ពីនេះ ពីនោះ
ត្រីកញ្ជាក់ស្លា អាចរស់នៅក្នុងទឹកប្រៃផងទឹកសាបផង ពីតំបន់ឆ្នេរដល់បឹងទន្លេសាប ត្រីកញ្ជាក់ស្លា។ រូបភាព៖ Thach Phanara / http://ffish.asia។
× គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីមានស្រកាមួយប្រភេទ ដែលអាចរស់នៅក្នុងតំបន់ទឹកភ្លាវ ក្នុងព្រៃកោងកាងផង (ទឹកសាបលាយទឹកប្រៃ) និងចូលមករស់នៅក្នុងតំបន់ទឹកសាបដែលមានចរន្តហូរយឺតៗ និងទឹកនឹង ដូចជានៅតាមទន្លេ អូរ ស្ទឹង និងបឹងទន្លេសាបផងដែរ។ ត្រីកញ្ជាក់ស្លា មានឈ្មោះវិទ្យាសាស្ត្រ (Toxotes chatareus) និងឈ្មោះជាភាសាអង់គ្លេស Spotted archerfish។
ត្រីកញ្ជាក់ស្លា មានប្រវែងដងខ្លួនអតិបរមា ៤០ ស.ម វារកចំណីនៅពេលថ្ងៃ ដូចជាសត្វល្អិត និងរុក្ខជាតិដែលអណ្តែតលើផ្ទៃទឹក ព្រមទាំងកំពឹស និងត្រីតូចៗ ជាអាហារផងដែរ។ ត្រីប្រភេទនេះ អាចបាញ់ទឹកចេញពីមាត់វា ដើម្បីទម្លាក់សត្វល្អិតដែលនៅលើមែកឈើ ក្នុងចម្ងាយ១៥០សង់ទីម៉ែត្រ ដើម្បីចាប់ជាចំណីបាន។ វាពង-កូនក្នុងទឹកភ្លាវ និងទឹកសាបចាប់ពីខែឧសភា ដល់ខែសីហា ដោយអាចពងបានពី ២០.០០០គ្រាប់ ដល់ ១៥០.០០០គ្រាប់។ ដោយដោយពុំមានព័ត៌មាន និងទិន្នន័យគ្រប់គ្រាន់ ត្រីកញ្ជាក់ស្លាមិនត្រូវបានគេកត់ត្រាចូលក្នុងបញ្ជីរក្រហម IUCN Red List ឡើយ។ មិនតែប៉ុណ្ណោះ ត្រីប្រភេទនេះ ក៏ពុំមានព័ត៌មានច្បាស់លាស់អំពីបញ្ហាប្រឈមចំពោះពួកវានៅឡើយដែរ។
ប៉ុន្តែ ក្នុងរយៈពេលប៉ុន្មានឆ្នាំចុងក្រោយនេះ ការប្រែប្រួលអាកាសធាតុ ការនេសាទហួសកម្រិត និងការប្រើប្រាស់ឧបករណ៍ខុសច្បាប់ដោយប្រើចរន្តអគ្គិសនីឆក់ ដែលគេនិយមហៅថា ឆក់ក្តៅ ឆក់ត្រជាក់ វាជាឧបករណ៍នេសាទដ៏គ្រោះថ្នាក់បំផុតសម្រាប់មច្ឆជាតិ និងការសាងសង់ទំនប់វារិអគ្គីសនី សុទ្ធតែជាបញ្ហាប្រឈមយ៉ាងធ្ងន់ធ្ងរដល់ជីវិតមច្ឆជាតិទូទៅ។ ទៅថ្ងៃអនាគត ត្រីមួយចំនួនធំនៅក្នុងប្រទេសកម្ពុជា នឹងបាត់រូបរាង សល់តែឈ្មោះសម្រាប់ក្មេងជំនាន់ក្រោយហៅប៉ុណ្ណោះ បើពុំមានការចូលរួមពីមជ្ឈដ្ឋានទូទៅ ដើម្បីថែរក្សាការពារធនធានមច្ឆជាតិទាំងអស់គ្នានោះទេ។
© រក្សាសិទ្ធិដោយ thmeythmey.com