កីឡាជាតិ
ជាតិ
ជើងឯកអុកអង្គរសង្ក្រាន្ត សុខ លឹមហេង និង ឆយ វីរ៉ា អស់ឱកាសប្រជែងជើងឯកនៅឆ្នាំនេះ
× ម្ចាស់ជើងឯកកីឡាអុកចត្រង្គប្រចាំព្រឹត្តិការណ៍អង្គរសង្ក្រាន្តកីឡាករ សុខ លឹមហេង និងម្ចាស់ជើងឯកថ្នាក់ជាតិឆ្នាំចាស់ ឆយ វីវ៉ា សុទ្ធតែអស់ឱកាសឡើងទៅប្រជែងដណ្តើមជើងឯកថ្នាក់ជាតិនៅឆ្នាំនេះ។ បន្ទាប់ពីពួកគេចាញ់គូប្រកួតរៀងៗខ្លួន ក្នុងវគ្គជម្រុះកាលពីព្រឹកថ្ងៃទី២១ ខែមិថុនា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។ ការបរាជ័យនេះ ធ្វើឲ្យតំណែងក្នុងក្របខណ្ឌកីឡាករជម្រើសជាតិរបស់ពួកគេ ស្ថិតក្នុងភាពស្រពេចស្រពិល។
គ្មានឡើយវត្តមានកីឡាករ សុខ លឹមហេង ស្តេចអុកចត្រង្គប្រចាំព្រឹត្តិការណ៍អង្គរសង្ក្រាន្តឆ្នាំ២០១៨ និងកីឡាករ ឆយ វីរ៉ា ម្ចាស់ជើងឯកថ្នាក់ជាតិឆ្នាំ២០១៧ សម្រាប់ការប្រជែងដណ្តើមជើងឯកប្រចាំការប្រកួតជើងឯកថ្នាក់ជាតិឆ្នាំ២០១៨។ ការអវត្តមានជើងខ្លាំងទាំងពីររូបនេះ បន្ទាប់ពីពួកគេបានចាញ់គូប្រកួតរៀងៗខ្លួននាការប្រកួតវគ្គជម្រុះកាលពីព្រឹកថ្ងៃទី២១ ខែមិថុនា ឆ្នាំ២០១៨។
ក្នុងនោះកីឡាករ សុខ លឹមហេង លេខ១ប្រចាំពូល A ចាញ់កីឡាករ ឆយ វីរ៉ា ក្នុងវគ្គ១៦នាក់ចុងក្រោយ រីឯកីឡាករ ឆយ វីរ៉ា លេខ១ប្រចាំពូល H ចាញ់កីឡាករ ប៊ូ ប៉ុណ្ណម៉ូលីកា ក្នុងវគ្គ៨នាក់ចុងក្រោយ។ ការបរាជ័យនេះ ធ្វើឲ្យតំណែងក្នុងក្របខណ្ឌកីឡាករជម្រើសជាតិរបស់ពួកគេទាំងពីរស្ថិតក្នុងភាពស្រពេចស្រពិល។ នាការប្រកួតឆ្នាំ២០១៧ កីឡាករ ឆយ វីរ៉ា ទទួលបានចំណាត់ថ្នាក់លេខ១ ខណៈកីឡាករ សុខ លឹមហេង បានលេខ៣។
ចំណែកកីឡាករ ហេង សៅឌី ម្ចាស់ជើងឯកព្រឹត្តិការណ៍អង្គរសង្ក្រាន្ត និងជាជើងឯករងការប្រកួតថ្នាក់ជាតិឆ្នាំ២០១៧ និងកីឡាករ ប៊ិន គាសេង ម្ចាស់លេខ៤ឆ្នាំចាស់ សុទ្ធតែធ្លាក់ត្រឹមវគ្គជម្រុះតាមពូល។ ការបរាជ័យនេះ ធ្វើឲ្យកីឡាករជម្រើសជាតិទាំងពីរបាត់ឱកាសប្រមូលផ្តុំក្នុងក្រុមជម្រើសជាតិនៅឆ្នាំ២០១៩។
សម្រាប់ការប្រកួតជើងឯកថ្នាក់ជាតិឆ្នាំនេះ មានកីឡាករចូលរួម៤៨នាក់ ដោយការប្រកួតមានរយៈពេល២ថ្ងៃចាប់ពីថ្ងៃទី២០-២១ ខែមិថុនា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។ ក្នុងចំណោមកីឡាករទាំងនេះ សហព័ន្ធនឹងជ្រើសរើសពីលេខ១-១៦ ដើម្បីស្នើសុំគោលការណ៍ពីក្រសួងអប់រំយុវជននិងកីឡាក្នុងការប្រមូលផ្តុំជម្រើសជាតិ។ ប៉ុន្តែលទ្ធផលយ៉ាងណា អាស្រ័យលើការសម្រេចរបស់ក្រសួងអប់រំ ខណៈកាលពីលើកមុនក្រសួងអនុញ្ញាតឲ្យ៦នាក់រួមមាន កីឡាករ ឆយ វីរ៉ា, ហេង សៅឌី, សុខ លឹមហេង, ប៊ិន គាសេង, រស់ រិទ្ធីយ៉ា និង ប៊ូ ប៉ុណ្ណម៉ូលីកា៕
Tag:
អុកចត្រង្គ
សុខ លឹមហេង
ឆយ វីរ៉ា
ជើងឯកថ្នាក់ជាតិ
© រក្សាសិទ្ធិដោយ thmeythmey.com