារព័ត៌មានថ្មីៗ នឹងលម្អិតពីសំណុំរឿងនេះបន្ថែមនៅថ្ងៃស្អែក !