ភ្នំពេញ៖ តំណាងកម្ពុជាប្រចាំនៅមន្ទីរអង្គការសហប្រជាជាតិ បានបដិសេធព័ត៌មាន ដែលថាអង្គការសហប្រជាជាតិ ស្នើឲ្យដោះលែងលោក កឹម សុខា។ តំណាងកម្ពុជា បកស្រាយថា អ្នកដែលស្នើនោះ គឺក្រុមការងារទទួលបន្ទុកការឃុំខ្លួនដោយរំលោភបំពាន។
ក្រោយបណ្តាញសារព័ត៌មាន រួមទាំងអង្គការក្រៅរដ្ឋាភិបាល បាននាំគ្នាចុះផ្សាយយ៉ាងព្រោងព្រាតថា អង្គការសហប្រជាជាតិ (UN) បានទាមទារឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិ ស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការសហប្រជាជាតិ ក៏ចេញមកច្រានចោល ហើយព្យាយាមបកស្រាយពីការពិតអំពីសាច់រឿងនេះ តាមរយៈសេចក្តីប្រកាសព័ត៌មានមួយ ដែលធ្វើចេញពីទីក្រុងហ្សឺណែវ ប្រទេសស្វីស នៅថ្ងៃទី១០ ខែឧសភា ឆ្នាំ២០១៨។
តំណាងកម្ពុជាប្រចាំនៅអង្គការសហប្រជាជាតិ ដែលមានលោក ណី សំអុល ជាឯកអគ្គរាជទូត បានលើកឡើងថា ក្រុមការងារមួយឈ្មោះក្រុមការងារទទួលបន្ទុកដោយរំលោភបំពាន (Working Group on Arbitrary and Detention) បានធ្វើសេចក្តីសន្និដ្ឋាន ដើម្បីទាមទារឲ្យដោះលែងលោក កឹម សុខា ប៉ុន្តែមិនមែនអង្គការសហប្រជាជាតិនោះទេ។
តំណាងកម្ពុជា បញ្ជាក់យ៉ាងដូច្នេះ៖«សេចក្តីសន្និដ្ឋានរបស់ក្រុមការងារនេះ គ្រាន់តែបង្ហាញពីទស្សនៈផ្ទាល់ខ្លួនប៉ុណ្ណោះ ដោយពុំមានទម្ងន់ផ្នែកច្បាប់ ទៅលើរដ្ឋអធិបតេយ្យណាមួយឡើយ។ […..] សេចក្តីសន្និដ្ឋានរបស់ពួកគេ បង្ហាញថា លោក កឹម សុខា គួរតែត្រូវបានដោះលែង ប៉ុន្តែ ពុំមានពា្យណាមួយ ដែលថាអង្គការសហប្រជាជាតិ ប្រាប់រដ្ឋាភិបាលកម្ពុជា ឲ្យដោះលែង លោក កឹម សុខា នោះទេ។ វា ជាកំហុសធ្ងន់ធ្ងរ ដែលធ្វើឲ្យសាធារណជន យល់ច្រឡំចំពោះសេចក្តីសន្និដ្ឋាននេះ»។
តំណាងកម្ពុជា ឆ្លៀតបន្ទោសក្រុមការងារទទួលបន្ទុកការឃុំខ្លួនដោយរំលោភបំពានថា បានធ្វើសេចក្តីសន្និដ្ឋាន ដោយពុំបានផ្អែកលើប្រភពពីរដ្ឋាភិបាលកម្ពុជា។ តំណាងកម្ពុជា បានរិះគន់ក្រុមកាងារនេះថា បានផ្តល់សេចក្តីសន្និដ្ឋាន ដោយផ្អែកលើប្រភពមិនច្បាស់លាស់ មិនអាចជឿទុកចិត្តបាន និងមានចរិតនយោបាយ។ តំណាងកម្ពុជា បានទិតៀនធ្ងន់ៗថា៖«ការអនុវត្តការងាររបស់ក្រុមការងារនេះ គឺកំពុងបន្ទាបតម្លៃយ៉ាងធ្ងន់ធ្ងរដល់គោលការណ៍អព្យាក្រឹត និងឯករាជ្យភាពរបស់ខ្លួន»។
