ពីនេះ ពីនោះ
តើបុរសខ្លាំង តេង ស៊ីវពីង មានចំណុចខ្លាំងអ្វីខ្លះដែលធ្វើឲ្យចិនរីកចម្រើន?
× ភ្នំពេញ៖« ឆ្មាសក៏ដោយឆ្មាខ្មៅក៏ដោយឲ្យតែចាប់កណ្ដុរបាននោះ គឺជាឆ្មាល្អ»នេះជាសម្ដីរបស់លោក តេង ស៊ាវពីង ជាអ្នកបដិវត្តន៍ពាណិជ្ជកម្មដ៏ពូកែម្នាក់របស់ប្រទេសចិន សម័យម៉ៅ សេទុង។ លោកគឺជាអ្នកប្រកាន់ទ្រឹស្ដីម៉ាក្សនិយមដ៏អស្ចារ្យ ជារដ្ឋបុរស ជាអ្នកយុទ្ធសាស្ត្រ យោធា និងជាអ្នកការទូតដ៏ជំនាញ។ មិនតែប៉ុណ្ណោះលោកគឺជាស្ថាប្យករដ៏ចំណាននៃសង្គមនិយមចិន ក្នុងការបើកទ្វារជើងមេឃចិន និងទំនើបកម្មប្រទេសចិនឲ្យក្លាយប្រទេសដ៏ខ្លាំងនៅលើពិភពលោក។
នៅក្នុងដំណើរកសាងប្រទេសចិន លោកតេង ស៊ាវពីង បានចាប់ផ្ដើម កសាងប្រទេសមួយនេះ ដោយចាប់ផ្ដើមពីជំហានទីមួយ គឺដោះស្រាយបញ្ហាស្បៀង បញ្ហាហូបឆ្អែត និងសម្លៀកបំពាក់គ្រប់គ្រាន់សមរម្យ។ ជំហាន់ទីពីរ ដោះស្រាយជីវិតក្នុងសង្គមរបស់ប្រជាជនឈានដល់ថ្នាក់កណ្ដាល។ ជំហានទីបី ប្រទេសចិន ឈានដល់កម្រិតជាប្រទេសអភិវឌ្ឍន៍មធ្យម និងមានតួនាទីពិតប្រាកដលើសកលលោក។ នេះគឺជាវិធីសាស្ត្ររយឆ្នាំរបស់ បុរសខ្លាំង តេង ស៊ាវពីង បានរៀបចំនិងស្ដារស្ថានភាពសេដ្ឋកិច្ចប្រទេសចិនពីការងារគ្រប់គ្រងតាមបែបសង្គមនិយម។
ដើម្បីស្ដារប្រទេសពីរបបគ្រប់គ្រងសង្គមតាមបែបសង្គមនិយម ដែលមានគំនិតចង់ឲ្យប្រជាជនធ្វើបដិវត្តន៍ដោយមិនឲ្យប្រជាជនហូបឆ្អែត និងមានជីវភាពសមរម្យ តេង ស៊ាវពីង បានផ្លាស់ប្ដូរទស្សនៈយល់ឃើញបែបនេះ ដោយលោកយល់ឃើញថា មានតែធ្វើឲ្យប្រជាជនបានហូបឆ្អែត ជីវភាពសមរម្យទេ ទើបអាចធ្វើឲ្យជាតិរឹងមាំបាន។
ហេតុផលនេះហើយ ទើបបានជា តេង ស៊ាវពីង បានដាក់ចេញកត្ដាគន្លឹះបីយ៉ាងជាចំណុចអត្តិភាពនិងជាចំណុចស្នូល ដើម្បីស្ដារស្ថានភាពរបស់ប្រទេសចិន តាមរយៈការធ្វើឲ្យមានទំនើបកម្មបួនយ៉ាង( កសិកម្មទំនើប ឧស្សាហកម្មទំនើប ការពារជាតិខ្លាំង និងទំនើប និងចុងក្រោយ វិទ្យាសាស្ត្របច្ចេកវិទ្យាទំនើប) ការកសាងសេដ្ឋកិច្ច និងកម្លាំងផលិតកម្ម។
វីរបុរសរបស់ប្រទេសចិនរូបនេះ បានអះអាងចំពោះស្ថានភាពចិនសម័យនោះថា សេដ្ឋកិច្ចគឺជាកត្តាមានសារៈសំខាន់បំផុតសម្រាប់បុព្វហេតុស្ដារស្ថានភាពប្រទេស ប្រការផ្សេងៗគឺត្រូវតែចំណុះ។ ប្រសិនបើដោះស្រាយបានបញ្ហាសេដ្ឋកិច្ច អ្វីៗផ្សេងទៀតក៏អាចដោះស្រាយបានដែរ។ អ្វីដែលរឹតតែធ្វើឲ្យបុរស់ វ័យចំណាស់រូបនេះស្ថិតជាប់បេះដូងប្រជាជនចិននោះគឺ លោកបានជួយស្វែងរកការងារជូនយុវជន លោកបានសុខចិត្តបាត់បង់កិត្តិយសក្នុងឆាកអន្តរជាតិ ដោយមិនទុកឲ្យប្រទេសមានភាពចលាចល និងប៉ះពាល់ដល់ផែនការទំនើបកម្មក្នុងរយៈបេល១០០ឆ្នាំរបស់លោក។
ដកស្រង់ពីសៀវភៅ៖ (សិល្បះនយោបាយ តេង ស៊ាវពីង, ឌួងរតនា)
© រក្សាសិទ្ធិដោយ thmeythmey.com