កាលថ្ងៃទី២២ខែមិថុនា កន្លងមកនេះ! ក្រុមសិល្បៈករកម្ពុជា និងក្រុមសិល្បៈករចិនបានរៀបចំកម្មវិធីសម្តែង ដើម្បីអបអរសាទរ ខួបអនុស្សាវរីយ៍៦០ឆ្នាំនៃទំនាក់ទំនងការទូតកម្ពុជា~ចិន ក្នុងគោលបំណងពង្រឹងចំណងមិត្តភាព កម្ពុជា~ចិន។
គួរបញ្ជាក់ផងដែលថា! កម្មវិធីសម្តែងរួមគ្នារបស់ក្នុងសិល្បៈ មានការអញ្ជើញចូលរួម របស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ, ឯកឧត្តម លី ជា ទីប្រឹក្សាស្ថានទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា, លោក ម៉ា ចៀនហ្វី នាយកស្តីទីវិទ្យាស្ថានខុងជឺទីស្នាក់ការកណ្តាល ហាន់ប៉ាន់, ឯកឧត្តមបណ្ឌិតសភាចារ្យ ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ នៅសាលមហោស្រព្វចតុមុខ។ វត្តមានរបស់ថ្នាក់ដឹកនាំគឺជាកម្លាំងលើកទឹកចិត្ត និងជួយជំរុញវិស័យសិល្បៈ និងវប្បធម៌របស់ប្រទេសនីមួយៗ ជាពិសេសចំពោះក្រុមសិល្បៈករកម្ពុជា និងក្រុមសិល្បៈករចិន។
បណ្ឌិតសភាចារ្យ សុខ ទូច អនុប្រធានប្រចាំការក្រុមប្រឹក្សាបណ្ឌិតសភាចារ្យ និងជាប្រធានរាជបណ្ឌិត្យសភាកម្ពុជា មានសុន្ទរកស្វាគមន៍ «ការសម្តែងសិល្បៈរួមគ្នារវាងក្រុមសិល្បៈករកម្ពុជា និងក្រុមសិល្បៈករចិននេះគឺ ដើម្បីអបអរសាទរ ខួបអនុស្សាវរីយ៍៦០ឆ្នាំនៃទំនាក់ទំនងការទូតកម្ពុជា-ចិន។ ពិតណាស់ចំណងទំនាក់ទំនងរវាងប្រទេសទាំងពីរ កម្ពុជា ចិន មានអាយុកាលរាប់ពាន់ឆ្នាំមកហើយ ដែលទំនាក់ទំនងត្រូវចងភ្ជាប់ដោយចំណងប្រវត្តិសាស្ត្រ, ភូមិសាស្ត្រ, វប្បធម៌ នយោបាយ, សេដ្ឋកិច្ច និងមរតកនៃអ្នកដឹកនាំកំពូលរបស់នៃប្រទេសទាំងពីរ។»
បន្ថែមពីនេះលោកបណ្ឌិត បានមានសប្រសាសន៍ថា «ជាមួយគ្នានេះដែរ សិល្បៈបានដើរតួនាទីយ៉ាងសំខាន់ផងដែរក្នុងការធ្វើឱ្យទំនាក់ទំនងរវាងប្រទេសទាំងពីរកាន់តែស្អិតល្មួតចូលជ្រៅក្នុងបេះដូងនៃប្រជាជនទាំងពីរ។ ក្នុងនោះ សិល្បៈតន្ដ្រី ដែលជាសិល្បៈដែលស្ដែងចេញតាមរយៈឧបករណ៍ ដែលអាចបន្លឺសូរសំឡេងពិរោះ អន្លង់អន្លោច ពោរពេញទៅដោយមនោសញ្ចេតនា ដែយលាយឡំទៅដោយការសប្បាយ រីករាយ និងភាពក្រៀមក្រំ ដែលស្ដែងចេញឡើងតាមរយៈសកម្មភាពរបស់មនុស្ស និងបង្ហាញអំពីទិដ្ឋភាព និងជីវភាពសង្គមមនុស្សដែលកំពុងជួបប្រទៈ រួមជាមួយសិល្បៈរបាំ ដែលបញ្ចេញកាយវិការ ប្រកបដោយគំនិត ច្នៃប្រឌិត និងមានលក្ខណៈទន់ភ្លន់ បត់បែនទៅតាមចង្វាក់ភ្លេង ដើម្បីសេចក្ដីសប្បាយរីករាយរបស់មនុស្ស និងអទិទេព, គឺជាចំណងដ៏សំខាន់នៃទំនាក់ទំនងរវាងប្រទេសទាំងពីរ។ ក្រុមសិល្បៈករកម្ពុជា និងក្រុមសិល្បៈករចិននឹងបញ្ចេញទេពកោសល្យរបស់ តាមរយៈផ្ទាំងទស្សនីយភាពសិល្បៈចម្រុះ កម្ពុជា ចិន ដែលបង្ហាញពីវប្បធម៌នៃប្រទេសទាំងពីរ និងអន្តរកម្មនៃសិល្បៈនៃប្រទេសទាំងពីរ។ ផ្ទាំងសិល្បៈទស្សនីយភាពចំនួន ១៣ នឹងត្រូវបានសម្តែងដោយឡែក និងរួមគ្នាដោយក្រុមសិល្បៈករកម្ពុជា និងក្រុមសិល្បៈករចិនដូចខាងក្រោម ៖
1. ការប្រគំភ្លេងប្រជាប្រិយ
2. របាំជាក្រុម
3. របាំសែនភ្លយ
4. ការសំដែងពិន «ទប់ទល់នឹងព្យុះទីហ្វុង»
5. ការសំដែងក្បាច់គុណចិន
6. របាំក្ងោកប៉ៃលិន
7. ការកូតទ្រ «ប្រណាំងសេះ»
8. របាំ «សុវណ្ណមច្ឆា»
9. របាំ «សុបិនឃើញឃុំលីណា»
10. ល្ខោន «អ្នកម្នាងស្រវឹងស្រា»
11. ចម្រៀង «ផ្កាម្លិះ»
12. ចម្រៀង «ឱផ្ទៃស្រុកខ្មែរ»
13. របាំគោះអង្រែ