ជាតិ
សង្គមជាតិ
ប៉ូលិសដែលថត និងបង្ហោះរូបគ្នាឯងពេលទម្រេតខ្លួនក្នុងកម្មវិធីសម្តេច ត្រូវបានបញ្ឈរជើង
× មន្ត្រីនគរបាលពីររូប ក្នុងខេត្តកំពង់ចាម ត្រូវបានបញ្ឈរជើង បន្ទាប់ពីពួកគាត់ បានបង្ហោះរូបមន្ត្រីនគរបាលបីរូបនៃអធិការដ្ឋាន ស្រុកស្រីសន្ធរ ដែលបានលង់លក់មួយភាំង ក្នុងកិច្ចប្រជុំមួយក្រោមអធិបតីភាពរបស់សម្តេចនាយករដ្ឋមន្ត្រីមន្ត្រី ហ៊ុន សែន នៅកោះពេជ្រកាលពីប៉ុន្មានថ្ងៃមុន។
នគរបាលទាំងពីរ ដែលរងពិន័យនោះគឺ លោកវរសេនីយ៍ឯក ខេង ស្រេង អធិការនគរបាលស្រុកចំការលើ (អ្នកថត ) និងវរសេនីយ៍ឯក អ៊ឹម ស៊ាងឌី ប្រធានការិយាល័យប្រឆាំងគ្រឿងញៀន (អ្នកបង្ហោះ )។
លិខិតបង្គាប់របស់លោក ឯម កុសល ស្នងការខេត្តកំពង់ចាម ដែលធ្វើឡើងនៅថ្ងៃទី៥ ខែមិថុនា បានឲ្យដឹងដឹងថា លោកវរសេនីយ៍ត្រី យូ ភិរុណ អធិការរង ត្រូវឡើងជាអធិការស្តីទី ជំនួសលោក ខេង ស្រេង ដែលកំពុងជាប់ពិន័យ ហើយលោកវរសេនីយ៍ត្រី ជីវ សេងរស់ នាយរងការិយាល័យប្រឆាំងគ្រឿងញៀន ជំនួសលោក អ៊ឹម ស៊ាងឌី។
រូបនគរបាលទាំងបីនាក់ ដែលលង់លក់ក្នុងកិច្ចប្រជុំនោះ បានបែកធ្លាយ ហើយត្រូវបានគេចែករំលែកជាច្រើនលើបណ្តាញសង្គមហ្វេសប៊ុក ក្នុងរយៈពេលប៉ុន្មានថ្ងៃនេះ។ ការរិះគន់ និងការចំអក ពីសំណាក់អ្នកប្រើប្រាស់បណ្តាញសង្គមហ្វេសប៊ុក បានកើតឡើងជាបន្តបន្ទាប់ ចំពោះនគរបាលទាំងនោះ។
ខណៈដែលអ្នកប្រើប្រាស់បណ្តាញសង្គមបាននាំគ្នាសរសេរវាយប្រហារថា មន្ត្រីទាំងនោះ លង់លក់ ដោយមិនខ្វល់ពីប្រសាសន៍សម្តេច ហ៊ុន សែន ស្នងការដ្ឋាននគរបាលខេត្តកំពង់ចាម បានពន្យល់ហេតុផលថា មន្ត្រីទាំង៣រូបនេះ ក៏ដូចមន្ត្រីប៉ុស្តិ៍នគរបាលរដ្ឋបាលដទៃទៀតក្នុងស្រុកស្រីសន្ធរ បានចេញល្បាតការពាររហូតដល់ម៉ោង១រំលងអធ្រាត្រហើយដល់ម៉ោង២បានចេញដំណើរទៅចូលរួមកម្មវិធីហេតុនេះហើយបានជាទម្រេតខ្លួនបន្តិចមែន តែការទំរេតខ្លួនរបស់គាត់នេះគឺនៅមុនពេលកម្មវិធីចាប់ផ្តើម បានន័យថាគឺពេលរង់ចាំ មិនមែនសម្រាន្តក្នុងពេលដែលសម្តេច ថ្លែងសន្ទរកថានោះទេ នៅពេលដែលសម្តេចអញ្ជើញមកដល់ និងបើកកម្មវិធី គឺពួកគាត់មិនបានសម្រាន្តឡើយ៕
© រក្សាសិទ្ធិដោយ thmeythmey.com