តារាបង្ហាញម៉ូត កែ ច័ន្ទកេសី ទើបតែបើកដំណើរការសាលា The Walk Fit ដែលផ្តល់ការបង្ហាញសិស្សលើជំនាញដើរម៉ូតបែប Fashion។ ប្រឡូកក្នុងអាជីពជាអ្នកបង្ហាញម៉ូត ជិត១១ឆ្នាំ កញ្ញា កែ ច័ន្ទកេសី បានចាប់ផ្តើមពីអ្នកហាត់រៀនធម្មតា បន្ទាប់មកជាអ្នកដើរម៉ូតអាជីព និងក្លាយជាគ្រូបង្ហាត់ជំនាញដើរម៉ូតនេះតែម្តង។ ក្រៅពីនេះអ្នកបង្ហាញម៉ូត ​វ័យ៣៣ឆ្នាំរូបនេះ ក៏មានទេពកោសល្យផ្នែកច្រៀង សម្តែង និងពិធីការិនីផងដែរ។ 
 

តាមរយៈកម្មវិធី «គំនិតថ្មី» នៃសារព័ត៌មានថ្មីៗ កញ្ញា កែ ច័ន្ទកេសី បញ្ជាក់ថា៖ «ដំបូងឡើយគឺទទេស្អាតដូចក្រដាសសអ៊ីចឹង​ ប៉ុន្តែដោយក្តីស្រលាញ់ ទេពកោសល្យ ឆន្ទៈមួយទៀត។ខ្ញុំបានប្រឡូកចូលមកភ្លាម គឺខ្ញុំ​ស្រលាញ់បំផុតគឺវិស័យ Model។ តែខ្ញុំអត់ទាន់ស្គាល់ Modelជាអ្វីទេ។ ពេលដែលខ្ញុំដាក់ពាក្យប្រកួតចូលមក គឺខ្ញុំបានរៀនសូត្រ ហ្វឹក​ហាត់រៀនពីគ្រូ​​បរទេសផ្សេងៗ និងខ្មែរ។ បន្ទាប់មកខ្ញុំ research (ស្រាវជ្រាវ) ខ្លួនឯង ថាត្រូវធ្វើម៉េច ឱ្យគេស្គាល់ថា ខ្ញុំគឺជាខ្ញុំ។ មិនមែនថា គ្រូគាត់បង្រៀនមកបែបហ្នឹងហើយ អ៊ីចឹងរៀនតាមបែបគាត់ យើងត្រូវចេះច្នៃ  ចេះច្នៃថា តើយើងដើររបៀបម៉េច ឱ្យឃើញឡូយ ឱ្យឃើញដែលជាយើង»។

 

ទន្ទឹមនឹងនេះ អ្នកបង្ហាញម៉ូតដែលមានស្រុកកំណើតក្នុងខេត្តកំពង់ធំរូបនេះ ក៏តែងតែខិតខំពង្រឹងសមត្ថភាព បង្កើតភាពទាក់ទាញ បង្កើតគំនិត និងស្ទីលដើរផ្ទាល់ខ្លួន រហូតមានការទទួលស្គាល់ពីទេពកោលស្យ នៅក្នុងអាជីពនេះដូចសព្វថ្ងៃ។ ទោះជាយ៉ាងនេះក្តី កញ្ញា កេសី ដែលមានសម្បុរខ្មៅស្រអែម ក៏គេចមិនផុតពីការរើសអើង ពីមនុស្សមួយចំនួនដែរ នៅក្នុងវិថីសិល្បៈនេះ។ ​

«កាលពីមុន គឺខ្ញុំចោទទៅលើពណ៌សម្បុររបស់នាងខ្ញុំ បាក់ទឹកចិត្ត ជាមួយពណ៌សម្បុរច្រើនឆ្នាំដែរ។ គេរើសអើងថាពណ៌សម្បុរខ្មៅ ស្រអែមចឹង វាអត់សមនឹងផលិតផលដូចជាឡេ ដូចជាអីទេ។ ប៉ុន្តែខ្ញុំប្រាប់ខ្លួនឯងវិញថា ខ្ញុំត្រូវទទួលយកអ្វីដែលជាខ្ញុំ។ ទោះបីជា ផលិតផលផ្សាយនៅលើស្បែក និយាយពីផលិតឡេ គេអត់ទទួល ក៏ខ្ញុំមានផលិតផលផ្សេងទៀតសម្រាប់បង្ហាញដែរ។ អ៊ីចឹង ​សំខាន់យើងទទួលយកខ្លួនឯង ឱ្យបានសិន»។ នេះជាការរំឭកពិសោធន៍ពីការរើសអើង ដែលកញ្ញា កែ ច័ន្ទកេសី ធ្លាប់បានជួបប្រទះ ក្នុងអាជីពនេះ។ 

 
 

​តារាបង្ហាញម៉ូតរូបនេះ ​បាន​ឱ្យដឹងថា ទម្រង់នៃការដើរម៉ូតមានច្រើនប្រភេទ ក្នុងនោះមានដូចជាការដើរ​បែបបវរកញ្ញា បែបខ្មែរ, ​បែប Cat Walk​ , បែប Lava Walk និងបែប​អ្នកបង្ហាញម៉ូតសម្លៀកបំពាក់​(Fashion) ជាដើម ។ យ៉ាងណាក៏ដោយ សម្រាប់អ្នកបង្ហាញម៉ូតអាជីព កែច័ន្ទកេសី ទម្រង់ដើរម៉ូតទាំងនោះអាចប្រែប្រួល អាស្រ័យ​លើអ្នកច្នៃម៉ូតសម្លៀក​បំពាក់ និងការផ្លាស់ប្តូ(Update) ពីមួយឆ្នាំទៅមួយឆ្នាំ ទៅតាមបែបផែននៃកម្មវិធីផងដែរ។ ដោយមើលឃើញពីឱកាសទូលំទូលាយ និងទីផ្សារការងារច្រើន ក្នុងពេលបច្ចប្បន្ន ម្ចាស់សាលា The Walk Kit ​លើកទឹកចិត្តដល់យុវតីជំនាន់ក្រោយ ដែល​ស្រលាញ់អាជីពជាអ្នកបង្ហាញម៉ូតថា គួរខិតខំពង្រឹងនូវសមត្ថភាព ទាំងចំណេះជំនាញពីលោកគ្រូ អ្នកគ្រូ ​ស្រាវជ្រាវ និងហាត់រៀនដោយខ្លួនឯងបន្ថែម។ កញ្ញា កែ ច័ន្ទកេសី ក៏ជំរុញឱ្យអ្នកជំនាន់ក្រោយ ប្រឹងសង្វាតចំណេះដឹង និងរៀបចំឥរិយាបថ អត្តចរិកឱ្យគត់មត់​ផងដែរ៕