ភ្នំពេញ៖
អង្គការភ្លែនអន្តរជាតិកម្ពុជា និងដៃគូពាក់ព័ន្ធ បានផ្តល់មូលនិធិចំនួន ២លានដុល្លារ ដើម្បីបន្សាំ និងទប់ស្កាត់ការប្រែប្រួលអាកាសធាតុនៅកម្ពុជា។ មូលនិធិនេះត្រូវបានអង្គការភ្លែនអន្តរជាតិកម្ពុជា អនុវត្តសម្រាប់បង្កើនភាពធន់នឹងអាកាសធាតុលើប្រជាជន ដែលកំពុងទទួលរងផលប៉ះពាល់ពីការប្រែប្រួលអាកាសធាតុ ចំនួន១៧ខេត្តទូទាំងប្រទេសកម្ពុជា។
ថវិកាចំនួន២លានដុល្លារនេះ ត្រូវបានប្រកាស ក្នុងការកម្មវិធី«ការបញ្ជ្រាបភាពធន់នឹងអាកាសធាតុទៅក្នុងដំណើរការនៃការកសាងផែនការអភិវឌ្ឍន៍យន្តការគាំទ្រសង្គមស៊ីវិល» ដោយលោកស្រី ហ្សាន់ អេវើរីត ប្រធានក្រុមដឹកនាំគម្រោងរបស់អង្គការភ្លែនអន្តរជាតិកម្ពុជា នៅថ្ងៃទី៣០ ខែឧសភា ឆ្នាំ២០១៨។
បើតាម លោកស្រី ហ្សាន់ អេវើរីត ប្រធានក្រុមដឹកនាំគម្រោងរបស់អង្គការភ្លែនអន្តរជាតិកម្ពុជា ថវិកាចំនួន២លានដុល្លារនេះ ជាថវិកាដែលស្ថិតនៅក្នុងកញ្ជប់«B» ដែលជាផ្នែកមួយក្នុងការបញ្ជ្រាបភាពធន់នឹងអាកាសធាតុ ដោយមានជួយការគាំទ្រពីហរិញ្ញប្បទានពីមូលនិធិវិនិយោគអាកាសធាតុ តាមរយៈធនាគារអភិវឌ្ឍន៍អាស៊ី។
សម្រាប់លោកស្រី ហ្សាន់ អេវើរីត គម្រោងការបន្សាំអាកាសធាតុនេះ គឺជាការរារាំងការប្រែប្រួលអាកាសធាតុនៅកម្ពុជា ដើម្បីឆ្លើយតបទៅនឹងភាពរាំងស្ងួតនៃអាកាសធាតុ ដែលទាក់ទងនឹងវិស័យកសិកម្ម ចំពោះប្រជាកសិករដែលមិនមានលទ្ធភាពក្នុងការងារកសិកម្ម ។ លោកស្រី ហ្សាន់ អេវើរីត បានបន្ថែមដូច្នេះថា៖ «បញ្ហាការប្រែប្រួលអាកាសធាតុនេះ កម្ពុជាមានចំនួន១៧ខេត្តដែលទទួលរងផលប៉ះពាល់ខ្លាំងជាងគេ ដែលភាគច្រើននៅតំបន់ឆ្នេរ និងតំបន់ខ្ពង់រាប ដូចជា ខេត្តរតនៈគិរី, មណ្ឌលគិរី, ត្រចេះ,ស្នឹងត្រែង និងតំបន់ជុំវិញបឹងទន្លេសាបផងដែរ»។
លោក សាប៊ូ អូហ្សាណូ រដ្ឋលេខាធិការក្រសួងបរិស្ថាន ដែលជាដៃគូសំខាន់ក្នុងការគាំពារទប់ស្កាត់ការប្រែប្រួលអាកាសធាតុ បានអំពានាវដល់អង្គការភ្លែនអន្តរជាតិ ចូលរួមបន្តគម្រោងការគាំពារបរិស្ថាន ដើម្បីជួយណែនាំដល់ ឲ្យប្រជាជនខ្មែរបន្សាំការប្រែប្រួលអាកាសធាតុនៅតាមតំបន់ ដែលពួកគេរស់នៅផ្សេងៗគ្នា និងចូលរួមកាត់បន្ថយភាពក្រីក្រ ក្នុងទិសដៅលើកកម្ពស់ជីវភាពរបស់ប្រជាជនខ្មែរ ។ ជាពិសេសជួយអនុវត្តគម្រោងផ្គត់ផ្គង់ទឹកស្អាតសម្រាប់ពលរដ្ឋខ្មែរផងដែរ។
លោក Ancha Srinivasan អ្នកឯកទេសខាងគោលការណ៍ស្តីពីការប្រែប្រួលអាកាសធាតុនៃធនាគារអភិវឌ្ឍន៍អាស៊ី បាននិយាយថា កម្ពុជាក៏ជាប្រទេសដែលងាយនឹងរងគ្រោះពីការប្រែប្រួលអាកាសធាតុខ្លាំងជាងគេ ក្នុងចំណោមប្រទេសអាស៊ី។
គម្រោងការគាំពារការប្រែប្រួលអាកាសធាតុនេះ ត្រូវបានអនុវត្តនៅក្នុងប្រទេសចំនួនពីរ គឺហ្វីលីពីន និងកម្ពុជាតែប៉ុណ្ណោះ ព្រោះប្រទេសទាំងពីរនេះ ទទួលរងគ្រោះខ្លាំងជាងគេគួរឲ្យកត់សម្គាល់។ នេះជាការបញ្ជាក់របស់លោក Ancha Srinivasan បានបន្ថែមថា កម្ពុជាជាប្រទេសដែលទទួលបានមូលនិធិច្រើនជាងគេ។
លោក Ancha Srinivasan បានបញ្ជាក់ថា៖«ថវិកាចំនួន ៦លានដុល្លារ ដែលជាកិច្ចខំប្រឹងរបស់អង្គការភ្លែនអន្តរជាតិ សហការជាមួយអង្គការក្រៅរដ្ឋាភិបាល ក្នុងការជួយជ្រោមជ្រែងដល់កម្ពុជាដើម្បីបញ្ជ្រាសការប្រែប្រួលអាកាសធាតុ។ ក្នុងចំណោមថវិកា ៦លានដុល្លារ ៤លានដុល្លារ នឹងយកទៅអនុវត្តការកាត់បន្ថយឧស្ម័នផ្ទះកញ្ចក់ និង២លានដុល្លារទៀត អនុវត្តការបន្សាំការប្រែប្រួលអាកាសធាតុនៅតាមបណ្តាខេត្តទាំង១៧នេះផងដែរ»៕