រូបថត-ផ្ទាំងគំនូរទាក់ទងនឹងប្រវត្តិដំរីនឹងដាក់លក់នៅឯរាត្រីសមោសរថ្ងៃស្អែក

ជាតិ

សង្គមជាតិ

រូបថត-ផ្ទាំងគំនូរទាក់ទងនឹងប្រវត្តិដំរីនឹងដាក់លក់នៅឯរាត្រីសមោសរថ្ងៃស្អែក

26, Apr 2018 , 10:15 am

រូបភាព

ដោយ: ថ្មីៗ

ភ្នំពេញ៖ រូបថត ផ្ទាំងគំនូរទាក់ទងនឹងប្រវត្តិដំរីនឹងដាក់លក់នៅឯរាត្រីសមោសរថ្ងៃស្អែកនៅក្នុងសណ្ឋានទូតបារាំងទីក្រុងភ្នំពេញ។ រូបថត និងផ្ទាំងគំនូរដែលគូរ និងថតដោយវិចិត្រករល្បីៗទាំងនេះ នឹងដាក់លក់ក្នុងតម្លៃច្រើនរយដុល្លារ។ រាត្រីសមោសរនេះ មានគោលដៅរៃអង្គាសថវិកាដើម្បីជួយអភិរក្ស និងជួយចិញ្ចឹមសត្វដំរីចំនួន៤ក្បាលនៅក្នុងខេត្តរតនគិរី។

ប្រទេសកម្ពុជាទាំងមូលមានសត្វដំរីសរុបចំនួនប្រមាណជាជាង៣០០ក្បាលក្នុងនោះដំរីស្រុកមានចំនួន៧២ក្បាល និងដំរីព្រៃ២៥០ក្បាល។ ក្នុងន័យចូលរួមចំណែកថែទាំ ការពារ និងអភិរក្សសត្វដំរីនោះ សមាគមមូលនិធិអភិរក្សដំរីខ្មែរ អៃរាវត្តា ក៏ត្រូវបានបង្កើតឡើងដើម្បីចិញ្ចឹម និងថែទាំសត្វដំរី ចំនួន៤ក្បាលនៅក្នុងខេត្តរតនគិរី។ លោកស្រី ខៃ ចិន្តា គឺជាប្រធាននៃសមាគមខាងលើនេះ។

ចាប់តាំងពីឆ្នាំ២០១៥មក, លោកស្រី ចិន្តា ដែលជាអ្នកស្រឡាញ់សត្វដំរីនោះ បានចំណាយថវិកាផ្ទាល់ខ្លួនប្រមាណជា២០ម៉ឺនដុល្លារដើម្បីចិញ្ចឹមសត្វដំរីចំនួន៤ក្បាលនេះ។ ទោះជាការចំណាយប៉ុន្មានក៏មិនគ្រប់គ្រាន់ដែរ ព្រោះដំរី ត្រូវការការថែទាំពិតប្រាកដ ពោលគឺត្រូវការថវិកាច្រើនគួរសម។ រីឯ លោកស្រី ចិន្តា ម្នាក់ឯង មិនមានលទ្ធភាពបន្តកិច្ចការនេះម្នាក់ឯងបានឡើយ។ មធ្យោបាយចុងក្រោយរបស់អ្នកស្រី គឺការអំពាវនាវរកសប្បុរសជនជួយផ្តល់ថវិកាដើម្បីចិញ្ចឹម ថែទាំ និងអភិរក្សដំរីខ្មែរ។

ពិធីរៃអង្គាសជួយចិញ្ចឹមសត្វដំរីនឹងធ្វើឡើងនៅថ្ងៃទី២៧ខែមេសានៅស្ថានបារាំងនាទីក្រុងភ្នំពេញ។ ថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា, មន្ត្រីស្ថានទូត និង អ្នកជំនួញ មួយចំនួន នឹងត្រូវអញ្ជើញឲ្យចូលរួមក្នុងពិធីមនុស្សធម៌មួយនេះ។ អ្នកចូលរួមអាចទិញសំបុត្របានតាមអនឡាញ The Last2tickets ឬនៅទីតាំង៤កន្លែងផ្សេងទៀត ដូចជា៖ Khéma Pasteur, Institut Français, K West, Open Wine៕