បុរសម្នាក់ដែលប្រើអំពើហិង្សាលើកូន ត្រូវបានបញ្ជូនទៅតុលាការ

ជាតិ

សង្គមជាតិ

បុរសម្នាក់ដែលប្រើអំពើហិង្សាលើកូន ត្រូវបានបញ្ជូនទៅតុលាការ

17, Jun 2018 , 5:56 pm

រូបភាព

ដោយ:

ភ្នំពេញ៖ នាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ បានឃាត់ខ្លួនបុរសម្នាក់ដែលប្រើអំពើហិង្សាទៅលើកូនប្រុសរបស់ខ្លួន មកសាកសួរ ហើយបន្ទាប់មក ក៏បញ្ជូនទៅតុលាការនៅថ្ងៃទី១៧ ខែមិថុនាឆ្នាំ២០១៨នេះ ដើម្បីចាត់ការតាមនីតិវិធី។ នេះបើតាមអគ្គស្នងការដ្ឋាននគរបាលជាតិ។

បុរសដែលប្រើអំពើហិង្សាលើកូនប្រុសបង្កើតរបស់ខ្លួន មានឈ្មោះ ហ៊ិន សុផាន់ណា អាយុ៣៩ឆ្នាំ ស្នាក់នៅ សង្កាត់ស្ទឹងមានជ័យ ខណ្ឌមានជ័យ ហើយកុមារារងគ្រោះ ឈ្មោះហេង ឡឹថុន អាយុ៦ឆ្នាំ។ បើតាមអគ្គស្នងការនគរបាលជាតិ មូលហេតុដែលបុរសជាឪពុក ប្រើអំពើហិង្សាទៅលើកូន គឺដោយសារខឹងនឹងកូន ថាបានលួចប្រាក់ ២៥០០រៀល។

អគ្គស្នងការនគរបាលជាតិ បានស្រង់របាយការណ៍ ពីនាយកដ្ឋានប្រឆាំងការជួញដូរមនុស្សនិងអនីតិជន ទៅចុះផ្សាយថា តាមការបំភ្លឺរបស់ដើមបណ្តឹង គឺអ្នកស្រី តាំង ធីតា ត្រូវជាម្ដាយមីងរបស់កុមាររងគ្រោះ បានរៀបរាប់ថា ឈ្មោះ ហ៊ិន សុផាន់ណា ធ្លាប់ជាប់ពន្ធនាគារ ២លើករួចមកហើយ និងធ្លាប់ប្រើប្រាស់គ្រឿងញៀន តែងតែឈ្លោះវាយគ្នា។ ហើយជាញឹកញាប់បានប្រើអំពើហឹង្សាទៅលើកូនទាំង៤ រួមទាំងកុមាររងគ្រោះផងដែរ។ បើតាមកុមាររងគ្រោះ បានរៀបរាប់ឲ្យដឹងថា ឪពុករបស់ខ្លួន ធ្លាប់វាយមកលើរូបគេជាញឹកញាប់ ដោយសារខឹងខ្លួនពូកែដើរលេង មិនសូវចូលផ្ទះ ហើយខ្លួនក៏ធ្លាប់បានឃើញឪពុករបស់គេប្រើអំពើហិង្សាទៅលើម្ដាយ ព្រមទាំងបងៗជាញឹកញាប់ផងដែរ។

ផ្នែកតាមប្រភពខាងលើដដែល បុរសដែលប្រើអំពើហិង្សាខាងលើបានឆ្លើយសារភាពថា រូបគេធ្លាប់ជាប់ពន្ធនាគារ ២លើករួមមកហើយ លើកទី១ ករណីពាក់ព័ន្ធអំពើប្លន់ ជាប់ពន្ធនាគារ៤ឆ្នាំ និងលើកទី២ ករណីពាក់ព័ន្ធគ្រឿងញៀន ជាប់ពន្ធនាគារ១ឆ្នាំ។

គួរម្លឹកថា ឈ្មោះ ហ៊ិន សុផាន់ណា ត្រូវបានឃាត់ខ្លួន បន្ទាប់ពីមានការចែកចាយតៗគ្នានូវវីដេអូខ្លីមួយនៅលើបណ្ដាញសង្គម ដែលបង្ហាញពីសកម្មភាពរបស់បុរសនេះ ប្រើអំពើហិង្សាទៅលើកូនរបស់ខ្លួន។ អំពើហិង្សារបស់បុរសជាឪពុក បានរងការរិះគន់ជាខ្លាំង ពីសំណាក់ប្រជាពលរដ្ឋ ជាពិសេសអ្នកប្រើប្រាស់ហ្វេសប៊ុក៕