អ្នកនាំពាក្យ ៖ អតីតសង្ឃដែលមានរឿងអាស្រូវ នឹងត្រូវដោះស្រាយតាមផ្លូវច្បាប់

ជាតិ

អ្នកនាំពាក្យ ៖ អតីតសង្ឃដែលមានរឿងអាស្រូវ នឹងត្រូវដោះស្រាយតាមផ្លូវច្បាប់

05, Jun 2018 , 3:44 pm

រូបភាព

ដោយ: ថ្មីៗ

ភ្នំពេញ៖ ព្រះចៅអធិការវត្តភ្នំបាក់លើ ខេត្តបន្ទាយមានជ័យ ត្រូវបានមន្ទីរធម្មការ និងថ្នាក់ដឹកនាំសង្ឃ ផ្សឹកចាកពីវិស័យព្រះពុទ្ធសាសនា បន្ទាប់ពីបែកធ្លាយវីដេអូ របស់ព្រះអង្គ និងនារីម្នាក់ ដែលបានបង្ហោះចែកចាយនៅលើបណ្ដាញសង្គមហ្វេសប៊ុក។ ក្រោយចាប់ផ្សឹកហើយ អតីតព្រះចៅអធិការវត្តខេត្តបន្ទាយមានជ័យអង្គនេះ នឹងប្រឈមមុខផ្លូវច្បាប់ផងដែរ។

អ្នកនាំពាក្យក្រសួងធម្មការ និងសាសនា លោក សេង សុមុនី បាននិយាយថា ព្រះចៅអធិការវត្តភ្នំបាក់លើ ដែលបានប្រព្រឹត្តខុសវិន័យធម៌ នៃព្រះពុទ្ធសាសនានោះ ត្រូវបានចាប់ផ្សឹកតាមវិន័យ នៅថ្ងៃទី៥ មិថុនានេះ។ ប៉ុន្តែកំហុសឆ្គងតាមផ្លូវច្បាប់យ៉ាងណា វាអាស្រ័យទៅលើការស៊ើបអង្កេតរបស់សមត្ថកិច្ចបន្តទៀត។

ថ្លែងប្រាប់សារព័ត៌មានថ្មីៗ លោក សេង សុមុនី បានបញ្ជាក់ដូច្នេះថា៖«ខាងក្រសួងបានបញ្ជប់កាតព្វកិច្ចផ្នែកវិន័យ ដោយចាប់ផ្សឹកព្រះចៅអធិការវត្តហើយ ដូច្នេះភារកិច្ចបន្ត គឺជាការអនុវត្តរបស់សមត្ថកិច្ច ក្នុងការបន្តនីតិវិធីស៊ើបអង្កេតលើកំហុសថា ព្រះអង្គរូបនេះ ប្រព្រឹត្តខុសក្រមព្រហ្មទណ្ឌ ឬរដ្ឋប្បវេណី ឬត្រង់ចំណុចណាមួយ ។ ដូច្នេះយើងមិនអាចកំណត់ទោសអ្វីនោះទេ ព្រោះវាអាស្រ័យលើការសម្រេចតុលាការ»។

ជាមួយគ្នានេះលោក សេង សុមុនី អំពាវនាវឲ្យព្រះសង្ឃ និងអ្នកដែលតាំងខ្លួន ប្រតិបត្តិក្នុងវិស័យសាសនា ត្រូវអនុវត្ត និងប្រតិបត្តិធម៌វិន័យ តាមពុទ្ធឱវាទឲ្យបានត្រឹមត្រូវ ពោលគឺកុំនាំឲ្យវិស័យសាសនាធ្លាក់ចុះ។«បើនៅជាព្រះសង្ឃប្រតិបត្តិធម៌វិន័យព្រះពុទ្ធសាសនា កុំឲ្យឆកល្វែង ប៉ះពាល់ដល់ផ្លូវធម៌ព្រះពុទ្ធ ដើម្បីកុំឲ្យធម៌វិន័យព្រះពុទ្ធសាសនាធ្លាក់ចុះ។ ហើយត្រូវអនុវត្តឲ្យបានត្រឹមត្រូវ បើសិនជាព្រះសង្ឃចង់ក្លាយជាគ្រហស្ថត្រូវលាចាកសិក្ខាបទតាមប្រពៃណី ទៅជាគ្រហស្ថតាមច្បាប់ព្រះពុទ្ធសាសនា»។ នេះជាការអំពាវនាវរបស់អ្នកនាំពាក្យក្រសួងធម្មការ និងសាសនា។

ព្រះចៅអធិការវត្តភ្នំបាក់លើ ខេត្តបន្ទាយមានជ័យ ដែលត្រូវបានមន្ទីរធម្មការ និងថ្នាក់ដឹកនាំសង្ឃ ផ្សឹកចាកវិស័យសាសនានេះ ធ្វើឡើងបន្ទាប់ពីបែកធ្លាយវីដេអូព្រះអង្គឆាន់ពោត រួមទាំងមានសំឡេងសន្ទនាជាមួយមនុស្សក្នុងវីដេអូផងដែរ។ វីដេអូដែលបានបង្ហោះជាសាធារណៈលើបណ្ដាញសង្គមនេះ កើតចេញពីនារីម្នាក់ ដែលអះអាងថា ខ្លួនជាអ្នកមានទំនាក់ទំនងជាមួយព្រះចៅអធិការវត្តខាងលើ និងទាមទារឲ្យមានការទទួលខុសត្រូវលើរូបនាងទៀតផង៕