អន្តរជាតិ
កូរ៉េខាងត្បូង ដាក់គោលដៅបញ្ចប់សង្គ្រាមឧបទ្វីបកូរ៉េផ្លូវការត្រឹមឆ្នាំ២០១៨ រដ្ឋមន្រ្តីការបរទេសកូរ៉េខាងត្បូង កាង ឃ្យុងវ៉ា (រូបភាព AFP)
× រដ្ឋមន្ត្រីការបរទេសកូរ៉េខាងត្បូង កាង ឃ្យុងវ៉ា នៅថ្ងៃទី១៨ ខែមិថុនា និយាយថា កូរ៉េខាងត្បូងដាក់គោលដៅប្រកាសបញ្ចប់សង្គ្រាមជាមួយកូរ៉េខាងជើងជាផ្លូវការនៅត្រឹមដំណាច់ឆ្នាំ២០១៨ ។ លោកស្រី កាង អះអាងដែរថា មេដឹកនាំអាមេរិក និងកូរ៉េខាងជើងបានជជែកគ្នារួចហើយលើបញ្ហានេះ។ យ៉ាងណាមិញ កូរ៉េខាងត្បូងនឹងបត់បែនទៅតាមពេលវេលាជាក់លាក់ក្នុងការបញ្ចប់សង្គ្រាមបងប្អូននៅឧបទ្វីបកូរ៉េ។
ការបញ្ចប់សង្គ្រាមឧបទ្វីបកូរ៉េជាផ្លូវការ គឺជាប្រធានបទសំខាន់មួយបន្ទាប់ពីការរំសាយនុយក្លេអ៊ែររបស់កូរ៉េខាងជើង។ កូរ៉េខាងត្បូងចង់ឲ្យមានការប្រកាសបញ្ចប់សង្គ្រាមនៅត្រឹមឆ្នាំ២០១៨ នេះ ទោះជាកាលបរិច្ឆេទពិតប្រាកដ និងបែបបទនៃការបញ្ចប់សង្គ្រាមនេះអាចផ្លាស់ប្ដូរបានក៏ដោយចុះ។ នេះបើតាមការប្រកាសរបស់រដ្ឋមន្ត្រីការបរទេសកូរ៉េខាងត្បូង កាង ឃ្យុងវ៉ា ក្នុងសន្នសីទសារព័ត៌មានថ្ងៃទី១៨ ខែមិថុនា។
ដូចដឹងស្រាប់ហើយ កូរ៉េទាំងពីរស្ថិតក្នុងស្ថានភាពធ្វើសង្គ្រាមនឹងគ្នានៅឡើយទេ ទោះជាសង្គ្រាមដ៏បង្ហូរឈាម១៩៥០-១៩៥៣ បានបញ្ចប់ទៅក្ដី។ នេះក៏ព្រោះតែសង្គ្រាមត្រូវបានផ្អាកក្រោមយុទ្ធសន្តិភាពប៉ុណ្ណោះ មិនមែនសន្ធិសញ្ញាសន្តិភាពឡើយ ដែលជាបច្ចេកទេសមានន័យថា កូរ៉េខាងជើងកំពុងធ្វើសង្គ្រាមជាមួយកូរ៉េខាងត្បូងដដែលនៅឆ្នាំ២០១៨ នេះ។
មេដឹកនាំកូរ៉េទាំងពីរក៏មានឆន្ទៈបញ្ចប់សង្គ្រាមបងប្អូនឲ្យបានឆាប់ដែរ។ ក្នុងសេចក្ដីថ្លែងការណ៍ប៉ាន់មុនជុម ខែមេសា ប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកូរ៉េខាងជើង គីម ជុងអ៊ុន បានយល់ព្រមដោះស្រាយបញ្ហានេះ។ ចំណែកឯលោក គីម ក្នុងជំនួបជាមួយប្រធានាធិបតីអាមេរិក ដូណាល់ ត្រាំ នៅសិង្ហបុរី ក៏បានឯកភាពបង្កើតសន្តិសុខយូរអង្វែងនៅឧបទ្វីបកូរ៉េដែរ។ យោងតាមទីភ្នាក់ងារព័ត៌មាន Xinhua លោកស្រី កាង លើកឡើងថា ការបញ្ចប់សង្គ្រាមនេះ ជាច្រកទៅកាន់សន្តិភាព។
រដ្ឋបាលលោក មូន ចង់ឲ្យមានការប្រកាសបញ្ចប់ជម្លោះនេះនៅថ្ងៃទី២៧ ខែកក្កដា ដែលជាថ្ងៃរំឭកខួបការចុះយុទ្ធសន្តិភាពកាលពីឆ្នាំ១៩៥៣ ។ កាលនោះ មេទ័ពអាមេរិកបានចុះហត្ថលេខាផ្អាកសង្គ្រាមជាមួយមេទ័ពកូរ៉េខាងជើងក្នុងពិធីនៅឯភូមិប៉ាន់មុនជុម ដែលបច្ចុប្បន្នស្ថិតក្នុងតំបន់គ្មានកងទ័ពខណ្ឌចែកឧបទ្វីបកូរ៉េជាពីរ។
ក្នុងដំណើរទៅកាន់សន្តិភាព លោកស្រី កាង បញ្ជាក់ថា ចិនក៏មានចំណែកធំដែរ។ ប្រមុខការទូតកូរ៉េខាងត្បូងអះអាងថា ចិនមានតួនាទីសំខាន់ក្នុងដំណើរការទាំងមូល ហើយកូរ៉េខាងត្បូងនឹងធ្វើការជិតស្និទ្ធជាមួយចិនដើម្បីសម្រេចឲ្យបានសន្តិភាពនៅឧបទ្វីបកូរ៉េ។ លើសពីនោះ ក្រុងសេអ៊ូល នឹងបន្តតាមដានកិច្ចចរចាថ្នាក់ខ្ពស់រវាងមន្ត្រីក្រុងវ៉ាស៊ីនតោន និងព្យុងយ៉ាង ដែលធ្វើឡើងក្រោមក្របខណ្ឌកិច្ចព្រមព្រៀងនៅសិង្ហបុរីនោះ៕
Tag:
កូរ៉េខាងត្បូង
កូរ៉េខាងជើង
Kang Kyung-wha
© រក្សាសិទ្ធិដោយ thmeythmey.com