ឱកាសប្រកួតប្រជែងស្នាដៃសម្រាប់ពានរង្វាន់អក្សរសិល្ប៍ទន្លេមេគង្គលើកទី៩

ជាតិ

ឱកាសប្រកួតប្រជែងស្នាដៃសម្រាប់ពានរង្វាន់អក្សរសិល្ប៍ទន្លេមេគង្គលើកទី៩

21, Apr 2018 , 7:30 pm

រូបភាព

ដោយ: ប៉ូ សាគុន

សមាគមអ្នកនិពន្ធខ្មែរ ប្រកាសជ្រើសរើសស្នាដៃតែងនិពន្ធរឿងខ្លី និងកំណាព្យ ដើម្បីប្រកួតប្រជែងយកពានរង្វាន់អក្សរសិល្ប៍ទន្លេមេគង្គលើកទី៩ ឆ្នាំ២០១៨ ដែលនឹងប្រារព្ធនៅប្រទេសវៀតណាម។ បេក្ខជនអាចជ្រើសរើសសរសេររឿងខ្លី ឬ កំណាព្យ មួយណាក៏បានតាមជំនាញរបស់ខ្លួន។

ក្នុងគោលបំណងថែរក្សា និងលើកស្ទួយតម្លៃអក្សរសិល្ប៍ជាតិខ្មែរ និងរឹតចំណងសាមគ្គីភាព មិត្តភាព កិច្ចសហប្រតិបត្តិការជាមួយប្រទេសតាមដងទន្លេមេគង្គ(ចិន ភូមា ថៃ ឡាវ កម្ពុជា និង វៀតណាម) សមាគមអ្នកនិពន្ធខ្មែរ នឹងរៀបចំប្រឡងជ្រើសរើសស្នាដៃតែងនិពន្ធស្នាដៃ រឿងខ្លី និង កំណាព្យ ពានរង្វាន់អក្សរសិល្ប៍ទន្លេមេគង្គលើកទី៩ ឆ្នាំ២០១៨ ដែលនឹងប្រារព្ធនៅប្រទេសវៀតណាម។

បេក្ខជនត្រូវសរសេរប្រធានបទ«ជីវិត និងនិរន្តរភាពទន្លេមេគង្គ» សាច់រឿងប្រកបដោយទស្សនវិជ្ជាជីវិត និងសិល្ប៍សោភ័ណ។ អត្ថបទស្នាដៃ ត្រូវវាយដោយកុំព្យូទ័រ មិនលើសពី២០ទំព័រ ក្រដាស A4 ប្រើ font Khmer OS Siemreap ទំហំ11 pt។ បេក្ខជនត្រូវថតចម្លងស្នាដៃដាក់ប្រកួតចំនួន៥ច្បាប់ (ដាក់ក្នុងស្រោមសំបុត្រ ដោយមានគំរូក្របភ្ជាប់ជាមួយលិខិត)។

ស្នាដៃដាក់ចូលរួមប្រកួត ត្រូវតែជាប្រភេទស្នាដៃថ្មីមិនទាន់បោះពុម្ពផ្សាយ ឬទទួលជ័យលាភីរង្វាន់ផ្សេងៗ។ ស្នាដៃដែលគោរពតាមលក្ខខណ្ឌ ទើបជ្រើសរើសមកវាយតម្លៃដាក់ពិន្ទុ។

អ្នកទទួលបានជ័យលាភី២រូប (ចំណាត់ថ្នាក់លេខ១ រឿងខ្លី និងកំណាព្យ) នឹងត្រូវទៅទទួលពានរង្វាន់ក្នុងមហោស្រពអក្សរសិល្ប៍ទន្លេមេគង្គលើកទី៩ នៅប្រទេសវៀតណាម។ ការស្នាក់នៅ ការហូបចុក ក្នុងពេលប្រារព្ធកម្មវិធី ជាបន្ទុកភាគីម្ចាស់ផ្ទះ លើកលែងសោហ៊ុយធ្វើដំណើរអន្តរជាតិ ជាបន្ទុករបស់ជ័យលាភី។ ជ័យលាភី នឹងទទួលបាន ប្រកាសនីយបត្រ ពានរង្វាន់អក្សរលិល្ប៍ទន្លេមេគង្គ និងអមដោយថវិកា។

សាធារណជនដែលមានចំណាប់អារម្មណ៍ ត្រូវបញ្ជូនស្នាដៃតែងនិពន្ធរបស់ខ្លួន មកកាន់ទី ស្នាក់ការសមាគមអ្នកនិពន្ធខ្មែរ ក្នុងបរិវេណវត្តបទុមវតី រាជធានីភ្នំពេញឱ្យបានមុខថ្ងៃទី៣១ ខែឧសភា ឆ្នាំ២០១៨ វេលាម៉ោង ១៧:០០ ជាកំណត់។

សូមទាក់ទងតាមរយៈសារអេឡេចត្រូនិច Email: [email protected] ទូរសព្ទ ០៩២ ៧៨ ៨៩ ៩០ / ០១២ ៧៩ ២៩ ៥៩ សម្រាប់ព័ត៌មានបន្ថែម៕