៥ខែក្រោយCC-FTAចូលធរមាន កម្ពុជានាំទំនិញទៅប្រទេសចិន ជិត៥២០លានដុល្លារប៉ុណ្ណោះ ដែលធ្លាក់ចុះ ៦,៩ភាគរយ។  ជាមួយនឹងគ្នានេះ  ចិននាំទំនិញចូលកម្ពុជាវិញ មានទំហំរហូតដល់ ៤ ៤៧០លានដុល្លារ ដែលកើនក្នុងអត្រា ៣១,៥ភាគរយ ធៀបនឹងពេលដូចគ្នា កាលឆ្នាំ២០២១។​
 

ការនាំចេញរបស់កម្ពុជាទៅចិនធា្លក់ចុះ អាចបណ្តាលមកពី កង្វះទូត្រជាក់សម្រាប់ផ្ទុកកសិផល ដែលបណ្តាលឱ្យទូត្រជាក់ឡើងថ្លៃខ្លាំងរហូតដល់ជាង៣ដង បើធៀបពេលមុនវិបតិ្តកូវីដ-១៩។ ចំពោះវិធានការរបស់ចិន ត្រួតពិនិត្យទំនិញនាំចូល ដើម្បីទប់ស្កាត់ការរាលដាលឆ្លងកូវីដ-១៩ ស្របតាមយុទ្ធសាស្រ្តគ្មានការរាលដាលឆ្លងនូវកូវីដ-១៩ពីប្រទេសខាងក្រៅនោះ ក៏អាចជាកត្តាប្រឈមមួយទៀតសម្រាប់កម្ពុជា ក្នុងការនាំចូលទំនិញចូលទីផ្សារប្រទេសចិន ផងដែរ។ 

 

កិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិន(CC-FTA) បានចូលជាធរមាននៅថ្ងៃទី១មករា ឆ្នាំ២០២២។ យោងតាមការរៀបចំកិច្ចព្រមព្រៀងពាណិជ្ជកម្មសេរីនេះ សមាមាត្រលើកលែងពន្ធលើទំនិញពាណិជ្ជកម្ម នៃភាគីទាំងពីរមានជាង៩០ភាគរយ។ សម្រាប់ការនាំចេញរបស់កម្ពុជាទៅប្រទេសចិន ត្រូវបានរំពឹងថា នឹងមានការកើនឡើងប្រមាណ២៥ភាគរយ ជារៀងរាល់ ឬលើសពីនេះ តាមរយៈកិច្ចព្រមព្រៀងពាណិជ្ជកម្មសេរីនេះ។ 

 

 

កន្លងមក លោក សុខ សុភ័ក្រ្ត រដ្ឋលេខាធិការក្រសួងពាណិជ្ជកម្ម បានអះអាងថា ទំនិញកម្ពុជាជាង៣០០មុខ អាចនាំទៅចិនបានដោយមិនគិតពន្ធ នៅពេលកិច្ចព្រមព្រៀងពាណិជ្ជកម្មសេរីកម្ពុជា-ចិន ចូលជាធរមាន។ លោកបានបញ្ជាក់ថា ក្នុងចំណោមមុខទំនិញជាង៣០០មុខនេះ គឺមានផលិតផលកសិកម្ម៩៥ភាគរយ ត្រូវរួចពន្ធសម្រាប់ការនាំចេញទៅចិន។ ប៉ុន្តែ ផលិតផលគ្រឿងចក្រ និងយានយន្តផ្សេងៗវិញ ចិននៅតែបន្តយកពន្ធនាំចូលដដែល។

 

ស្ថិតិពាណិជ្ជកម្មរបស់អគ្គនាយកដ្ឋានគយនិងរដ្ឋាករកម្ពុជា បានបង្ហាញថា ៥ខែដើមឆ្នាំ២០២២ កម្ពុជាមានទំហំពាណិជ្ជកម្មជាមួយបណ្តាប្រទេសក្នុងពិភពលោក  ប្រមាណ ២២,៤ពាន់លានដុល្លារ ដែលកើនជិត២០ភាគរយ។ ក្នុងនោះទីផ្សារនាំចេញធំជាងគេរបស់កម្ពុជា គឺសហរដ្ឋអាម៉េរិក មានទំហំទឹកប្រាក់​ជាង៣,៧ពាន់លានដុល្លារ ខណៈកម្ពុជានាំទំនិញពីប្រទេសចិនច្រើនជាងគេវិញ៕