ដោយ៖ ទូច ស្រីពេជ្រ (យុវជនឃុំជុំគ្រៀល)
កំពត៖ ការប្រើប្រាស់សេវា នៅរដ្ឋបាលឃុំជុំគ្រៀល ដែលជាឃុំមួយស្ថិតក្នុងស្រុកទឹកឈូ ខេត្តកំពតនៅតែមានដំណើរការល្អប្រសើរ បើទោះបីជាស្ថិតនៅក្នុងវិបត្តិកូវីដ-១៩ក៏ដោយ។ នេះជាការបញ្ជាក់អះអាងរបស់លោក ហៃ សេង មេឃុំជុំគ្រៀល ប្រាប់អ្នកសារព័ត៌មានប្រជាពលរដ្ឋ នៅក្នុងឃុំជុំគ្រៀល។
បើតាមលោក ហៃ សេង សេវារដ្ឋបាលក្នុងឃុំជុំគ្រៀលមានចំនួន ២៣ប្រភេទ សម្រាប់ផ្តល់ជូនប្រជាពលរដ្ឋ ជាង ១ ៣០០គ្រួសារ ឬស្មើនឹងជិត ៥ ៥០០នាក់ក្នុងឃុំនេះ។ ក្នុងចំណោមសេវាទាំងនោះ មានចំនួន១០ប្រភេទសេវា ទាក់ទងនឹងការចុះបញ្ជីអត្រានុកូលដ្ឋាន និងចំនួន១៣ប្រភេទសេវា ពាក់ព័ន្ធនឹងការចេញលិខិតអនុញ្ញាតផ្សេងៗ។
សេវារដ្ឋបាលទាំង២៣ប្រភេទនេះ ភាគច្រើនតម្រូវឱ្យពលរដ្ឋរង់ចាំរយៈពេល ៣ថ្ងៃ និងមួយចំនួនទៀត ត្រូវរង់ចាំដល់ទៅ៧ថ្ងៃ ទើបអាចមកទទួលយកលិខិតបញ្ជាក់ពីអាជ្ញាធរ យកទៅប្រើការបាន។ ប៉ុន្តែដោយសារតែបង្កើនប្រសិទ្ធភាពសេវាលឿន រហ័ស ដល់ប្រជាពលរដ្ឋក្នុងឃុំខ្លួន លោក ហៃ សេង តែងតែណែនាំឱ្យមន្ត្រីខ្លួន ឱ្យពន្លឿនការផ្តល់សេវាជូនពលរដ្ឋ និងមិនទុកឱ្យពលរដ្ឋ រង់ចាំដល់ថ្ងៃកំណត់នោះទេ។ «យើងត្រូវធ្វើយ៉ាងម៉េច ដើម្បីឱ្យពលរដ្ឋទទួលបានសេវាឆាប់រហ័ស។ នៅតារាងយើងដាក់ថា ឯកសារចុះសំបុត្រកំណើតអ៊ីចឹង រយៈពេលប៉ុន្មានថ្ងៃ? ជួនកាលមានការស្នើសុំផ្សេងៗច្រើនពេក ក៏យើងសម្រេចឱ្យគាត់មិនលើស៣ថ្ងៃទេ។ បើកាលណាអត់ច្រើនទេ យើងធ្វើឱ្យគាត់ភ្លាម មិនបាច់ឱ្យគាត់ចាំទេ។ យ៉ាងច្រើន ១០-២០នាទី អីបានហើយ»។ នេះជាការរៀបរាប់របស់លោកមេឃុំ ហៃ សេង។
ពលរដ្ឋ ជុំវិញការទៅទទួលសេវា នៅរដ្ឋបាលជុំ ត្រូវបានលោក មើលឃើញថា ប្រជាពលរដ្ឋភាគច្រើន មានការយល់ដឹងអំពីនីតិវិធី និងបានដឹងជាស្រេចអំពីឯកសារអមពាក់ព័ន្ធ ដែលខ្លួនត្រូវភ្ជាប់ នៅពេលស្នើសុំសេវានានា។ មិនតែប៉ុណ្ណោះ ប្រជាពលរដ្ឋ ក៏យល់ដឹងពីតម្លៃសេវាដែលខ្លួនត្រូវបង់ និងរយៈពេលដែលខ្លួនត្រូវទទួលបានឯកសារស្នើសុំនោះ យកទៅប្រើប្រាស់ផងដែរ។
