អង់គ្លេស ស្នើឲ្យសម្ដេច ស ខេង ចែករំលែកយុទ្ធសាស្ត្រប្រឆាំងការជួញដូរសត្វព្រៃខុសច្បាប់

ជាតិ

អង់គ្លេស ស្នើឲ្យសម្ដេច ស ខេង ចែករំលែកយុទ្ធសាស្ត្រប្រឆាំងការជួញដូរសត្វព្រៃខុសច្បាប់

25, May 2018 , 3:44 pm

រូបភាព

រូបពីគេហទំព័ររបស់ក្រសួងមហាផ្ទៃ

ដោយ:

ភ្នំពេញ៖ រដ្ឋាភិបាលអង់គ្លេស ស្នើឲ្យសម្ដេច ស ខេង រដ្ឋមន្ត្រីក្រសួងមហាផ្ទៃ ចែករំលែកយុទ្ធសាស្ត្រប្រឆាំងការជួយដូរសត្វព្រៃខុសច្បាប់ ដល់អង់គ្លេស។ សំណើនេះត្រូវបានលើកឡើងនៅក្នុងជំនួបរវាងលោក Sam Myers អនុរដ្ឋមន្ត្រី និងជាប្រធានផ្នែកកិច្ចការសេដ្ឋកិច្ចសាកល ក្រសួងការបរទេសចក្រភពអង់គ្លេស និងរដ្ឋមន្ត្រីក្រសួងមហាផ្ទៃ កាលពីថ្ងៃទី២៤ ឧសភា។

ក្នុងកិច្ចពិភាក្សានេះ លោក Sam Myers បាននិយាយថា គោលបំណងចម្បងនៃសន្និសីទលើកទី៤ នៅក្នុងទីក្រុងឡុងដ៍ គឺចង់ឲ្យភាគីកម្ពុជាចូលរួមចែករំលែកបទពិសោធន៍ និងភាពជោគជ័យកន្លងមក លើការងារអនុវត្តច្បាប់ និងកិច្ចសហប្រតិបត្តិការប្រឆាំងការជួញដូរសត្វព្រៃខុសច្បាប់។

បើតាម លោក Sam Myers សន្និសីទខាងមុខនេះ គឺជាឱកាសមួយដែលអាចឲ្យក្រសួងមហាផ្ទៃកម្ពុជា បង្ហាញអំពីតួនាទីរបស់ខ្លួន ក្នុងការដឹកនាំកងកម្លាំងអនុវត្តច្បាប់ ដែលបានបំពេញភារកិច្ចប្រយុទ្ធប្រឆាំង និងបង្ក្រាបនូវបទល្មើសជួញដូរសត្វព្រៃខុសច្បាប់។

ជាការឆ្លើយតប រដ្ឋមន្ត្រីក្រសួងមហាផ្ទៃ សម្ដេច ស ខេង សន្យាថា សម្ដេច នឹងចូលរួមសន្និសីទលើកទី៤ ដែលរៀបចំនៅទីក្រុងឡុងដ៍ ប្រទេសអង់គ្លេសនេះ។ សម្ដេច ស ខេង ដែលទទួលការអញ្ជើញពីអង់គ្លេស បាននិយាយថា សម្ដេចប្រឹងប្រែងឲ្យអស់លទ្ធភាព ក្នុងធ្វើបទបង្ហាញដែលកម្ពុជាអនុវត្តកន្លងមក ដល់អង្គប្រជុំនោះ ដើម្បីផ្លាស់ប្តូរបទពិសោធន៍ជាមួយភាគីជាមិត្តដទៃទៀត ។

សម្ដេច ស ខេង បាននិយាយដូច្នេះថា ៖« ប្រសិនបើភាគីអង់គ្លេសអាចផ្តល់នូវឯកសារពាក់ព័ន្ធមួយចំនួនមកដល់ភាគីកម្ពុជា ដើម្បីពិនិត្យសិក្សាសម្រាប់ត្រៀមការចូលរួមសន្និសីទនោះ វាពិតជារឿងប្រសើរណាស់ ដែលធ្វើឲ្យកម្ពុជាត្រៀមលក្ខណៈសមស្របក្នុងការចូលរួមចំណែកក្នុងកិច្ចពិភាក្សាផ្សេងៗនៅក្នុងសន្និសីទនោះ»៕