FIFA
អន្តរជាតិ
ប្រធានាធិបតី មូន ទៅជួប ពូទីន ពិភាក្សាពីបញ្ហាកូរ៉េខាងជើង និងទស្សនាប្រកួតបាល់រវាងក្រុមម៉ិកស៊ិកនិងកូរ៉េខាងត្បូង
× ប្រធានាធិបតីកូរ៉េខាងត្បូង នឹងបំពេញទស្សនកិច្ចនៅទឹកដីរុស្ស៊ីនៅសប្តាហ៍នេះដោយលោកនឹងជួបជាមួយសមភាគីរុស្ស៊ីដើម្បីពិភាក្សាពីទំនាក់ទំនងទ្វេភាគី និងបញ្ហានុយក្លេអ៊ែរកូរ៉េខាងជើង។ ក្រៅពីនេះ ប្រមុខរដ្ឋកូរ៉េខាងត្បូងក៏នឹងចូលរួមទស្សនកិច្ចការប្រកួតពានរង្វាន់បាល់ទាត់ពិភពលោក World Cupរវាងម៉ិកស៊ិកនិងកូរ៉េខាងត្បូងផងដែរ។
ទស្សនកិច្ចរយៈពេលបីថ្ងៃរបស់ប្រមុខរដ្ឋកូរ៉េខាងត្បូងលោក មូន ចេអ៊ីន នឹងចាប់ផ្តើមនៅថ្ងៃ ព្រហស្បតិ៍ទី ២១ ខែមិថុនា។ វាជាទស្សនកិច្ចលើកដំបូងបំផុតរបស់លោក មូន មកកាន់ប្រទេសរុស្ស៊ីបន្ទាប់ពីលោកឡើងកាន់តំណែងខែឧសភាឆ្នាំមុន ហើយវាក៏ជាទស្សនកិច្ចប្រធានាធិបតីកូរ៉េខាងត្បូងដំបូងបំផុតដែររាប់ចាប់ពីឆ្នាំ ១៩៩៩មកនោះ។
បើតាមទីភ្នាក់ងារព័ត៌មានកូរ៉េខាងត្បូង Yonhap ដែលស្រង់សម្តីមន្ត្រីកូរ៉េខាងត្បូងដែលមិនបានបង្ហាញអត្តសញ្ញា ប្រមុខរដ្ឋកូរ៉េខាងត្បូង មូន ចេអ៊ីន នឹងជួបពិភាក្សាទ្វេភាគីជាមួយសមភាគីរុស្ស៊ីលោក វ៉ា្លឌីមៀ ពូទីន ពេលអញ្ជើញទៅដល់រុស្ស៊ីនៅថ្ងៃព្រហស្បតិ៍តែម្តង។
ក្នុងកិច្ចពិភាក្សា មេដឹកនាំទាំងពីរនឹងជជែកគ្នាពីបញ្ហាទំនាក់ទំនងទ្វេភាគីផង ហើយបញ្ហាសំខាន់ជាងគេគឺការកសាងសន្តិភាព និងរំសាយនុយក្លេអ៊ែរកូរ៉េខាងជើងតែម្តង។ រុស្ស៊ីក្នុងនាមជាសមាជិកកិច្ចពិភាក្សាប្រាំមួយភាគីផងនោះ រួមចំណែកសំខាន់ក្នុងការដោះស្រាយសន្តិសុខតំបន់ជាពិសេសនុយក្លេអ៊ែរកូរ៉េខាងជើងតែម្តង។
«កិច្ចពិភាក្សានេះនឹងរួមចំណែកក្នុងការលើកកម្ពស់ទំនាក់ទំនងនិងសហប្រតិបត្តិការយុទ្ធសាស្ត្ររវាងភាគីទាំងពីរនិងឈានទៅបង្កើនការប្រឹងប្រែងរំសាយនុយក្លេអ៊ែរឧបទ្វីបកូរ៉េ និងបង្កើតសន្តិភាពក្នុងតំបន់ស្របពេលដែលសន្តិសុខតំបន់មានការរវិវត្តជាវិជ្ជមាន»។ នេះជាសម្តីមន្ត្រីកូរ៉េខាងត្បូងដែលដកស្រង់ដោយទីភ្នាក់ងារ Yonhap។
«រុស្ស៊ីកន្លងមកបានរួមចំណែកសំខាន់ក្នុងការជំរុញការរំសាយនុយក្លេអ៊ែរ និងចូលរួមដាក់សម្ពាធលើកូរ៉េខាងជើងជាពិសេសពិចារណាឡើងវិញលើទំនាក់ទំនងសេដ្ឋកិច្ចដែលមានជាមួយកូរ៉េខាងជើងផងដែរ»។
តាមពិតទៅ ទស្សនកិច្ចរបស់លោក មូន ចេអ៊ីនទៅកាន់រុស្ស៊ីកើតឡើងប្រហែលជាងមួយសប្តាហ៍ប៉ុណ្ណោះក្រោយជំនួបកំពូលប្រវត្តិសាស្ត្ររវាងមេដឹកនាំអាមេរិក និងកូរ៉េខាងជើងនៅសិង្ហបុរីដែលនាំឲ្យមានការឯកភាពគ្នាជាថ្មីលើការរំសាយអាវុធនោះ។ គេមានសុទិដ្ឋិនិយមថា ជំនួបកន្លងមកនេះនឹងត្រួសត្រាយផ្លូវឲ្យមានការរំសាយអាវុធ និងកសាងសន្តិភាពពេញលេញនៅឧបទ្វីបកូរ៉េពិតប្រាកដផងដែរ។ ក្រោយជំនួបនេះ រដ្ឋាភិបាលក្រេមឡាំងក៏ដូចជាក្រុងប៉េកាំងក៏បានសាទរ និងអំពាវនាវឲ្យមានការបន្ធូរបន្ថយទណ្ឌកម្មសេដ្ឋកិច្ចដែលហ៊ុមព័ទ្ធកូរ៉េខាងជើងផងដែរ។
ដោយឡែក ក្រៅពីជជែកពិភាក្សាពីបញ្ហាសំខាន់ទាំងក្នុងទំនាក់ទំនងទ្វេភាគី និងបញ្ហាប្រឈមអន្តរជាតិជាមួយប្រមុខរដ្ឋរុស្ស៊ី លោក មូន ក៏នឹងចំណាយពេលវេលានៅថ្ងៃសៅរ៍ទី ២៣ មិថុនា ដើម្បីចូលរួមទស្សនា និងផ្តល់កម្លាំងចិត្តដល់ក្រុមកូរ៉េខាងត្បូងក្នុងការប្រកួតបាល់ទាត់ពិភពលោក World Cup ជាមួយប្រទេសម៉ិកស៊ិកផងដែរ៕
Tag:
កូរ៉េខាងត្បូង
រុស្ស៊ី
World Cup
© រក្សាសិទ្ធិដោយ thmeythmey.com