ជាតិ
បោះឆ្នោត
រូបពីក្រសួងការបរទេសកម្ពុជា៖ ជំនួបរវាងលោក ប្រាក់ សុខុន និងលោក Sudirman Haseng កាលពីថ្ងៃ១៩ ខែមិថុនា ឆ្នាំ២0១៨
×![]()
ដោយ: សារព័ត៌មានថ្មីៗ
រដ្ឋាភិបាលឥណ្ឌូនេស៊ី នឹងបញ្ជូនអ្នកសង្កេតការណ៍ មកចូលរួមឃ្លាំមើលការបោះឆ្នោតនៅកម្ពុជា ដែលប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។ នេះជាការអះអាងរបស់លោក Sudirman Haseng ឯកអគ្គរដ្ឋទូតឥណ្ឌូនេស៊ីប្រចាំកម្ពុជា ក្នុងជំនួបជាមួយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា នៅថ្ងៃទី១៩ ខែមិថុនា ឆ្នាំ២០១៨។
សេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃជំនួបនេះ បានសរសេរយ៉ាងដូច្នេះថា៖«ឯកឧត្តមឯកអគ្គរដ្ឋទូត បានលើកឡើងពីគោលជំហររបស់រដ្ឋាភិបាលឥណ្ឌូនេស៊ី ក្នុងការគោរពអធិបតេយ្យភាព និងការជ្រើសរើសមាគ៌ាប្រជាធិបតេយ្យរបស់កម្ពុជា»។
ក្រៅពីឥណ្ឌូនេស៊ី នៅមានប្រទេសផ្សេងៗទៀត ដូចជា ជប៉ុន ចិន និងឥណ្ឌា ជាដើម បានគាំទ្រដំណើរការបោះឆ្នោតនៅកម្ពុជា ទោះជាមានប្រទេសខ្លះ មិនពេញចិត្តក៏ដោយ។
សហរដ្ឋអាមេរិក និងសហភាពអឺរ៉ុប អាចនឹងមិនទទួលស្គាល់លទ្ធផលបោះឆ្នោតនៅកម្ពុជា បើគណបក្សប្រឆាំង ពិតជាមិនបានចូលរួម។ ប្រទេសធំៗទាំងនេះ យល់ថា អវត្តមានគណបក្សប្រឆាំង ធ្វើឲ្យការបោះឆ្នោត មិនមានលក្ខណប្រជាធិបតេយ្យ និងមិនមានភាពស្របច្បាប់ឡើយ។
ចំណែក លោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ដែលធ្លាប់មកតាមដានស្ថានការណ៍នៅកម្ពុជាចំនួន៥លើករួចមកហើយនោះ បានហៅការបោះឆ្នោត ដែលគ្មានគណបក្សប្រឆាំងធំជាងគេ ថាជាការបោះឆ្នោតមិនពិតប្រាកដ។ រីឯលោក សម រង្ស៊ី និងបក្សពួកនៅក្រៅប្រទេស បានបន្តអំពាវនាវកុំឲ្យប្រជាពលរដ្ឋទៅចូលរួមបោះឆ្នោត។
ការបោះឆ្នោតលើកនេះ មានគណបក្ស២០ ចូលរួមប្រកួតប្រជែង។ ហើយប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត មានជាង៨.៣ លាននាក់៕
Tag:
បោះឆ្នោត
ឥណ្ឌូនេស៊ី
អ្នកសង្កេតការណ៍
© រក្សាសិទ្ធិដោយ thmeythmey.com