បន្ទាប់មកតំណាងកម្ពុជា ក៏បានឆ្លើយតបនឹងអង្គការក្រៅរដ្ឋាភិបាល និងប្រព័ន្ធផ្សព្វផ្សាយមួយចំនួនថា មានបំណងកេងចំណេញ និងចង់ធ្វើឲ្យសេចក្តីសន្និដ្ឋានរបស់ក្រុមការងារខាងលើ ក្លាយទៅជារឿងនយោបាយ ស្របពេលការបោះឆ្នោត កាន់តែខិតជិតមកដល់។
សារព័ត៌មានខ្លះ បានហៅក្រុមការងារទទួលបន្ទុកការឃុំខ្លួនដោយរំលោភបំពាន ក្នុងអត្ថបទរបស់ខ្លួន ថាជាក្រុមការងារជំនាញឬជាក្រុមការងារពិសេសរបស់អង្គការសហប្រជាជាតិ ដែលបានទាមទាមឲ្យដោះលែងលោក កឹម សុខា។ សារព័ត៌មានមួយចំនួនទៀត បានចុះផ្សាយចំៗតែម្តងថា អង្គការសហប្រជាជាតិ ជាអ្នកទាមទារឲ្យដោះលែងលោក កឹម សុខា។
សារព័ត៌មានភាគច្រើន បានចុះផ្សាយដោយយោងទៅ
តាមសេចក្តីប្រកាសព័ត៌មាន របស់អង្គការអន្តរជាតិមួយ ឈ្មោះសហព័ន្ធសិទ្ធិមនុស្សអន្តរជាតិ (International Federation for Human Rights) ដែលគែស្គាល់ជាទូទៅថា FIDH។ អង្គការនេះ មានសមាជិកប្រមាណជា២០០ មកពីបណ្តាប្រទេសជាង១០០ ដែលធ្វើការងារខ្លាំងខាងសិទ្ធិមនុស្ស។
សហព័ន្ធសិទ្ធិមនុស្សអន្តរជាតិ អះអាងក្នុងសេចក្តីប្រកាសព័ត៌មានរបស់ខ្លួន កាលពីថ្ងៃទី៩ ខែឧសភា ឆ្នាំ២០១៨ថា ក្រុមការងារទទួលបន្ទុកការឃុំខ្លួនដោយរំលោភបំពាន បានហៅការឃុំខ្លួន លោក កឹម សុខា ថាខុសនឹងច្បាប់អន្តរជាតិ ហើយក៏ទាមទារឲ្យអាជ្ញាធរកម្ពុជាដោះលែងលោកជាបន្ទាន់ ដោយគ្មានលក្ខខណ្ឌអ្វីទាំងអស់។
ក្រុមការងារទទួលបន្ទុកការឃុំខ្លួនដោយរំលោភបំពាន ត្រូវបានបង្កើតឡើងកាលពីអំឡុងឆ្នាំ១៩៩១ ដោយគណៈកម្មការសិទ្ធិមនុស្សរបស់អង្គការសហប្រជាជាតិ ដែលបច្ចុប្បន្ន ប្តូរមកជាក្រុមប្រឹក្សាសិទ្ធិមនុស្សរបស់អង្គការសហប្រជាជាតិវិញ។ ក្រុមការងារទទួលបន្ទុកការឃុំខ្លួនដោយរំលោភបំពាន មានតួនាទីផ្តល់យោបល់ដល់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ជាពិសេសពាក់ព័ន្ធនឹងករណីឃុំខ្លួនបុគ្គលណាមួយដោយបំពានច្បាប់អន្តរជាតិ។ ហេតុដូច្នេះ ក្រុមការងារទទួលបន្ទុកការឃុំខ្លួនដោយរំលោភបំពាន ត្រូវបានចាត់ទុកជាក្រុមការងារឬជាសាខាតូចមួយ (a subsidiary body) របស់អង្គការសហប្រជាជាតិ៕