ពីនេះ ពីនោះ
សង្រ្កាន្តឆ្នាំថ្មី
×![]()
ជាល្បែងម្យ៉ាងដែលស្ថិតនៅក្នុងចំណោមល្បែងប្រជាប្រិយខ្មែរជាច្រើន សម្រាប់លេងកម្សាន្តសប្បាយផង និងសម្រាប់ហាត់មើលអាការទឹកមុខរបស់មនុស្សផង។ ល្បែងនេះ អាចលេងបានចាប់ពីមនុស្សយ៉ាង៥នាក់ឡើងទៅ ដោយមានក្មេង ប្រុស-ស្រីជំទង់ៗ តែមានប្រុស គឺប្រុសសុទ្ធ និងស្រី គឺស្រីសុទ្ធ។ គេលេងល្បែងនេះនៅពេលទំនេរ គេលេងនៅពេលថ្ងៃក្រោមម្លប់ឈើ ឬទីវាលពេលមេឃត្រជាក់ក៏បាន។
ដំបូងគេត្រូវឲ្យមនុស្ស២នាក់ អង្គុយសណ្តូកជើងទាំងពីរ ជាជួរទន្ទឹមគ្នា និងផ្កាប់បាតដៃ ឬ ក្តោបដៃទាំងពីរ ដាក់លើក្បាលជង្គង់។ អ្នកឯទៀតដែលចូលរួមលេង គេចាត់ម្នាក់ជាអ្នកទាយ និងម្នាក់ទៀតកាន់ធ្យូងរឹង ១ដុំតូចល្មម ឬដុំក្រួសក៏បាន ដើរចាប់បើកបាត់ដៃ របស់អ្នកអង្គុយក្តោបដៃលើក្បាលជង្គង់នោះ ផ្អឹបៗ លៗ ដូចជាបម្រុងនឹងដាក់ធ្យូងទៅបាតដៃអ្នកទាំងនោះ រួចដាក់ធ្យូងនោះ ទៅក្នុងដៃនរណាម្នាក់ ក្នុងចំណោមពីរនាក់ហ្នឹងយ៉ាងរហ័ស បន្ទាប់មកឲ្យអ្នកទាយ ចាំទាយ។
កាលណាគេដាក់ធ្យងរួចហើយ អ្នកទាយ ក៏ទាយថា«ធ្យូងនៅក្នុងដៃអ្នកនេះ» ថាចំឈ្មោះអ្នកអង្គុយមួយណា ដែលខ្លួនយល់ថាធ្យូងនៅក្នុងដៃរបស់គេ។ ហើយអ្នកទាយនោះ ទាយត្រូវមានសិទ្ធិកាន់ធ្យូងលាក់ម្តង ឯអ្នកដែលត្រូវគេលាក់ធ្យូងក្នុងដៃរួចហើយនោះ ក្រោកឈរទៅចាំទាយធ្យូងវិញ និងអ្នកដែលកាន់ធ្យូងលាក់គ្រាមុននោះ មកអង្គុយសណ្តូកជើងត្រង់កន្លែងដែលអ្នកក្រោកនោះវិញ តែបើទាយមិនត្រូវទេ អ្នកដែលលាក់ធ្យូងនោះ ត្រូវកាន់ធ្យូងលាក់តទៅទៀត៕
ដកស្រង់ចេញពីសៀវភៅ៖ «ល្បែងប្រជាប្រិយខ្មែរ» ដែលរៀបរៀងដោយ៖ លោក ចាប ពិន អ្នកស្រី ពេជ្យ សល់, លោក លី ធាមតេង និង ស្តើង ឆូរ នៃក្រុមជំនុំទំនៀមទម្លាប់ខ្មែរ(ឆ្នាំ១៩៦៤)
Tag:
ល្បែងប្រជាប្រិយ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
