ខ្មុកយក្ស និងកន្ទុយក្ងោក ចេញពីអង្គរសង្ក្រាន្តទៅនៅក្នុងបវិវេណយុទ្ធនាការក្រមាវិញ

ជាតិ

ខ្មុកយក្ស និងកន្ទុយក្ងោក ចេញពីអង្គរសង្ក្រាន្តទៅនៅក្នុងបវិវេណយុទ្ធនាការក្រមាវិញ

21, May 2018 , 9:59 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ខ្មុក ឬ ព្រះភក្ដ្រហនុមាន ដែលតាំងបង្ហាញក្នុង ព្រឹត្តិការណ៍អង្គរសង្ក្រាន្តកន្លងទៅ បានយកមកដាក់បង្ហាញ ក្នុងបរិវេណវាលព្រះមេរុ ជាទីតាំងយុទ្ធនាការក្រមា។ ការតាំងបង្ហាញ ខ្មុក ឬ ព្រះភក្ត្រហនុមាននេះ ដើម្បីបង្កើតភាពសប្បាយរីករាយដល់អ្នកចូលរួមទស្សនានាទីតាំងយុទ្ធនាការក្រមា មានឱកាសថតរូបលេងកម្សាន្ត ពិសេសចូលរួមលើកស្ទួយសិល្បះ វប្បធម៌ខ្មែរផងដែរ។

លោក សាន វឌ្ឍនា ប្រធានយុទ្ធនាការក្រមា បានប្រាប់ឲ្យដឹងថា ការតាំងបង្ហាញ ព្រះភក្ត្រហនុមាននេះ ក្នុងន័យលើកស្ទួយសិល្បះ វប្បធម៌ខ្មែរ ពិសេសផ្ដល់ឱកាសដល់អ្នកចូលរួមអាចថតរូបលេងកម្សាន្តផងដែរ។ បើតាមលោក សាន វឌ្ឍនា ការនាំយកសម្ភារក្នុងព្រឹត្តិការណ៍អង្គរសង្ក្រាន្តមកតាំងបង្ហាញនៅទីនេះ គឺជាការសហការរវាងសហភាពសហព័ន្ធកម្ពុជា ដែលផ្ដល់ឱកាសឲ្យមានការតាំងបង្ហាញសម្ភារទាំងនេះក្នុងបរិវេណនេះ។

ក្នុងបរិវេណយុទ្ធនាការក្រមា នៅថ្ងៃទី២០ ឧសភានេះ ខុសប្លែកពីពេលចាប់ផ្ដើម ដោយថ្ងៃនេះមានការតាំងបង្ហាញខ្មុក ឬព្រះភក្ដ្រហនុមាន និងកន្ទុយក្ងោក។ ខ្មុកយក្ស និងកន្ទុយក្ងោក មានការចាប់អារម្មណ៍យ៉ាងខ្លាំង ពីសំណាក់សាធារណជន ដែលមកកម្សាន្តក្នុងបរិវេណនេះ។

សូមបញ្ជាក់ថា យុទ្ធនាការ « បំបែកឯតទគ្គកម្ម ក្រមា វែងជាងគេលើពិភពលោក » ធ្វើឡើងដើម្បី លើកកម្ពស់ មោទកភាពជាតិ តាមរយៈស្នាដៃមួយ ដែលនឹងមានការទទួលស្គាល់ជាអន្តរជាតិ និងការបង្ក បរិយាកាសចូលរួមចំណែកពីប្រជាពលរដ្ឋដើម្បីរួមគ្នា ថែរក្សា និងលើកស្ទួយមរតកវប្បធម៌ខ្មែរ៕