ក្រោយឈ្នះពានសម្ដេច ហ៊ុន សែន ថ្នាក់ខេត្ត ឆ្នាំ២០២២ ក្រុមភ្នំពេញហ្គាឡាក់ស៊ី ជួបបញ្ហាកីឡាករជាច្រើនរូប ដោយមានបញ្ហារបួស និងការពិន័យដោយកាតលឿង ២ និងកាតក្រហម។ លោក ប៉ូ គីនណាក់  អ្នកចាត់ការទូទៅក្លិបភ្នំពេញហ្គាឡាក់ស៊ីបានប្រាប់សារព័ត៌មានថ្មីៗតាមទូរស័ព្ទ ថា កីឡាករ ៤រូប មានបញ្ហារបួស ហើយមិនអាចចូលរួមប្រកួតបាន  និងកាតក្រហម២រូប ខណៈកីឡាករ មួយចំនួនទៀត មានរបួសដែរ តែអាចបន្ដប្រកួតបាន។ 
 

«ពួកគេ នៅប្រកួតបានបើទោះជាកម្រិតក្រុម នៅទាបជាងគូប្រកួត ព្រោះកីឡាករយើង មានស្មារតីប្រកួត និងសាមគ្គីខ្ពស់។ ខ្ញុំមានភាពជឿជាក់លើក្រុម ដោយក្រុមមានស្មារតីប្រកួត សាមគ្គីភាព ក្នុងការប្រកួត។ យើងនៅមានកម្រិតទៀបជាងគេចំពោះបច្ចេកទេស តែកម្រិតនៃស្មារតីប្រកួតយើងមិនទាបជាងគេទេ។»។ លោក ប៉ូ គីណាក់ បាននិយាយដូច្នេះ ។
 

គួរបញ្ជាក់ផងដែរថា ការប្រកួតពានសម្ដេច ហ៊ុន សែន លើកទី១៦ ថ្នាក់ខេត្ត នាថ្ងៃទី២២ ខែមិថុនា មាន៣គូ។ ភ្នំពេញហ្គាឡាក់ស៊ី ប្រកួតជាមួយ អាស៊ីអឺរ៉ុបយូណាយធីត នៅទីលានវិទ្យាល័យបឹងត្របែក វេលាម៉ោង ៣:៣០នាទីរសៀល ខណៈពេល សូលទីឡូអង្គរ បើកទ្វាកីឡដ្ឋានហនុមាន ទទួលក្រុមបាល់ទាត់បន្ទាយមានជ័យ។ ទន្ទឹមគ្នានេះដែរ កីឡដ្ឋានខេត្តសៀមរាប ស្វាគមន៍ នូវជំនួបក្រុម ដែលមានទីតាំងនៅសៀមរាបពីរ គឺការប្រកួតរវៀង ក្លិបបាល់ទាត់សៀមរាប និងក្លិបបាល់ទាត់ណិចស្តិប៕