ក្រសួងកសិកម្ម បើកឲ្យនាំចូលថ្នាំកសិកម្មវិញ តែស្ថិតក្នុងការឃ្លាំមើល

ជាតិ

ក្រសួងកសិកម្ម បើកឲ្យនាំចូលថ្នាំកសិកម្មវិញ តែស្ថិតក្នុងការឃ្លាំមើល

12, Jun 2018 , 10:19 pm

រូបភាព

ដោយ:

ភ្នំពេញ៖ ក្រោយពីស្ថានភាពពុលទឹកនៅខេត្តក្រចេះ មានសភាពស្ងប់ស្ងាត់នោះ ក្រសួងកសិកម្ម រុក្ខាប្រមាញ់ និងនេសាទ បានសម្រេចអនុញ្ញាតឲ្យក្រុមហ៊ុននាំចូលថ្នាំកសិកម្ម បន្តសកម្មភាពចែកចាយជាធម្មតាវិញ ប៉ុន្តែត្រូវស្ថិតនៅក្រោមការពិនិត្យ និងតាមដានរបសើក្រសួង។

ក្រសួងកសិកម្ម បានប្រាប់ឲ្យក្រុមហ៊ុន និងដេប៉ូចែកចាយទាំងអស់ អាចដំណើរការចែកចាយថ្នាំកសិកម្មឡើងវិញ បន្ទាប់ពីក្រសួង ប្រកាសឲ្យផ្អាកដំណើរការអស់មួយរយៈ ក្រោយពីមានករណីពុលទឹកស្លាប់នៅក្នុងខេត្តក្រចេះ។ ទន្ទឹមនឹងការបើកដំណើរការវិញនេះ ក្រសួងកសិកម្ម នឹងតាមដានលើដេប៉ូចែកចាយ ដើម្បីពិនិត្យមើលគុណភាពថ្នាំកសិកម្ម តាមអគ្គនាយកដ្ឋានកសិកម្ម នាយកដ្ឋាននីតិកម្មកសិកម្ម និងមន្ត្រីពាក់ព័ន្ធផងដែរ។ មន្ត្រីជំនាញទាំងនេះ នឹងត្រូវចុះស្រាវជ្រាវ និងណែនាំដល់បណ្ដាក្រុមហ៊ុន ដេប៉ូចែកចាយ និងអ្នកប្រើប្រាស់ទាំងអស់អនុវត្ត ឲ្យបានត្រឹមត្រូវតាមការកំណត់ឲ្យប្រើប្រាស់។

ជាមួយគ្នានេះក្រសួងកសិកម្ម ក៏ជំរុញឲ្យអាជ្ញាធរពាក់ព័ន្ធតាមព្រំដែនទប់ស្កាត់ករណីរត់ពន្ធថ្នាំកសិកម្មខុសច្បាប់ឲ្យមានប្រសិទ្ធភាព។ សេចក្ដីជូនដំណឹងរបស់ក្រសួងកសិកម្ម បានណែនាំដល់អាជ្ញាធរពាក់ព័ន្ធ យ៉ាងដូច្នេះថា៖«ត្រូវមានការសហការរវាងមន្ទីរកសិកម្មរាជធានី ខេត្តទប់ស្កាត់និងបង្ក្រាបកុំឲ្យបានទាន់ពេល ក្នុងករណីនាំចូលថ្នាំកសិកម្មខុសច្បាប់ ដែលអាចបង្កផលប៉ះពាល់ដល់ការបង្កបង្កើនផលរបស់ប្រជាកសិករនារដូវវស្សាខាងមុខនេះ»។

អត្ថបទទាក់ទង

ទីបំផុត រដ្ឋមន្ត្រីបី ចេញសេចក្តីប្រកាសរួមគ្នា ជុំវិញករណីពលរដ្ឋពុលនៅខេត្តក្រចេះ

កន្លងមកក្រសួងកសិកម្ម បានផ្អាកការនាំចូល និងចែកចាយថ្នាំកសិកម្ម ក្រោយពីមានករណីពុលនៅខេត្តក្រចេះ ដែលត្រូវបានក្រសួងជំនាញ៣ អះអាងថា ការពុលនេះ បណ្តាលមកពីស្រាស ដែលមានលក់ ឬផលិតនៅក្នុងមូលដ្ឋាន ហើយដែលមានសារធាតុមេតាណុល កម្រិតខ្ពស់ និងទឹកព្រែកទេរ និងអូរគគី មានសារធាតុគីមី មានកំហាប់ខ្ពស់ ដែលបណ្តាលមកពីថ្នាំសម្លាប់ស្មៅ និងថ្នាំសម្លាប់សត្វល្អិត។

សូមរម្លឹកថា ករណីពុលទឹក និងស្រាសនេះ បានបណ្ដាលឲ្យប្រជាពលរដ្ឋ១៣នាក់ បានស្លាប់ និងជាង២០០នាក់ ត្រូវបានបញ្ជូនទៅសង្គ្រោះ ដោយសារតែករណីពុល នៅឃុំកន្ទួត ស្រុកចិត្របុរី ខេត្តក្រចេះ៕