ជាតិ
រថយន្ត
ការសិក្សា៖ អឺរ៉ុបមានករណីលួចរថយន្តកើនឡើងខ្ពស់ ជាពិសេសអ៊ីតាលី ខណៈបារាំងមានរាល់ថ្ងៃ
× ការសិក្សាមួយរបស់ក្រុមអ្នកជំនាញផ្នែកធានារ៉ាប់រងយានយន្ត បានបង្ហាញថា បណ្តាប្រទេសនៅទ្វីបអឺរ៉ុប មានករណីលួចរថយន្តកើនឡើងខ្ពស់។ គេហទំព័រ Confused.com បានវាយតម្លៃរបាយការណ៍ តាមរយៈការប្រៀបធៀបចំនួនពលរដ្ឋនៃបណ្តាប្រទេសនីមួយៗ ដើម្បីស្វែងរកចំនួនលួចជាមធ្យមក្នុងចំណោមមនុស្ស១០ម៉ឺននាក់។
ការសិក្សាបានបង្ហាញថា អ៊ីតាលី មានតួលេខករណីលួចរថយន្តច្រើនជាងគេនៅទ្វីបអឺរ៉ុប ដោយជាមធ្យមមាន២៧៦ករណីរៀងរាល់ឆ្នាំ។ ប្រៀបធៀបទៅនឹងប្រទេសដែលមានចំនួនពលរដ្ឋប្រហាក់ប្រហែលគ្នា តួលេខនេះ មាន៨០ភាគរយច្រើនចក្រភពអង់គ្លេស (១៥៣ករណី) និង៥ភាគរយច្រើនជាងបារាំង (២៦១ករណី) សម្រាប់មូលដ្ឋានក្នុងរង្វង់មនុស្ស១០ម៉ឺននាក់។
សារធារណរដ្ឋឆែក ស្ថិតនៅលំដាប់លេខពីរ ដោយមានជាមធ្យម ២៧៤ករណី។ សម្រាប់តំបន់ស្កង់ឌីណាវ ស៊ុយអែត មានតួលេខដ៏គួរឲ្យព្រួយបារម្ភ ដោយមាន២៦៦ករណី ដែលជាចំនួនដ៏ខ្ពស់ ខណៈហ្វាំងឡង់ មាន១៣៩ករណី និងន័រវេសមាន១១២ករណី ក្នុង១ឆ្នាំលើចំនួនពលរដ្ឋ១០ម៉ឺននាក់ដូចគ្នា។
បារាំង ស្ថិតនៅលេខ៤លើតារាង ដោយមាន២៦១ករណីក្នុង១ឆ្នាំ ហើយតួលេខនេះ មានច្រើនដាច់ឆ្ងាយយពីប្រទេសជិតខាងរបស់ខ្លួន ដោយលើសអាល្លឺម៉ង់ដល់ទៅ២៧៦ភាគរយ និងលើសស្វីសចំនួន២០៥ភាគរយ។
អ្វីដែលគួរឲ្យកត់សម្គាល់នោះ របាយការណ៍ប្រចាំថ្ងៃបង្ហាញថា បារាំងករណីលួចនៅទូទាំងប្រទេសបារាំង មានជាមធ្យម៤៧៤ព្រឹត្តិការណ៍ ដែលអាចនិយាយបានថា ២០លើកក្នុង១ម៉ោង ឬ១លើករៀងរាល់៣នាទីម្តង។
ដាណឺម៉ាក ជាប្រទេសដែលរងគ្រោះដោយសារអំពើចោរកម្មរថយន្តតិចជាងគេ ដោយមានជាមធ្យម៥ករណីក្នុង១ឆ្នាំចំណោមមនុស្ស១០ម៉ឺននាក់។ រូម៉ានី មានតែ១៤ករណី, លិចតិញស្តាញ និងក្រូអាស៊ី មានតែ២២ករណី ជារៀងរាល់ឆ្នាំដូចគ្នា។
លោក Alex Kindred អ្នកជំនាញនៅ Confused.com បានលើកឡើងថា ករណីលួចរថយន្តមានជារៀងរាល់ថ្ងៃនៅអឺរ៉ុប ដូច្នេះមនុស្សទាំងអស់គ្នាត្រូវតែភ្ញាក់ខ្លួនបង្កើនសុវត្ថិភាពរបស់យានយន្តរបស់ខ្លួន។ លោកបានណែនាំឲ្យអនុវត្តវិធានការសុវត្ថិភាពមួយចំនួនដូចជា ការចាក់សោរចង្កូត, ការដាក់ឧបករណ៍ប្រកាសអាសន្ន និងការប្រើប្រាស់លេខកូដសម្ងាត់ផ្សេងៗ ជាពិសេសការចតនៅទីតាំងសុវត្ថិភាព៕
© រក្សាសិទ្ធិដោយ thmeythmey.com