ជាតិ
សង្គមជាតិ
រដ្ឋាភិបាល ដាក់មន្ត្រី និងបុគ្គលិកស៊ីម៉ាក់ទាំងអស់ ចូលទៅក្នុងក្របខណ្ឌរដ្ឋ រូបភាពពីហ្វេសប៊ុក លោក HENG Ratana
× ភ្នំពេញ៖ រាជរដ្ឋាភិបាលកម្ពុជា បានសម្រេចបញ្ចូលមន្ត្រី និងបុគ្គលិក មជ្ឈមណ្ឌលសកម្មភាពកំចាត់មីនកម្ពុជា (CMAC) ទាំងអស់ចូលក្នុងក្របខណ្ឌកងយោធពលខេមរភូមិន្ទ នៅពេលបញ្ចប់ភារកិច្ចក្នុងកិច្ចសន្យា និងអ្នកចូលនិវត្តន៍ ពលី ពិការ បាត់បង់លទ្ធភាពពលកម្ម។ នេះបើតាមការបញ្ជាក់របស់ លោក ហេង រតនា អគ្គនាយក CMAC។
ការបញ្ចូលមន្ត្រី CMAC ទៅក្នុងក្របខណ្ឌរដ្ឋនេះដែរ លោក ហេង រតនា ធ្លាប់បានប្រាប់សារព័ត៌មានថ្មីៗកន្លងមក យ៉ាងដូច្នេះថា ទោះជាត្រូវបានបញ្ចូលក្នុងក្របខណ្ឌនៃក្រសួងការពារជាតិក្តី ប៉ុន្តែមន្ត្រីនិងបុគ្គលិកទាំងអស់របស់ CMAC មិនមែនជាកងទ័ព ហើយមានសក្តិពាក់នោះទេ។ លោក បញ្ជាក់ថា «ប្រាក់ខែ របស់ពួកគេនៅតែបើកពី CMAC ដដែល មិនមែនបើកពីក្រសួងការពារជាតិ ឬពីស្ថាប័នរដ្ឋណាមួយឡើយ។
អគ្គនាយក CMAC បានបន្ថែមថា អត្ថប្រយោជន៍នៃការចូលក្របខណ្ឌនេះ គឺពួកគេទទួលបានប្រាក់សោធននិវត្តន៍ពីរដ្ឋ ដោយកន្លងមកពួកគេមិនទទួលបានទេ ពីព្រោះមិនមែនជាក្របខណ្ឌរដ្ឋ ហើយមានអ្នកខ្លះជួបការលំបាក់នឹងជីវភាពពេលចូលនិវត្តន៍ ដោយសារតែមិនទទួលបានប្រាក់សោធននិវត្តន៍។
លោក ហេង រតនា បានបន្ថែមទៀតថា ការបញ្ចូលក្របខណ្ឌមន្ត្រី CMAC ជាគុណបំណាច់ ដែលពួកគេបានបម្រើការងារកំចាត់មីនជាង២៥ឆ្នាំហើយ ដោយអ្នកខ្លះ ក៏ធ្លាប់មានអតីតភាពជាកងកម្លាំងប្រដាប់អាវុធផងដែរ។ អគ្គនាយក CMAC ដដែលនេះ បានបញ្ជាក់ទៀតថា ៖«មន្ត្រីនិងបុគ្គលរបស់ CMAC មានប្រមាណ ១៨00នាក់ កំពុងបម្រើការងារ»៕
© រក្សាសិទ្ធិដោយ thmeythmey.com