ក្នុងសុន្ទរកថាទៅកាន់កិច្ចប្រជុំពេញអង្គកិច្ចប្រជុំកំពូលសន្តិសុខអាស៊ី ដែលស្គាល់ជាទូទៅថា​ កិច្ចសន្ទនា Shangri-La សម្ដេច ទៀ បាញ់ រដ្ឋមន្រ្តីការពារជាតិកម្ពុជា បាននិយាយការពារការអភិវឌ្ឍមូលដ្ឋានសមុទ្ររាម ដែលជាជំនួយរបស់ចិន។ ការអភិវឌ្ឍមូលដ្ឋាននេះ ធ្វើឱ្យកម្ពុជារងព្យុះរិះគន់ខ្លាំងពីសំណាក់អាម៉េរិក ដែលបារម្ភថា ចិននឹងប្រើមូលដ្ឋានជាប់ឈូងសមុទ្រថៃផ្ដាច់មុខតែម្ដង។

 

តបនឹងរឿងនេះ ប្រមុខការពារជាតិកម្ពុជា បញ្ជាក់ជាថ្មីពីជំហររបស់កម្ពុជាដែលជារដ្ឋឯករាជ្យ អធិបតេយ្យ និងមានសិទ្ធិសម្រេចវាសនារបស់ខ្លួនតាមអ្វីដែលមានចែងក្នុងរដ្ឋធម្មនុញ្ញ។ បើតាមសម្ដេច ទៀ បាញ់ កម្ពុជារងការចោទប្រកាន់មិនចេះមិនចេះហើយថា នឹងអនុញ្ញាតឱ្យបរទេសប្រើមូលដ្ឋាននេះផ្ដាច់មុខ។ សម្ដេច ចាត់ទុកការចោទដែលគ្មានមូលដ្ឋាន តែមានមន្ទិល ជាការប្រមាថលើកម្ពុជា។

 

«ជាថ្មីម្ដងទៀត ខ្ញុំសូមធានាថា កម្ពុជាជាម្ចាស់មូលដ្ឋានរាម ហើយការអភិវឌ្ឍមូលដ្ឋានេះ មិនមែនជាការគំរាមដល់សន្តិសុខប្រទេសណា ឬតំបន់ណាមួយ មិនថាជិត ឬឆ្ងាយឡើយ។ យើងចាត់ទុកការចោទប្រកាន់នេះ ជាលេសដើម្បីបំពានប្រយោជន៍កម្ពុជា។» រដ្ឋមន្រ្តីការពារជាតិកម្ពុជាបន្តបែបនេះ។

 

បើតាមសម្ដេចទៀ បាញ់ ការអភិវឌ្ឍមូលដ្ឋានរាម ជាផ្នែកមួយនៃការកសាងសមត្ថភាពកងយោធពលខេមរភូមិន្ទ។ លោកថ្លែងទៀតថា កម្ពុជានឹងបន្តបង្កើនសមត្ថភាពកងទ័ពរបស់ខ្លួន ដោយមិនត្រឹមតែដើម្បីការពារអធិបតេយ្យ និងបូរណភាពទឹកដីខ្លួនឡើយ តែដើម្បីបំពេញការងារផ្សេងទៀតឱ្យជោគជ័យដូចជាការប្រឆាំងភេរវកម្ម និងឧក្រិដ្ឋឆ្លងដែន ការស្រាវជ្រាវ និងរុករក និងប្រតិបត្តិការរក្សាសន្តិភាពផងដែរ។ 

 

លើសពីនោះ ប្រមុខការពារជាតិកម្ពុជា ក៏ថ្លែងប្រាប់អ្នកចូលរួមដែលជារដ្ឋមន្រ្តីការពារជាតិប្រទេសក្នុងតំបន់ និងមកពីពិភពលោកពីការពង្រឹងសមត្ថភាពកងទ័ពជើងទឹក ជើងអាកាស និងប្រព័ន្ធការពារអាកាស សំដៅការពារដែនទឹក និងដែនអាកាសរបស់ខ្លួន។ សម្ដេចក៏លើកឡើងពីការទទួលសព្វាវុធធុនធ្ងន់នាពេលថ្មីៗនេះដែរ៕