កីឡាជាតិ
ជាតិ
អុកចត្រង្គ៖ ជើងខ្លាំងប្រចាំការប្រកួតជើងឯកថ្នាក់ជាតិនឹងក្លាយជាកីឡាករជម្រើសជាតិ
× សហព័ន្ធកីឡាអុកចត្រង្គកម្ពុជា រៀបចំការប្រកួតជើងឯកថ្នាក់ជាតិប្រចាំឆ្នាំ២០១៨ ដើម្បីចម្រាញ់រកជើងខ្លាំងមកធ្វើជាកីឡាករជម្រើសជាតិប្រចាំឆ្នាំ២០១៩។ កីឡាករ៤៨នាក់មកពីក្លិប-សមាគមតាមបណ្តាខេត្តនានា ត្រូវប្រជែងគ្នាចាប់ពីថ្ងៃទី២០-២១ ខែមិថុនា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។
ជាការប្រកួតជើងឯកថ្នាក់ជាតិប្រចាំឆ្នាំ២០១៨ ក៏ពិតមែន។ ប៉ុន្តែជាការប្រកួតចម្រាញ់រកធនធានជម្រើសជាតិ សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ក្នុងន័យនេះ កីឡាករជើងខ្លាំងប្រចាំព្រឹត្តិការណ៍ប្រកួតជើងឯកថ្នាក់ជាតិប្រចាំឆ្នាំ២០១៨លើកនេះ នឹងទទួលបានឱកាសធ្វើជាកីឡាករជម្រើសជាតិប្រចាំសហព័ន្ធកីឡាអុកចត្រង្គកម្ពុជាឆ្នាំ២០១៩។
បើយោងតាមលោក គ្រួច ចន្ថារិទ្ធ អគ្គលេខាធិការរងសហព័ន្ធ ការប្រកួតឆ្នាំនេះមានកីឡាករ៤៨នាក់ចូលរួម តែមិនមានកីឡាការិនីនោះឡើយ។ ការប្រកួតបែងចែកជា៨ពូលក្នុង១ពូលមានគ្នា៦នាក់ ធ្វើតាមរូបមន្តប្រកួតវិលជុំ ដោយកីឡាករម្នាក់ត្រូវប្រកួត៥ប្រកួត។ កីឡាករមានពិន្ទុខ្ពស់ជាងគេពីររូបក្នុងនីមួយៗ នឹងទទួលបានកៅអីឡើងទៅប្រកួតនៅវគ្គបន្ត។ ការប្រកួតប្រព្រឹត្តទៅចាប់ពីថ្ងៃទី២០ ដល់ថ្ងៃទី២១ ខែមិថុនា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា៕
Tag:
អុកចត្រង្គ
ជើងឯកថ្នាក់ជាតិ
NOCC
© រក្សាសិទ្ធិដោយ thmeythmey.com