ឥណ្ឌា ឲ្យឆ្កែហិតមីនមួយចំនួន មកកម្ពុជា

ជាតិ

ឥណ្ឌា ឲ្យឆ្កែហិតមីនមួយចំនួន មកកម្ពុជា

12, Jun 2018 , 2:23 pm

រូបភាព

រូបពីអគ្គស្នងការនគរបាលជាតិ

ដោយ: សារព័ត៌មានថ្មីៗ

ក្នុងជំនួបជាមួយសម្តេចនាយករដ្ឋមន្ត្រី ហ៊ុន សែន កាលពីថ្ងៃទី១១ ខែមិថុនា ឆ្នាំ២០១៨ លោកស្រី ស្រីម៉ានី នីម៉ាឡា រដ្ឋមន្ត្រីក្រសួងការពារជាតិឥណ្ឌា បានលើកឡើងពីការផ្តល់ជំនួយលើវិស័យដោះមីន ដោយលោកស្រី បញ្ជាក់ថា ឥណ្ឌានឹងផ្តល់ឆ្កែហិតមីនមួយចំនួនដល់កម្ពុជា។ នេះបើតាមព័ត៌មានស្តីពីលទ្ធផលនៃជំនួបខាងលើ ដែលត្រូវបានបង្ហោះលើទំព័រហ្វេសប៊ុករបស់សម្តេច ហ៊ុន សែន។

បើតាមទំព័រហ្វេសប៊ុករបស់សម្តេច ហ៊ុន សែន, បន្ទាប់ពីលើកឡើងពីការផ្តល់ជំនួយ ស្រីម៉ានី នីម៉ាឡា ក៏បានស្នើឲ្យកងទ័ពកម្ពុជា សហការឲ្យបានជិតស្និទ្ធជាមួយកងទ័ពឥណ្ឌា ដែលកំពុងបំពេញបេសកកម្មរក្សាសន្តិភាព ក្រោមឆ័ត្រនៃអង្គការសហប្រជាជាតិ។

នៅចំពោះមុខលោកស្រី ស្រីម៉ានី នីម៉ាឡា សម្តេច ហ៊ុន សែន បានអរគុណដល់រដ្ឋាភិបាលឥណ្ឌា ដែលបានផ្តល់ជំនួយខាងលើដល់កម្ពុជា ដើម្បីបម្រើលើវិស័យដោះមីន។ ព័ត៌មានលើទំព័រហ្វេសប៊ុករបស់សម្តេច ហ៊ុន សែន បានសរសេរថា សម្តេច ហ៊ុន សេន ពេញចិត្ត និងសាទរចំពោះកិច្ចសហប្រតិបត្តិការរវាងកងទ័ពកម្ពុជា និងឥណ្ឌា ដែលកំពុងបំពេញបេសកកម្មរក្សាសន្តិភាព ក្រោមឆ័ត្រនៃអង្គការសហប្រជាតិ។

មុននឹងជួបសម្តេច ហ៊ុន សែន លោកស្រី ស្រីម៉ានី នីម៉ាឡា បានជួបសម្តេច ទៀ បាញ់ រដ្ឋមន្ត្រីក្រសួងការពារជាតិ។ ក្នុងជំនួបនោះ រដ្ឋមន្ត្រីការពារជាតិកម្ពុជា ស្នើឲ្យឥណ្ឌា ជួយផ្តល់សម្ភារទំនើបៗ ដល់កម្ពុជា ដើម្បីយកមកបំផ្លាញមីន ដែលសល់ពីសម័យសង្គ្រាម និងបម្រើឲ្យកិច្ចប្រតិបត្តិការក្នុងការរក្សាសន្តិភាព។
សូមបញ្ជាក់ថា លោកស្រី ស្រីម៉ានី នីម៉ាឡា និងគណៈប្រតិភូឥណ្ឌា បានមកដល់កម្ពុជា កាលពីថ្ងៃទី១០ ខែមិថុនា ហើយដំណើរទស្សនកិច្ចរបស់លោកស្រី ត្រូវបញ្ចប់នៅថ្ងៃទី១២ ខែមិថុនានេះ៕