ជាតិ
ការវាយកំទេចរបងវត្តស្វាយពពែត្រូវបានផ្អាក ក្រោយការរិះគន់
× ភ្នំពេញ៖ ការវាយកំទេចរបងវត្តស្វាយពពែដែលមានចំណាស់ជិត១០០ឆ្នាំ បានរងការរិះគន់ពីមហាជននៅតាមបណ្តាញសង្គមហ្វេសប៊ុក។ មន្ត្រីជាន់ខ្ពស់នៅក្រសួងវប្បធម៌បានអះអាងថា ការវាយកំទេចត្រូវបានបានផ្អាកហើយ ហើយវត្តត្រូវសាងសង់របងថ្មីដោយយកគម្រូរចនាប័ទ្មដដែល។
កាលពីពេលថ្មីៗនេះ របង និងក្លោងទ្វាវត្តស្វាយពពែ ដែលមានអាយុកាលចំណាស់ជិត ១០០ឆ្នាំ កំពុងត្រូវបានវាយកំទេច ហើយវាបានបង្កឲ្យមានការរិះគន់ច្រើនពីមហាជនដែលសោកស្តាយចំពោះការបាត់បង់សម្បត្តិកេតនភណ្ឌជាតិ។ ប៉ុន្តែពេលនេះ សកម្មភាពនេះត្រូវបានផ្អាក។
លោក ហេង សុផាឌី អគ្គនាយករងបេតិកភណ្ឌនៃក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗតាមទូរសព្ទនៅព្រឹកថ្ងៃទី១០ខែមិថុនាថា៖ «ការវាយកម្ទេចរបង និងក្លោងទ្វាវត្តស្វាយពពែ ត្រូវបានផ្អាកហើយ បន្ទាប់ពីមន្ត្រីជំនាញ និងនគរបាលបេតិកភណ្ឌបានចុះអន្តរាគមន៍»។ បើតាមលោក ហេង សុផាឌី ភាគីខាងវត្តបានប្រគល់តួនាទីនេះ មកឲ្យខាងក្រសួងវប្បធម៌ដើម្បីធ្វើកិច្ចការនេះបន្ត។
អគ្គនាយករងបេតិកភណ្ឌរូបនេះ បានលើកឡើងយ៉ាងដូច្នេះ៖ «ការវាយរបងនេះ គឺខុសច្បាប់បេតិកភណ្ឌ។ ដោយសារតែវាជាបេតិកភណ្ឌ មុននឹងវាយកម្ទេច ឬរុះរើ ត្រូវផ្ដល់ព័ត៌មានមកខាងស្ថាប័នជំនាញដើម្បីត្រួតពិនិត្យជាមុនសិន»។
មន្ត្រីជាន់ខ្ពស់នៃក្រសួងវប្បធម៌បានបញ្ជាក់ថា របងវត្តស្វាយពពែ ដែលត្រូវបានវាយកម្ទេចចោលរួចរាល់នេះ នឹងត្រូវសាងសង់ឡើងវិញ ដោយរក្សាទម្រង់រចនាប័ទ្មដូចដើម។ ជាមួយគ្នានេះ ប្រសិនបើមានការវាយកម្ទេចបន្តទៀត អគ្គនាយកដ្ឋានបេតិកភណ្ឌនឹងចាត់ការតាមនីតីវិធីច្បាប់ផងដែរ។ អគ្គនាយករងបេតិកភណ្ឌ លោក ហេង សុផាឌី ក៏បានអំពាវនាវដល់ស្ថាប័នពាក់ព័ន្ធទាំងអស់ ឲ្យចូលរួមទប់ស្កាត់ រាល់ការវាយកម្ទេច ឬរុះរើ សំណង់បេតិកភណ្ឌរបស់ជាតិ៕
Tag:
វប្បធម៌
វត្ត
បេតិកភណ្ឌ
© រក្សាសិទ្ធិដោយ thmeythmey.com