ពីនេះ ពីនោះ
ត្រីដៀប ត្រីឆ្តោជាប្រភេទត្រីតែមួយៈ ជំទង់ហៅត្រីដៀប ធំពេញវ័យហៅត្រីឆ្តោ
× ក្នុងវ័យជំទង់ហៅ ត្រីដៀប និងធំពេញវ័យហៅ ត្រីឆ្តោ មានឈ្មោះវិទ្យាសាស្ត្រ (Channa micropeltes) ឈ្មោះជាភាសាអង់គ្លេស Giant snakehead ។
វាជាប្រភេទត្រីទឹកសាប ដែលសាយភាយក្នុងតំបន់អាស៊ីអាគ្នេយ៍ ចាប់ពីទន្លេមេគង្គភាគខាងក្រោមក្នុងប្រទេសឡាវ «ព្រមទាំងដៃទន្លេផ្សេងៗ របស់វា ដូចជាទន្លេ សេបាំងហ្វៃ» នៅអាងទន្លេចៅប្រាយ៉ា និងទន្លេមេក្លង ក្នុងប្រទេសថៃ នៅទន្លេសាប ក្នុងប្រទេសកម្ពុជា និងនៅតំបន់ដីសណ្តទន្លេមេគង្គ ក្នុងប្រទេសវៀតណាម ។ ត្រីដៀប/ឆ្តោ មានប្រវែងដងខ្លួនអតិបរមា ១៣០ ស.ម វាចាប់កំណើតឡើងនៅតាមទន្លេរាក់ៗ វាលទំនាប តាមស្ទឹង ប្រឡាយ។
បឹងធំៗ ដែលមានទឹកនឹង ឬហូរយឺតៗ។ អាហារចម្បងរបស់ត្រីដៀប/ឆ្តោ គឺស៊ីត្រីផ្សេងៗ ប៉ុន្តែវាក៏ស៊ីពពួកចៃទឹក ឬសត្វល្អិតដែលរស់ក្នុងទឹកផងដែរ។ វាពង-កូននៅតាមស្ទឹង អូរ បឹងតូចៗ ដែលមានព្រៃលិចទឹក ឬរុក្ខជាតិដុះក្នុងទឹកក្រាស់ៗ។ ត្រីប្រភេទនេះ ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១២ ជាប្រភេទត្រីដែលមានការព្រួយបារម្ភតិចតួចដែលនឹងអាចផុតពូជ។ ត្រីដៀប-ឆ្តោ ត្រូវបានគេចាត់ទុកថា ជាប្រភេទត្រីដែលពុំសូវទទួលរងផលប៉ះពាល់ពីមជ្ឈដ្ឋានទូទៅ ប៉ុន្តែ ហាក់ដូចជារងផលប៉ះពាល់ដោយតំបន់ពីការបាត់បង់ទីជម្រក។
(អត្ថបទ Chhut Chheana និង និងរូបភាព Courtesy Zeb Hogan / USAID Wonders of the Mekong).
© រក្សាសិទ្ធិដោយ thmeythmey.com