សិប្បកម្មមួយនៅកណ្តាលរាជធានី ផលិតប្រហិតគ្មានស្តង់ដា ខ្វះអនាម័យ និងមានសារធាតុគីមី

ជាតិ

ព័ត៍មានសុខភាព

សិប្បកម្មមួយនៅកណ្តាលរាជធានី ផលិតប្រហិតគ្មានស្តង់ដា ខ្វះអនាម័យ និងមានសារធាតុគីមី

22, Apr 2018 , 7:30 pm

រូបភាព

ដោយ:

ភ្នំពេញ៖សមត្ថកិច្ចជំនាញនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រសួងមហាផ្ទៃ បានចុះទៅត្រួតពិនិត្យ ទីតាំងសិប្បកម្មធ្វើប្រហិតមួយកន្លែងគ្មានស្លាកឈ្មោះ នៅកណ្ដាលក្រុងភ្នំពេញ ដោយរកឃើញថាការផលិតគ្មានស្ដង់ដារ ខ្វះអនាម័យ និងមានសារធាតុគីមី ហើយនិងគ្មាន ច្បាប់អនុញ្ញាត។

យោងតាមការផ្សាយរបស់អគ្គស្នងការដ្ឋាននគរបាលជាតិ សមត្ថកិច្ចជំនាញឆែកឆេរ និងត្រួតពិនិត្យសិប្បកម្មប្រហិតដែលគ្មានឈ្មោះនៅទីតាំងភូមិ១ ក្នុងសង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ។ ក្នុងប្រតិបត្តិការនេះ សមត្ថកិច្ច បានរកឃើញប្រហិតសាច់គោម៉ាកថៃសៀងគី ៣៤០គីឡូក្រាម, ប្រហិតសាច់ជ្រូក ២៥គីឡូក្រាម, សារធាតុផ្សំមានៈ ម្សៅមី Tapioca Starch ៦០គីឡូក្រាម, ប៊ីចេងម៉ាស្ទើរឆេហ្វ ១២៥គីឡូក្រាម, អំបិល ៣៥០គីឡូក្រាម, គ្រឿងសាតេទុកលាយសាច់ ៧០០គីឡូក្រាម និងម្សៅបន្ថែមរសជាតិ ៥៧៦គីឡូក្រាម ដែលផុតសុពលភាពប្រើប្រាស់។

តាមការសន្និដ្ឋានជាបឋម សិប្បកម្មធ្វើប្រហិតគ្មានឈ្មោះនេះ មានបទល្មើសរួមមាន បើកសិប្បកម្មគ្មានច្បាប់អនុញ្ញាត ទីតាំងគ្មានលក្ខណៈបច្ចេកទេសត្រឹមត្រូវ គ្មានស្ដង់ដារ និងគ្មានអនាម័យ ដោយសង្ស័យថាប្រើប្រាស់សារធាតុគីមីហាមឃាត់ ដែលធ្វើឱ្យប៉ះពាល់ដល់សុខភាពអ្នកទទួលទាន។ មិនត្រឹមតែប៉ុណ្ណោះបានប្រើប្រាស់សារធាតុផ្សំផុតសុពលភាព ហើយនិងមិនបានចុះបញ្ជីផលិតផល ហើយក៏គ្មានលើកស្លាកឈ្មោះផងដែរ។

ការចុះឆែកឆេរសិប្បកម្មធ្វើប្រហិតនេះ បន្ទាប់ពីសមត្ថកិច្ចជំនាញ បានឃាត់និងត្រួតពិនិត្យ ម៉ូតូមួយគ្រឿងដែលកំពុងដឹកជញ្ជូនប្រហិត សាច់គោ និងសាច់ជ្រូក ៧០គីឡូក្រាម ដោយជនជាតិចិន៕