លោក មួយ លី ច្នៃឡានមួយគ្រឿងពីឈើ ដោយចម្លងតាមឡានយោធា M151

ជាតិ

រថយន្ត

06, Jun 2022 , 7:59 pm

រូបភាព

ភ្នំពេញ៖ លោក មួយ លី បានធ្វើរថយន្ដមួយគ្រឿងពីឈើ ដោយចម្លងតាមឡានយោធា M151 ម៉ូឌែល A2 ពីឆ្នាំ១៩៦៨។ ឯឡានរបស់លោក លី វិញ គាត់យកសាស៊ីដែកពីរថយន្ដបុរាណ M151 A2 មួយគ្រឿង មកជំនួសទាំងទ្រង់ទ្រាយ ទាំងកៅអី ទាំងឧបករណ៍ ទាំងតាប្លូ ទាំងដែកកាង ដោយឈើក្រញ៉ូងវិញ។ គ្រឿងបង្គុំដែលដូចរថយន្ត M151 A2 ដើមមានពីប៉ែល និងសោរ ដល់ធុងសាំងបន្ថែម។ លើសពីគ្រាន់តែដាក់ឈើធម្មតា លោក លី បានឆ្លាក់ឈើតែម្ដង ពីព្រោះកាលពីពេលកំពុងច្នៃប្រឌិត តាំងពីឆ្នាំ២០០៣ រហូតដល់ឆ្នាំ២០០៨ នាយកក្រុមហ៊ុនថ្មដានេះ ចង់ធ្វើឡាននេះឱ្បានដូចក្ដីស្រមៃរបស់គាត់ ដោយគិតគ្រប់ផ្នែកទាំងអស់យ៉ាងលម្អិត។ នៅវ័យ៥២ឆ្នាំ លោក លី ប្រើឡានដ៏ប្លែករបស់គាត់នេះ ជាប្រចាំ។

សូមរំឭកថា កាលពីដើមប្រវត្តិឧស្សាហកម្មរថយន្ដ គេធ្វើឡានពីឈើ ពីព្រោះសម័យនោះ គេគ្រាន់តែយកគំរូពីរទេះសេះ។ ដើមសតវត្សទី២០ គ្រប់ក្រុមហ៊ុនរថយន្ដ ផ្តើមប្រើលោហធាតុច្រើនទៅៗ និងមកដល់ទសវត្សរ៍១៩៧០ គេប្រើជ័រច្រើនវិញ។ នៅសល់ម៉ាកតែមួយគត់ដែលនៅតែធ្វើសាស៊ីមួយផ្នែក ពីឈើ គឺMORGAN។

ដើម្បីជ្រាបច្បាស់ សូមអញ្ជើញលោកអ្នកនាង ទស្សនាបទយកការណ៍ដែលរៀបចំដោយ នាយ យ៉ាន នៃសារព័ត៌មានថ្មីៗដូចតទៅ៖

ក្រុមហ៊ុនអាម៉េរិកាំង FORD បានចាប់ផ្ដើមសិក្សា រថយន្ដ M151 ឆ្នាំ១៩៥៩។ ត្រូវបានចាប់ផ្ដើមផលិតឆ្នាំ១៩៥៩វិញ។ ហើយត្រូវបានផ្ទេរការផលិត ទៅឱ្យក្រុមហ៊ុន KAISER និងបន្ទាប់មក ទៅឱ្យក្រុមហ៊ុន AM General ដែលបញ្ចប់ផលិត M151 ឆ្នាំ១៩៨២។ ឆ្នាំ១៩៨៨ ត្រូវបានផលិត ១ ០០០គ្រឿងថែមទៀត សម្រាប់ទាហានប៉ាគីស្ថាន។ រយៈពេលជិត៣០ឆ្នាំ ត្រូវបានផលិតអស់ ១០០ ០០០ គ្រឿង។ 151 គឺជាប្រភេទ ហើយអក្សរ M មកពីអក្សរកាត់ MUTT ដែលមានន័យថា Military Utility Tactical Truck។ ដូច្នេះគឺជាឡានសម្រាប់យោធា។ វាបង្វិលកង់ទាំង៤ ដើម្បីជិះលើផ្លូវមានឧបសគ្គ ឬក្រៅផ្លូវ។ អាចទុកឈ្មោះ M ថាជាម៉ាកក៏បាន។ ក៏ប៉ុន្តែវាមិនមែនជាម៉ាកចុះបញ្ជីយ៉ាងត្រឹមត្រូវ ដូចម៉ាករថយន្ដស៊ីវិលនោះទេ។ រថយន្ដ M151 ដែលលោក លី ចម្លងគឺជាម៉ូឌែល A2 ដែលពីដើមមានទម្ងន់ត្រឹម ១ ១០០គីឡូក្រាម។ ម៉ូឌែល A2 បានជំនួសម៉ូឌែល A1 ឆ្នាំ១៩៦៨។ ក្រៅពីប្រភេទ M151 ដែលជាប្រភេទសាមញ្ញធម្មតា ក៏គេបានបង្កើតប្រភេទផ្សេងៗ ដែលបំពាក់ដំបូលក្រណាត់កៅស៊ូ ស្ទើរតែទាំងអស់ ដូចជា M718 (សង្ក្រោះបន្ទាន់) M825 (ដឹកកាំភ្លើងធំ) MRC108 (ដឹកឧបករណ៍គមនាគមន៍)។ ល៕