សម្រាប់លោកមេឃុំ ការបិទតារាងតម្លៃសេវានីមួយៗ ក៏ដូចជារយៈពេលកំណត់នៃការផ្តល់សេវារួចរាល់ នៅសាលាឃុំយ៉ាងដូច្នេះ ក៏ជាការចូលរួមចំណែក ក្នុងការកសាងភាពស្អាតស្អំ នៅក្នុងការដំណើរការនៃការផ្តល់សេវារបស់មន្ត្រីរដ្ឋបាលឃុំ ទៅកាន់ពលរដ្ឋផងដែរ។ នេះជាការបញ្ជាក់របស់លោក ហៃ សេង ដោយលោកមេឃុំបញ្ជាក់ដូច្នេះ៖ «គាត់បានអរគុណ ព្រោះគាត់ដឹងហើយ មន្ត្រីយើងប្រាប់ថាសេវាហ្នឹង អត់អស់ថ្លៃសេវាទេ។ គាត់ដឹង! តារាងថ្លៃសេវា ដាក់ប៉ុនណាណី នៅសាលាឃុំ»។
យ៉ាងណាក៏ដោយ ក្នុងអំឡុងវិបត្តិកូវីដ-១៩ លោកមេឃុំ ក៏បានឱ្យដឹងដែរថា ការផ្តល់សេវាសាធារណៈមួយចំនួនបានថយចុះ ដូចជាការចុះលិខិតអាពាហ៍ពិពាហ៍ និងការផ្តល់លិខិតបញ្ជាក់ភាពនៅលីវជាដើម។ ការថយចុះ ព្រោះតែអំឡុងកូវីដ-១៩ រីករាលដាលខ្លាំង រដ្ឋាភិបាលសម្រេចផ្អាករៀបចំពិធីអាពាហ៍ពិពាហ៍ បុណ្យទាន ដែលមានលក្ខណៈប្រមូលផ្តុំមនុស្សច្រើន។ លោកមេឃុំបន្ថែមថា៖ «ក្នុងអំឡុងពេលនៃការកើតកូវីដ-១៩ហ្នឹង ថយចុះដោយសារថា យើងបិទរៀបចំពិធីការ ណិងបុណ្យទានអ៊ីចឹង វាថយចុះអស់ហ្នឹង។ ចំណែកសេវារដ្ឋបាលផ្សេងពីហ្នឹង គឺដំណើរការធម្មតាទេ ព្រោះជាតម្រូវការចាំបាច់ ដូចសំបុត្រកំណើតអ៊ីចឹង មិនអាចហួសពេលវេលាបានទេ ព្រោះគេកំណត់ថា កើតមិនឱ្យហួស១ខែ។ ស្លាប់មិនឱ្យហួស១៥ថ្ងៃ»។
ក្នុងនាមជាមេឃុំជុំគ្រៀល លោក សេង ហៃ បានប្តេជ្ញាជំរុញ និងលើកទឹកចិត្តមន្ត្រីរបស់ខ្លួន ឱ្យបង្កើន និងពន្លឿនការផ្តល់សេវារដ្ឋបាល ដល់ប្រជាពលរដ្ឋឱ្យកាន់តែល្អប្រសើរបន្ថែមទៀត៕
អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុង អត្ថបទនេះ គឺជាការទទួលខុសត្រូវរបស់ស្មេរ /ផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)