ជាតិ
សេដ្ឋកិច្ច
បច្ចេកវិទ្យា
ក្រុមហ៊ុន៣បោះទុន៧០លានបង្កើត«Data Center»លើដី៥ហិកតា សម្រាប់អាជីវកម្មនៅកម្ពុជា
× ភ្នំពេញ៖ ក្រុមហ៊ុនចំនួនបីបានសហការគ្នាវិនិយោគបង្កើតមជ្ឈមណ្ឌលទិន្នន័យ (Data Center) ដំបូងគេនៅកម្ពុជា និងផ្ដល់សេវាកម្មគ្រប់គ្រងលំហូរទិន្នន័យ ដែលនឹងបម្រើឲ្យតម្រូវការរបស់បណ្ដាក្រុមហ៊ុនធ្វើប្រតិបត្តិការអាជីវកម្មឌីជីថល និងស្ថាប័នរដ្ឋផងដែរ។
គម្រោងបង្កើត Data Center នេះ ត្រូវសហការគ្នារវាងក្រុមហ៊ុនក្នុងស្រុក តែ អៀកហុង អេនធើប្រាយ និងក្រុមហ៊ុន Kepstar Data Center និងក្រុមហ៊ុនម៉ាឡេស៊ី Fourtitute Asia ។ ក្រុមហ៊ុនទាំងបីនេះបានចុះហត្ថលេខាលើអនុស្សារណៈនៃការយោគយល់គ្នា នៅថ្ងៃទី២២ខែមិថុនា នៅក្នុងកម្មវិធីបច្ចេកវិទ្យាមួយរបស់ក្រសួងប្រៃសណីយ៍ និងទូរគមនាគមន៍។
ក្រុមហ៊ុនទាំងបីបានប្រកាសទឹកប្រាក់វិនិយោគចំនួន ៧០លានដុល្លារ ដើម្បីបង្កើត Data Center ដំបូងគេនៅកម្ពុជា។ គម្រោងនេះ នឹងត្រូវប្រើរយៈពេល ១៨ខែ ដើម្បីបង្កើត Data Center លើទីតាំងពីរកន្លែង ក្នុងទំហំផ្ទៃដីសរុប ៥ហិកតា។ មជ្ឈមណ្ឌលទិន្នន័យនេះ ត្រូវបានអះអាងថានឹងចាប់ផ្ដើមសាងសង់ក្នុងពេលឆាប់ៗខាងមុខនេះ ប៉ុន្តែក្រុមហ៊ុនមិនអាចបញ្ជាក់ពីទីកន្លែងនៃគម្រោងនេះនោះទេ បើទោះបីមន្ត្រីជាន់ខ្ពស់របស់ក្រសួងប្រៃសណីយ៍បានបង្ហើបថាគម្រោងនេះត្រូវធ្វើនៅ កំបូល ផ្លូវជាតិលេខ៤ ក្រុងភ្នំពេញ។
Data Center គឺជាផ្នែកមួយដ៏សំខាន់នៃហេដ្ឋារចនាសម្ព័ន្ធគមនាគមន៍ឌីជីថល។ ក្រុមហ៊ុនដែលប្រតិបត្តិការអាជីវកម្មបែបឌីជីថល ពឹងផ្អែកលើហេដ្ឋារចនាសម្ព័ន្ធទាំងនេះ។ ក្រុមហ៊ុនអាជីវកម្ម ត្រូវការសេវាកម្មគ្រប់គ្រង រក្សាទុក និងចរាចរទិន្នន័យរបស់ស្ថាប័នខ្លួន ដូចជាព័ត៌មានអតិថិជន ទិន្នន័យប្រតិបត្តិការអាជីវកម្មផ្សេងៗជាដើម។
លោក តែជួរ ប្រធានក្រុមហ៊ុន តែ អៀកហុង បានថ្លែងដូច្នេះថា៖«Data Center គឺជាហេដ្ឋារចនាសម្ព័ន្ធដ៏សំខាន់។ អ្នកវិនិយោគធំៗ ដូចជា Amazon, Alibaba ជាដើម បើចង់មកកម្ពុជា គេនឹងស្វែងយល់ថាកម្ពុជាមានហេដ្ឋារចនាសម្ព័ន្ធអ្វីខ្លះ ដើម្បីផ្ទុកទិន្នន័យរបស់គេ»។
ដៃគូម្ចាស់គម្រោងនេះ បានសំឡឹងឃើញអតិថិជនគោលដៅរបស់ខ្លួន ដែលមានដូចជា ធនាគារ ក្រុមហ៊ុនផ្ដល់សេវាទូរគមនាគមន៍ ជាដើម។
សព្វថ្ងៃ បណ្ដាក្រុមហ៊ុនផ្ដល់សេវាទូរគមនាគមន៍ និងគ្រឹះស្ថានធនាគារ មានមណ្ឌលទិន្នន័យផ្ទាល់ខ្លួន តែទ្រង់ទ្រាយតូច និងសម្រាប់ប្រើប្រាស់ផ្ទាល់ខ្លួនប៉ុណ្ណោះ។ ហើយក្រុមហ៊ុនខ្លះជាវសេវាផ្ទុកទិន្នន័យពីក្រៅប្រទេស។ លោក កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានឲ្យដឹងថា៖«ឥឡូវនេះទិន្នន័យមានច្រើន ដូចនេះប្រតិបត្តិករ បើខ្វះហេដ្ឋារចនាសម្ព័ន្ធ ហើយមិនចង់ចំណាយវិនិយោគដោយខ្លួនឯងច្រើន ពួកគេនឹងរកសេវាកម្មពីគម្រោងខាងលើនេះ ដើម្បីពង្រីកលំហូរទិន្នន័យរបស់ខ្លួនធំជាងមុន»។
លោក កាន ច័ន្ទមេត្តា បានចាត់ទុក Data Center ជាឆ្អឹងខ្នងនៃប្រព័ន្ធសេដ្ឋកិច្ចឌីជីថល ដែលកម្ពុជាកំពង់តែតម្រង់ផ្លូវរបស់ខ្លួនតាមនិន្នាការមួយនេះ។ លោកមានប្រសាសន៍ដូច្នេះថា៖«មជ្ឈមណ្ឌលទិន្នន័យ គឺជាអនាគតសេដ្ឋកិច្ចឌីជីថលរបស់យើង។ ហើយមជ្ឈមណ្ឌលទិន្នន័យនេះ នឹងជួយទ្រទ្រង់លំហូរទិន្នន័យដ៏សំខាន់»៕
© រក្សាសិទ្ធិដោយ thmeythmey.com