ម្ចាស់ផ្ទះរុស្ស៊ី៣ពិន្ទុបន្ថែម ជប៉ុន និងសេណេហ្គាល់ធ្វើឲ្យក្រុមខ្លាំងខកចិត្តនាជំនួបពូល H

FIFA

កីឡាអន្តរជាតិ

អន្តរជាតិ

ម្ចាស់ផ្ទះរុស្ស៊ី៣ពិន្ទុបន្ថែម ជប៉ុន និងសេណេហ្គាល់ធ្វើឲ្យក្រុមខ្លាំងខកចិត្តនាជំនួបពូល H

20, Jun 2018 , 9:02 am

រូបភាព

ម្ចាស់ផ្ទះរុស្ស៊ី ជប៉ុន និងសេណេហ្គាល់ ឈ្នះការប្រកួតកាលពីយប់មិញ។ រូបថត Getty/FIFA

ដោយ: រួបរួម

ម្ចាស់ផ្ទះរុស្ស៊ី មានលទ្ធភាពខ្ពស់ក្នុងការដណ្តើមបានកៅអីវគ្គ១៦ក្រុមចុងក្រោយក្នុង World Cup បន្ទាប់ពីពួកគេបានយកឈ្នះអេហ្ស៊ីប ៣-១ នាការប្រកួតលើកទីពីរនៅពូល A។ រីឯការប្រកួតបើកឆាកនៅពូល H ក្រុមអាស៊ី និងអាហ្វ្រិកបានបង្កើតកំណត់ត្រាថ្មីរបស់ខ្លួន ដោយជប៉ុនឈ្នះកូឡុំប៊ី ២-១ មុនសេណេហ្គាល់ បានបីពិន្ទុពីប៉ូឡូញ ក្នុងលទ្ធផលដូចគ្នា។

ម្ចាស់ផ្ទះរុស្ស៊ីមានភាគរយខ្ពស់ក្នុងការឈានទៅវគ្គ១៦ក្រុមចុងក្រោយ

ម្ចាស់ផ្ទះរុស្ស៊ី ដែលបានយកឈ្នះអារ៉ាប៊ីសាអូឌីត ៥-០ នាជំនួបបើកឆាក បន្តបាន៣ពិន្ទុបន្ថែមទៀត ពីអេហ្ស៊ីបតាមរយៈជ័យជម្នះ ៣-១ ។ គ្រាប់បាល់បញ្ចូលទីដំបូង គឺជាការធ្វើឲ្យចូលទីខ្លួនឯងរបស់កីឡាកររុស្ស៊ី Ahmed Fathi នៅដើមតង់ទីពីរ ហើយ Denis Cheryshev និង Artem Dzyuba រកបានបន្ថែមជាបន្តបន្ទាប់។ កីឡាករឆ្នើម Mohamed Salah បានចូលលេងលើកដំបូងសម្រាប់អេហ្ស៊ីប នឹងបានទាត់បាល់ប៉េណាល់ទី តាមពីក្រោយបាន១គ្រាប់នៅនាទី៧៣ ។

នេះជាប្រវត្តិសាស្ត្រដំបូងបំផុតរបស់រុស្ស៊ី ដែលបានឈ្នះពីរប្រកួតបើកឆាកជាប់ៗគ្នានៅ World Cup បើគិតចាប់តាំងពីឆ្នាំ១៩៦៦ ក្នុងនាមជាសហភាពសូវៀត។ រុស្ស៊ីនឹងឈានទៅវគ្គ១៦ក្រុមចុងក្រោយដោយស្វ័យប្រវត្តិ និងអេហ្ស៊ីប ត្រូវហាលអាវ បើអារ៉ាប៊ីសាអូឌីត មិនអាចយកឈ្នះអ៊ុយរូហ្គាយ សម្រាប់ជំនួបនៅថ្ងៃពុធនេះ។

ជប៉ុនឈ្នះកូឡុំប៊ី ដែលជាក្រុមមកពីអាមេរិកខាងត្បូងលើកដំបូង

ជប៉ុនប្រកួតបើកឆាកពូល H ជាមួយនឹងលទ្ធផលជ័យជម្នះ ២-១ ដ៏រំភើបលើកូឡុំប៊ី។ Shinji Kagawa ស៊ុតបាល់បញ្ចូលទីនាំមុខនៅដើមតង់ឲ្យជប៉ុន ក្រោយ Carlos Sanchez របស់កូឡុំប៊ី ទទួលបានកាតក្រហមនៅនាទី ទី៣ ។ ទោះបីជានៅតែគ្នា១០នាក៏ដោយ កូឡុំប៊ី រកបានតាមស្មើវិញនៅ៦នាទីមុនបញ្ចប់ការប្រកួតតង់ទីមួយដែលសម្រេចបានដោយ Juan Quintero។ ខ្សែប្រយុទ្ធឆ្នើម James Rodriguez បានបង្ហាញវត្តមាននៅលើទីលាន ប៉ុន្តែគេមិនអាចជួយក្រុមបានឡើយ ខណៈជប៉ុនបង្កើនការនាំមុខ ២-១ ដោយការតែតបញ្ចូលទីរបស់ Yuya Osako នៅនាទី៧៣ ក្រោយការបញ្ជូនរបស់ Keisuke Honda។

លទ្ធផលនេះត្រូវបានរក្សារហូតដល់បញ្ចប់ការប្រកួតដែលនាំឲ្យជប៉ុនក្លាយជាក្រុមអាស៊ីទីមួយដែលឈ្នះការប្រកួត World Cup នៅទឹកដីអឺរ៉ុប និងជាក្រុមដំបូងដែលបានយកឈ្នះក្រុមពីអាមេរិកខាងត្បូងផងដែរ។ ជាមួយគ្នានេះ Honda ក្លាយជាកីឡាករអាស៊ីដំបូង ដែលបានបញ្ជូនបាល់ឲ្យមិត្តរួមក្រុមស៊ុតបញ្ចូលទីក្នុងព្រឹត្តិការណ៍ World Cup ៣លើកផ្សេងគ្នា។

សេណេហ្គាល់ជាក្រុមអាហ្វ្រិកទីមួយដែលឈ្នះបើកឆាក

សេណេហ្គាល់ បានស្តារមុខមាត់ដល់ក្រុមពីអាហ្វ្រិក តាមរយៈជ័យជម្នះ ២-១ លើប៉ូឡូញ ក្នុងជំនួបបើកឆាកពូល H។ នៅពាក់កណ្តាលតង់ទីមួយ ការធ្វើឲ្យចូលទីខ្លួនឯងរបស់ Thiaga Cionek មានទុននាំមុខ១គ្រាប់ ហើយ M’Baye Niang បន្ថែមគ្រាប់ទីពីរ ខណៈការប្រកួតដំណើរការបាន១ម៉ោង និងជាគ្រាប់បាល់ដ៏ចម្រូងចម្រាស់មួយ។ ៤នាទីមុនបញ្ចប់ការប្រកួត ប៉ូឡូញ តាមពីក្រោយបាន១គ្រាប់ ដែលជាតែតបញ្ចូលទីរបស់ Grzegorz Krychowiak ៕